ସୋନପୁର,୧୧।୧୦(ନି.ପ୍ର): ସୁବର୍ଣ୍ଣପୁର ଜିଲା କୈବର୍ତ୍ତ ସମାଜ ପକ୍ଷରୁ କାର୍ତ୍ତିକ କୃଷ୍ଣପକ୍ଷ ପ୍ରତିପଦା ଅବସରରେ ଇଷ୍ଟଦେବୀ ମା’ ମାଣିକେଶ୍ୱରୀଙ୍କ ବାର୍ଷିକ ମହାପୂଜା ସୋମବାର ଅନୁଷ୍ଠିତ ହୋଇଯାଇଛି। ଏହି ଅବସରରେ ଏକ ଜୁଗାର ଯାତ୍ରା ଆୟୋଜିତ ହୋଇଥିଲା। ଶତାଧିକ ମହିଳା ଓ ପୁରୁଷ ଏଥିରେ ଅଂଶଗ୍ରହଣ କରିଥିଲେ। ରାଜା ରାଜୁଡା ଅମଳରୁ ଶତାଧିକ ବର୍ଷ ଧରି ଅନୁଷ୍ଠିତ ହୋଇ ଆସୁଥିବା ଏହି ପୂଜାରେ ସୁବର୍ଣ୍ଣପୁର ଜିଲାର ୬ଗୋଟି ବ୍ଲକର ୪୦ଟି କେନ୍ଦ୍ରରୁ ଶତାଧିକ କୈବର୍ତ୍ତମାନେ ସାମିଲ ହୋଇଥିଲେ। ସକାଳେ ଘୋଡାଘାଟପଡା ସ୍ଥିତ ପୁରୋହିତଙ୍କ ବାସଭବନରୁ ମା’ଙ୍କୁ ମନ୍ଦିରକୁ ଅଣାଯାଇଥିଲା। ମଧ୍ୟାହ୍ନରେ ଜୁଗାର ଯାତ୍ରା ସହରର ଟିକିରିପଡାରୁ ବାହାରିଥିଲା। ମହିଳା ଓ ପୁରୁଷମାନେ ଭୋଗ, ଦୀପ ଓ ନୈବେଦ୍ୟ ନେଇ ଏକ ଶୋଭାଯାତ୍ରାରେ ଗୁଣ୍ଡିଚା ମନ୍ଦିର, ଦୁର୍ଗା ମଣ୍ଡପ, ବିଜୁ ପଟ୍ଟନାୟକ ଛକ, ନଳିନୀ ଛକ ଦେଇ ମାଣିକେଶ୍ୱରୀ ମନ୍ଦିରରେ ପହଞ୍ଚତ୍ଥିଲେ। ଜୁଗାର ଯାତ୍ରା ମନ୍ଦିରରେ ପହଞ୍ଚତ୍ବା ପରେ ବିଶେଷ ପୂଜା ଅନୁଷ୍ଠିତ ହୋଇଥିଲା। କୈବର୍ତ୍ତମାନେ ମା’ଙ୍କ ଆଶିର୍ବାଦ ଲାଭ କରିଥିଲେ।
ମନ୍ଦିର ପ୍ରାଙ୍ଗଣରେ କୈବର୍ତ୍ତ ସମାଜ ପକ୍ଷରୁ ଏକ ସାଧାରଣ ସଭା ଅନୁଷ୍ଠିତ ହୋଇଥିଲା। ଜିଲା କୈବର୍ତ୍ତ ସମାଜ ସଭାପତି ଦେବରାଜ ମହାଲିକ ସଭାରେ ଅଧ୍ୟକ୍ଷତା କରିଥିଲେ। କୈବର୍ତ୍ତ ସମାଜର ଅନ୍ୟତମ ପ୍ରାକ୍ତନ ସଭାପତି ଝଗୁଡୁ ନାଏକ, ଉପସଭାପତି ରାମ ଶଙ୍କର ସାହୁ, ସମ୍ପାଦକ ରବିନ୍ଦ୍ର ନାଥ ତରିଆ ଓ କୋଷାଧ୍ୟକ୍ଷ ରଘୁନାଥ ନାଏକ ସମ୍ମାନିତ ଅତିଥି ଭାବେ ଯୋଗଦେଇ ସମାଜର ଉନ୍ନତି, ପରମ୍ପରା ଓ ଭାଇଚାରା ବଜାୟ ରଖିବା ନେଇ ଗୁରୁତ୍ୱାରୋପ କରିଥିଲେ। ବଲାଙ୍ଗୀର ଏମ୍ପି ସଙ୍ଗୀତା କୁମାରୀ ସିଂହଦେଓଙ୍କ ଅନୁପସ୍ଥିତିରେ ଏମ୍ପିଙ୍କ ନୋମିନି ଶରତ କୁମାର ଶତପଥୀ ସଭାରେ ଯୋଗଦେଇ ମାଣିକେଶ୍ୱରୀ ମନ୍ଦିରର ଉନ୍ନତି ପାଇଁ ବଲାଙ୍ଗୀର ଏମ୍ପି ତାଙ୍କ ଲ୍ୟାଡ୍ରୁ ୧୦ଲକ୍ଷ ପ୍ରଦାନ କରିବାକୁ ସମ୍ମତି ପ୍ରକାଶ କରିଥିବା କହିଥିଲେ । ଗଙ୍ଗାଧର ତରିଆ ସଭା ପରିଚାଳନା କରିଥିଲେ। କୈବର୍ତ୍ତ ସମାଜର ସଭାପତି ଦେବରାଜ ମହାଲିକଙ୍କ କହିବା ଅନୁଯାୟୀ ପୂର୍ବରୁ ସଡକ ପଥର ସେତେଟା ବିକାଶ ହୋଇ ନଥିଲା। କୈବର୍ତ୍ତମାନେ ମହାଜନଙ୍କ ସାମଗ୍ରୀ ସବୁ ଡଙ୍ଗାରେ ନେଇ ଦୂରଦୂରାନ୍ତକୁ ଯାଉଥିଲେ। ଡଙ୍ଗା ଦ୍ୱାରା ଜଳପଥରେ ଓଡିଶାର ବିଭିନ୍ନ ସ୍ଥାନକୁ ଜିନିଷପତ୍ର ପରିବହନ ହେଉଥିଲା। ଶତାଧିକ ବର୍ଷ ପୂର୍ବରୁ ସୋନପୁରର କୈବର୍ତ୍ତମାନେ ଡଙ୍ଗାନେଇ କଳାହାଣ୍ଡି ଯାଇଥିଲେ। ବେପାର ବାଣିଜ୍ୟ ସାରି ଫେରିବା ସମୟରେ କଳାହାଣ୍ଡିର ଇଷ୍ଟଦେବୀ ମା’ ମାଣିକେଶ୍ୱରୀ ନାରୀ ବେଶରେ ଡଙ୍ଗାରେ ବସି ସୋନପୁର ଚାଲି ଆସିଥିଲେ। ମାଁ ଏ ସମ୍ପର୍କରେ ରାଜାଙ୍କୁ ସ୍ବପ୍ନାଦେଶ ହେବା ପରେ ରାଜା ଏକ ମନ୍ଦିର ନିର୍ମାଣ କରି ପୂଜା ପାଇଁ ସମସ୍ତ ବ୍ୟବସ୍ଥା କରିଥିଲେ। ସେହିଦିନଠାରୁ କୈବର୍ତ୍ତ ସମାଜ ମାଣିକେଶ୍ୱରୀଙ୍କୁ ଇଷ୍ଟଦେବୀ ଭାବେ ପୂଜା କରିଆସୁଛି। କୈବର୍ତ୍ତ ସମାଜର ମାର୍କଣ୍ଡ ତରିଆ, କାର୍ତ୍ତିକ ମହାଲିକ, ଗୋପିନାଥ ମହାଲିକ, ସୂର୍ଯ୍ୟ ବଢେଇ, କାର୍ତ୍ତିକ ମହାଲିକ, କଲେନେ ମହାଲିକ ଓ ଭାଗିରଥୀ ପାଣ୍ଡେ ପ୍ରମୁଖ କାର୍ଯ୍ୟକ୍ରମରେ ସହଯୋଗ କରିଥିଲେ। ମା’ଙ୍କ ପୂଜା ପାଇଁ ସୋମବାର ଜିଲାର କୈବର୍ତ୍ତମାନେ ନଦୀରୁ ମାଛ ମାରି ନ ଥିଲେ ।