ଭୁବନେଶ୍ୱର,୩୧।୧୨(ବ୍ୟୁରୋ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଶୁକ୍ରବାର ବସିଥିବା କ୍ୟାବିନେଟ ବୈଠକରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗ୍ରହଣ କରାଯାଇଛି। ଏଥିରେ ୫ ମହାନଗର ନିଗମ ପାଇଁ ଜାଗା ମିଶନ ସମେତ ୯ଟି ପ୍ରସ୍ତାବକୁ କ୍ୟାବିନେଟ ମଞ୍ଜୁରୀ ମିଳିଛି। କଟକ, ଭୁବନେଶ୍ୱର, ରାଉରକେଲା, ବ୍ରହ୍ମପୁର, ସମ୍ବଲପୁର ମହାନଗରର ବସ୍ତିବାସିନ୍ଦାଙ୍କୁ ସରକାର ଜାଗା ଯୋଗାଇବେ । ବସ୍ତି ବାସିନ୍ଦାଙ୍କୁ ୪୫ ବର୍ଗମିଟର ପର୍ଯ୍ୟନ୍ତ ଭୂମି ଅଧିକାର ପ୍ରଦାନ କରାଯିବ। ଲ୍ୟାଣ୍ଡ ରାଇଟ୍ସ ଆକ୍ଟ ଅନୁରେ ଏହି ଜମି ମିଳିବ। ଏହାଦ୍ୱାରା ୯୩୮ଟି ବସ୍ତିର ୧ ଲକ୍ଷ ୯୦ ହଜାର ପରିବାର ତଥା ୮ ଲକ୍ଷ ୫୮ ହଜାର ଲୋକ ଉପକୃତ ହେବେ। ତେବେ ୬ ମାସ ଭିତରେ ଜମି ଯୋଗାଣ କାର୍ଯ୍ୟକ୍ରମ ଶେଷ ହେବ ବୋଲି ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା ସୂଚନା ଦେଇଛନ୍ତି।
ଶିକ୍ଷକଙ୍କୁ ପାଇଁ ସପ୍ତମ ବେତନ କମିଶନ ଲାଗୁ କରାଯିବ। ଏହାଦ୍ୱାରା ୨୬ହଜାରରୁ ଅଧିକ ଶିକ୍ଷକ ଏବଂ ଅଣଶିକ୍ଷକ ଉପକୃତ ହେବେ। ଏବେ ଶିକ୍ଷକମାନେ ବର୍ଦ୍ଧିତ ଦରମା ପାଇବେ। ଜାନୁଆରୀ ପହିଲାରୁ ଏହା ଲାଗୁ ହେବ। ଏଥିଲାଗି ବର୍ଷକୁ ୧୨୬ କୋଟି ଟଙ୍କା ରାଜ୍ୟ ସରକାର ଖର୍ଚ୍ଚ କରିବେ। ସେହିଭଳି ସରକାରୀ କଲେଜଗୁଡ଼ିକ ପାଇଁ ୩ ରିକ୍ରୁଟ୍ମେଣ୍ଟ ନିୟମ ଅନୁମୋଦିତ ହୋଇଛି। ଫଳରେ ଲାଇବ୍ରେରିଆନ୍, କିରାଣି ଆଦି ପଦ ପୂରଣ ହୋଇପାରିବ।
