ନୂଆଦିଲ୍ଲୀ/ଜେନେଭା,୨୩।୪: ସର୍ବାଧିକ ବିପର୍ଯ୍ୟୟ ପ୍ରଭାବିତ ଅଞ୍ଚଳ ସମ୍ପର୍କରେ ମିଳିତ ଜାତିସଂଘ (ଜାତିସଂଘ) ରିପୋର୍ଟ ପ୍ରକାଶ ପାଇଛି। ଏହି ଅନୁଯାୟୀ, ୨୦୨୩ରେ ପାଗ, ଜଳବାୟୁ ଏବଂ ଜଳ ସମ୍ବନ୍ଧୀୟ ବିପଦ କାରଣରୁ ଏସିଆ ପୃଥିବୀର ସବୁଠାରୁ ବିପର୍ଯ୍ୟୟ ପ୍ରଭାବିତ ଅଞ୍ଚଳ ମଧ୍ୟରୁ ଅନ୍ୟତମ।
ଭାରତ ସମେତ ଏସିଆର ଅନେକ ଦେଶ ମଧ୍ୟ ଉତ୍ତାପ ତରଙ୍ଗ ଦ୍ୱାରା ପ୍ରଭାବିତ ହୋଇଥିଲେ। ଜାତିସଂଘ ଏଜେନ୍ସି ୱାଲର୍ଡ ମେଟେରୋଲୋଜିକାଲ ଅର୍ଗାନାଇଜେସନ (ଡବ୍ଲୁଏମଓ) ଦ୍ୱାରା ମଙ୍ଗଳବାର ପ୍ରକାଶିତ ରିପୋର୍ଟ ଅନୁଯାୟୀ ବନ୍ୟା ଓ ଝଡ଼ ଯୋଗୁ ଏସିଆରେ ସର୍ବାଧିକ ମୃତ୍ୟୁ ହୋଇଛି। ଏହାଦ୍ୱାରା ଅର୍ଥନୈତିକ କ୍ଷତି ହୋଇଛି। ଏଠାରେ ଉତ୍ତାପ ତରଙ୍ଗ ବା ‘ଲୁ’ର ପ୍ରଭାବ ଅଧିକ ଭୟଙ୍କର ବୋଲି ଜଣାପଡିଛି।
୨୦୨୩ରେ ଏସିଆରେ ୮୦ ପ୍ରତିଶତରୁ ଅଧିକ ବନ୍ୟା ଏବଂ ଝଡ଼ ଘଟଣା ଘଟିଥିଲା। ଷ୍ଟେଟ ଅଫ ଦି କ୍ଲାଇମେଟ ଇନ ଏସିଆ ୨୦୨୩ ଶୀର୍ଷକ ରିପୋର୍ଟ ଅନୁଯାୟୀ, ଦୀର୍ଘ ଦିନର ଗ୍ରୀଷ୍ମ ପ୍ରବାହ ଦକ୍ଷିଣ ଏବଂ ଦକ୍ଷିଣ-ପୂର୍ବ ଏସିଆକୁ ପ୍ରଭାବିତ କରିଥିଲା। ଏପ୍ରିଲ ଏବଂ ଜୁନରେ ଦେଶରେ ପ୍ରବଳ ଉତ୍ତାପ ଯୋଗୁଁ ପ୍ରାୟ ୧୧୦ ଜଣଙ୍କର ମତ୍ୟୁ ହୋଇଥିଲା।
ଗତ ବର୍ଷ ଏସିଆର ଅଧିକାଂଶ ଅଞ୍ଚଳରେ ପ୍ରବଳ ଉତ୍ତାପ ହୋଇଥିଲା। ୨୦୨୩ରେ, ତୁରାନ ନିମ୍ନଭୂମି ଅଞ୍ଚଳ (ତୁର୍କମେନିସ୍ତାନ, ଉଜବେକିସ୍ତାନ, କାଜାଖସ୍ତାନ), ହିନ୍ଦୁ କୁଶ (ଆଫଗାନିସ୍ତାନ, ପାକିସ୍ଥାନ), ଗଙ୍ଗା ଏବଂ ବ୍ରହ୍ମପୁତ୍ର ନଦୀ (ଭାରତ ଏବଂ ବାଂଲାଦେଶ) ସମେତ ଏସିଆର ଅନେକ ଅଞ୍ଚଳରେ କମ ବର୍ଷା ହୋଇଥିଲା। ଗତ ବର୍ଷ ଜୁଲାଇ ଏବଂ ଅଗଷ୍ଟ ମାସରେ ପ୍ରବଳ ମୌସୁମୀ ବର୍ଷା ଯୋଗୁଁ ଭାରତରେ ମଧ୍ୟ ଭୂସ୍ଖଳନ ଘଟିଥିଲା।
