ନୂଆଦିଲ୍ଲୀ, ୬ା୯: ଓଡ଼ିଶା ହାଇକୋର୍ଟରେ ମାମଲାଗୁଡ଼ିକର ସ୍ବତଃ ତାଲିକାଭୁକ୍ତ(ଅଟୋ ଲିଷ୍ଟିଂ) ପଦ୍ଧତି ଆପଣାଇବାକୁ ସୁପ୍ରିମକୋର୍ଟ ସୋମବାର ପ୍ରସ୍ତାବ ଦେଇଛନ୍ତି। ବିଚାରପତି ଏମ୍.ଆର୍. ଶାହା ଏବଂ କ୍ରିଷ୍ଣା ମୁରାରୀଙ୍କୁ ନେଇ ଗଠିତ ଖଣ୍ଡପୀଠ ହାଇକୋର୍ଟ ମୁଖ୍ୟ ବିଚାରପତିଙ୍କୁ ମାମଲାର ତାଲିକା(ଲିଷ୍ଟିଂ) ବ୍ୟବସ୍ଥାକୁ ତ୍ୱରିତ ଭିତ୍ତିରେ ଗ୍ରହଣ କରିବାକୁ ପ୍ରସ୍ତାବ ଦେଇଛନ୍ତି। ଏପରି କି କୌଣସି ଏକ ମାମଲା ରୁଜୁ ହେବା ପରେ ତାହା ଯେପରି ୭ ରୁ ୧୦ଦିନ ମଧ୍ୟରେ ସ୍ବତଃଭାବେ ଉପଯୁକ୍ତ କୋର୍ଟ ନିକଟରେ ତାଲିକାଭୁକ୍ତ ହୋଇପାରିବ ସେନେଇ ଅଟୋ ଲିଷ୍ଟିଂ ବ୍ୟବସ୍ଥାକୁ ଆପଣାଇବାକୁ ଖଣ୍ଡପୀଠ କହିଛନ୍ତି।
ଆବେଦନକାରୀ ସୌରଭ ଶେଖର ବେହେରା ତାଙ୍କ ମାମଲାର ଅଗ୍ରଗତି ସମ୍ପର୍କରେ ପ୍ରତି ସପ୍ତାହରେ ତାଲିକାଭୁକ୍ତ କରିବାକୁ ହାଇକୋର୍ଟଙ୍କୁ ନିର୍ଦ୍ଦେଶ ଦେବାକୁ ସର୍ବୋଚ୍ଚ ଅଦାଲତଙ୍କ ନିକଟରେ ପ୍ରାର୍ଥନା କରିଥିଲେ। ଉକ୍ତ ଆବେଦନର ଶୁଣାଣି ସମୟରେ ସର୍ବୋଚ୍ଚ ଅଦାଲତ ଜାଣିବାକୁ ପାଇଥିଲେ ଯେ, ଆବେଦନକାରୀ ହାଇକୋର୍ଟଙ୍କ ନିକଟରେ ଏକ ରିଟ୍ ପିଟିଶନ ଦାଖଲ କରିଛନ୍ତି ଏବଂ ତାହା ଦୀର୍ଘଦିନ ହେବ ବିଚାର ଅପେକ୍ଷାରେ ରହିଥିବାବେଳେ ଶୁଣାଣି ନିମନ୍ତେ ତାଲିକାଭୁକ୍ତ ହେଉ ନ ଥିଲା। ହାଇକୋର୍ଟରେ ଆବେଦନ କରାଯାଉଥିବା ପ୍ରତ୍ୟେକ ଆବେଦନର ଏକ ନିର୍ଦ୍ଦିଷ୍ଟ ସମୟ ମଧ୍ୟରେ ତାଲିକାଭୁକ୍ତ କରାଯିବା ଆବଶ୍ୟକ ବୋଲି ଖଣ୍ଡପୀଠ କହିଛନ୍ତି। ଆବେଦନକାରୀଙ୍କ ଆବେଦନର ଏକ କିତା ନକଲ ଓଡ଼ିଶା ହାଇକୋର୍ଟ ରେଜିଷ୍ଟ୍ରାର ଜେନେରାଲଙ୍କ ନିକଟକୁ ପଠାଇବା ସହ ଉକ୍ତ ଆବେଦନକୁ ମୁଖ୍ୟ ବିଚାରପତିଙ୍କ ନିକଟରେ ଶୁଣାଣି କରିବାକୁ ଖଣ୍ଡପୀଠ କହିଛନ୍ତି। ଏଥିସହିତ ମାମଲାକୁ କିପରି ତ୍ୱରିତଭାବେ ତାଲିକାଭୁକ୍ତ କରାଯାଇପାରିବ ସେନେଇ ମୁଖ୍ୟ ବିଚାରପତି ଧ୍ୟାନଦେବାକୁ କହିଛନ୍ତି।
