ଭୁବନେଶ୍ୱର,୭।୧୨: ସୀମାଶୁଳ୍କ ଆୟୋଗ ଭୁବନେଶ୍ୱର ପକ୍ଷରୁ କଷ୍ଟମ୍ସ ଆକ୍ଟ ବା ସୀମାଶୁଳ୍କ ଅଧିନିୟମ-୧୯୬୨ର ୬୦ତମ ବାର୍ଷିକ ଉତ୍ସବ ସୋମବାର ସ୍ଥାନୀୟ ଚନ୍ଦ୍ରଶେଖରପୁରସ୍ଥିତ ଇନ୍ଷ୍ଟିଚ୍ୟୁଟ୍ ଅଫ୍ ଲାଇଫ୍ ସାଇନ୍ସେସ୍ ଅଡିଟୋରିୟମରେ ପାଳିତ ହୋଇଯାଇଛି। ଏହି ଅବସରରେ ପୂର୍ବତଟ ରେଳପଥର ଜିଏମ ରୂପ୍ ନାରାୟଣ ସୁନ୍କର ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଚିଫ୍ ପୋଷ୍ଟ ମାଷ୍ଟର ଜେନେରାଲ ଭୁବନେଶ୍ୱର ଶୁଭେନ୍ଦୁ କୁମାର ସ୍ବାଇଁ, କଟକ-ଭୁବନେଶ୍ୱର ପୋଲିସ କମିଶନର ଏସ୍. କେ. ପ୍ରିୟଦର୍ଶୀ ପ୍ରମୁଖ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ଏ ସମ୍ପର୍କରେ ସୀମାଶୁଳ୍କ ବିଭାଗ ଭୁବନେଶ୍ୱରର କମିଶନର୍ ମାଧବ ମିଶ୍ର, ସୀମାଶୁଳ୍କ ଅଧିନିୟମ-୧୯୬୨ର ୬୦ବର୍ଷ ପୂର୍ତ୍ତି ଅବସରରେ ଶୁଭେଚ୍ଛା ଜଣାଇବା ସହ ସମଗ୍ର ଇକୋସିଷ୍ଟମର ହିତାଧିକାରୀଙ୍କ ମଧ୍ୟରେ ପରିବ୍ୟାପ୍ତ ବିଶ୍ୱ ବାଣିଜ୍ୟ ସଂଗଠନ (ଡବ୍ଲ୍ୟୁଟିଓ)ର ନିର୍ଦ୍ଦେଶାବଳୀ ଅନୁଯାୟୀ ସହଜ ବ୍ୟବସାୟ ଓ କାରବାର ସୁବିଧା ଏବଂ ଅନ୍ତର୍ଜାତୀୟ ସମ୍ପର୍କକୁ ମଜଭୁତ କରିବା ପାଇଁ ବିଭାଗ ପକ୍ଷରୁ ଗ୍ରହଣ କରାଯାଇଥିବା ବିଭିନ୍ନ ପଦକ୍ଷେପ ଉପରେ ବିସ୍ତୃତ ସୂଚନା ପ୍ରଦାନ କରିଥିଲେ। ଏହି ପରିପ୍ରେକ୍ଷୀରେ ସେ ଅଧିକାରୀମାନଙ୍କୁ ଦ୍ୱିପାକ୍ଷିକ ବାଣିଜ୍ୟ କ୍ଷେତ୍ରରେ ନୂଆ ଆହ୍ବାନଗୁଡିକର ମୁକାବିଲା କରିବା ପାଇଁ ନିଜର ଦକ୍ଷତା ବିକାଶ କରିବା ଲାଗି ଆହ୍ବାନ କରିଛନ୍ତି। ସେହିଭଳି ଜିଏସ୍ଟି ଏବଂ କେନ୍ଦ୍ରୀୟ ଉପତ୍ାଦ ଓ ସୀମାଶୁଳ୍କ ବିଭାଗ ଭୁବନେଶ୍ୱରର ମୁଖ୍ୟ କମିଶନର୍ ବିଜୟ କୁମାର କର ଅନ୍ତର୍ଜାତୀୟ ସୀମାକୁ ସୁରକ୍ଷିତ ରଖିବାରେ ସୀମାଶୁଳ୍କର ଭୂମିକା ସମ୍ପର୍କରେ ବିସ୍ତୃତ ସୂଚନା ଦେଇଥିଲେ। ପରିଶେଷରେ ଜିଏସ୍ଟି, କେନ୍ଦ୍ରୀୟ ଉପତ୍ାଦ ଓ ସୀମାଶୁଳ୍କ ବିଭାଗ, ଭୁବନେଶ୍ୱର ଅତିରିକ୍ତ କମିଶନର ଗୋପାଳକୃଷ୍ଣ ପତି ଧନ୍ୟବାଦ ଅଭିଭାଷଣ ପ୍ରଦାନ କରିଥିଲେ।
