ଯାଜପୁର ଟାଉନ,୧୯ା୩(ଡି.ଏନ.ଏ.): ୩ ବର୍ଷ ବ୍ୟବଧାନ ପରେ ଯାଜପୁର ଦଶାଶ୍ୱମେଧଘାଟଠାରେ ବାରୁଣୀ ଯୋଗରେ ରବିବାର ଶ୍ରଦ୍ଧାଳୁମାନେ ବୁଡ଼ ପକାଇଛନ୍ତି। ପୂର୍ବରୁ କରୋନା ପାଇଁ ୩ ବର୍ଷ ବାରୁଣୀ ବୁଡ଼କୁ ପ୍ରଶାସନ ବାରଣ କରିଥିଲା। ଫଳରେ ଶ୍ରଦ୍ଧାଳୁ ବାରୁଣୀ ସ୍ନାନ ଯୋଗ ସମୟରେ ବୁଡ଼ ପକାଇ ପାରୁ ନ ଥିଲେ। ବାରୁଣୀ ସ୍ନାନ ଭିଡ଼଼କୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଥିଲା। ଯାଜପୁରର ବୈତରଣୀ ନଦୀ କୂଳରେ ଅବସ୍ଥିତ ଦଶ୍ୱାଶମେଧ ଘାଟ ଦେଶର ଅନ୍ୟତମ ତୀର୍ଥସ୍ଥଳୀ ଭାବେ ପ୍ରସିଦ୍ଧ। ଚଳିତ ବର୍ଷ ମହାଯୋଗ ନ ଥିଲେ ମଧ୍ୟ ବିଗତ ୩ ବର୍ଷକାଳ ଏହା ବନ୍ଦ ଥିବା ହେତୁ ବହୁ ଶ୍ରଦ୍ଧାଳୁଙ୍କ ଭିଡ଼ ଜମିଥିଲା।
ବିରଜା ପଞ୍ଜିକା ଅନୁଯାୟୀ, ଚୈତ୍ରମାସ ତ୍ରୟୋଦଶ ତିଥିରେ ଶତଭିଷା ନକ୍ଷେତ୍ରରେ ପ୍ରାତ ୩ଟା ୩୩ରୁ ମଧ୍ୟାହ୍ନ ପର୍ଯ୍ୟନ୍ତ ଓ ଜଗନ୍ନାଥ ପଞ୍ଜିକାରେ ପ୍ରାତ ୮ଟା୨୦ରୁ ରାତ୍ର ୮ଘଟିକା ପର୍ଟ୍ୟନ୍ତ ଏଠାରେ ସ୍ନାନ ଯୋଗଥିଲା। ଯାଜପୁର ପୌରପାଳିକା ପକ୍ଷରୁ ବସ୍ତ୍ର ପରିଧାନ କକ୍ଷ, ନିୟନ୍ତ୍ରଣ କକ୍ଷ, ଆଶୁଚିକିତ୍ସା କେନ୍ଦ୍ର, ଅଗ୍ନିଶମ ବାହିନୀ, ସ୍ବତନ୍ତ୍ର ଡାକ୍ତର, ଅସ୍ଥାୟୀ ଶୌଚାଳୟ ସମେତ ଦଶାଶ୍ୱମେଧ ଘାଟକୁ ଆଲୋକ ସଜ୍ଜାରେ ସଜ୍ଜିତ କରାଯାଇଥିଲା। ପୋଲିସ ପକ୍ଷରୁ ଶାନ୍ତି ଶୃଙ୍ଖଳା ରକ୍ଷା ପାଇଁ ବ୍ୟାପକ ବ୍ୟବସ୍ଥା କରାଯାଇଥିଲା। ଅନେକ ସ୍ବଚ୍ଛାସେବୀ ସଂଗଠନ, ସ୍କୁଲ ଏବଂ କଲେଜ ପିଲା ପାନୀୟ ଜଳ ବିତରଣ ଏବଂ ପରିବେଶ ସ୍ବଚ୍ଛତା କାର୍ଯ୍ୟକ୍ରମରେ ନିୟୋଜିତ ହୋଇଥିଲେ।
ଦଶ୍ୱାସମେଧ ଘାଟଠାରେ ପ୍ରଥମେ ଜଜ୍ଞାଧିବାସ, ବୈତରଣୀ ଆଳତୀ, ଧର୍ମସଭା, ଭଜନ ସମାରୋହ, ସୂର୍ଯ୍ୟ ପୂଜା ଓ ଭଜନ ସମାରୋହ କାର୍ଯ୍ୟକ୍ରମ କରାଯାଇଥିଲା। ଓଡ଼ିଶାର ପ୍ରାୟ ସମସ୍ତ ଜିଲାରୁ ହଜାରହଜାର ଶ୍ରଦ୍ଧାଳୁ ବୈତରଣୀ ନଦୀରେ ସ୍ନାନ କରିବା ସହ ପୂର୍ବପୁରୁଷକୁ ପିଣ୍ଡଦାନ କରିଥିଲେ। ବାରୁଣୀ ତୀର୍ଥକୁ ଶୃଙ୍ଖଳିତ କରିବା ପାଇଁ ଜିଲା ପ୍ରଶାସନର ଅଧିକାରୀ, ପୌରପାଳିକାର ପୂର୍ବତନ ଅଧ୍ୟକ୍ଷ ଭବପ୍ରସାଦ ଦାସ, ପୌରପାଳିକା ଅଧ୍ୟକ୍ଷା ରଞ୍ଜୁଲତା ହୋତା, ଉପାଧ୍ୟକ୍ଷ ସନ୍ତୋଷ କୁମାର ମଲ୍ଲିକ ଓ କାଉସିଲରମାନେ ଉପସ୍ଥିତ ରହି ସମସ୍ତ କାର୍ଯ୍ୟକୁ ତଦାରଖ କରିଥିଲେ।
