ନୂଆଦିଲ୍ଲୀ,୧୯।୧୨: ଅରୁଣାଚଳ ପ୍ରଦେଶର ତଓ୍ବାଙ୍ଗରେ ଚାଇନା ସୈନିକ ଏବଂ ଭାରତୀୟ ଯବାନଙ୍କ ମଧ୍ୟରେ ହୋଇଥିବା ସଂଘର୍ଷକୁ ନେଇ ବିରୋଧୀ ଦଳ କେନ୍ଦ୍ର ସରକାରଙ୍କୁ ଟାର୍ଗେଟ କରୁଛନ୍ତି। ଏହି ପ୍ରସଙ୍ଗରେ ରାଜନୀତି ସରଗରମ ମଧ୍ୟ ରହିଛି। ଏସବୁ ମଧ୍ୟରେ ଏଆଇଏମ୍ଆଇଏମ୍ ସଭାପତି ଅସଦୁଦ୍ଦିନ ଓଓ୍ବାଇସି ପୁଣି ଥରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କଟାକ୍ଷ କରିଛନ୍ତି। ଗଲଓ୍ବାନ ସମୟରେ ମଧ୍ୟ ନା କେହି ଅନୁପ୍ରବେଶ କରିଛନ୍ତି ନା କରିବେ ବୋଲି ପ୍ରଧାନମନ୍ତ୍ରୀ କହିଥିଲେ। ସେ ଏପରି କହି ଦେଶବାସୀଙ୍କୁ ଭ୍ରମିତ କରିଥିଲେ। ଘଟଣା ଡିସେମ୍ବର ୯ରେ ହୋଇଥିଲା। ହେଲେ ସରକାର ଡିସେମ୍ବର ୧୨ରେ ସଂସଦରେ ଏକ ବିବୃତ୍ତି ଦେଇଥିଲେ ବୋଲି ସେ ଅଭିଯୋଗ କରିଛନ୍ତି।
ସେହିଭଳି ଚାଇନା ସୈନିକଙ୍କ ସହ ସଂଘର୍ଷ ପ୍ରସଙ୍ଗରେ ଓଓ୍ବାଇସି କହିଛନ୍ତି, ଏଲ୍ଏସିରେ ଚାଇନା ଏକ ଗ୍ରାମ ନିର୍ମାଣ କରୁଛି। ଡିପସଙ୍ଗରେ ଚାଇନା ସେନା ଅଛି। ଉପଗ୍ରହ ଚିତ୍ରରୁ ଏହା ସ୍ପଷ୍ଟ। କହିବାକୁ ଗଲେ ଭାରତୀୟ ସେନା ଶକ୍ତିଶାଳୀ, କିନ୍ତୁ ସରକାର ଦୁର୍ବଳ। ଚାଇନା ପ୍ରସଙ୍ଗରେ ସରକାର ସବୁକିଛି ଲୁଚାଉଛନ୍ତି। ଚାଇନା ସରକାର ଏକ ବଫର୍ ଜୋନ୍ ସୃଷ୍ଟି କରିଛନ୍ତି, ଏହି କାରଣରୁ ଆମ ସେନା ପାଟ୍ରୋଲିଂ କରିପାରୁନାହାନ୍ତି। ଚାଇନା ସମ୍ବନ୍ଧରେ ଏକ ସର୍ବଦଳୀୟ ବୈଠକ ହେବା ଉଚିତ। କାରଣ ସେ ଆମଠାରୁ ଜମି ଛଡ଼ାଇ ନେଉଛି। ସରକାର ମିଛ କହୁଛନ୍ତି। ସଂସଦରେ ସେନେଇ ଆଲୋଚନା ହେବା ଉଚିତ। ହେଲେ ସରକାର ଆଲୋଚନାରୁ ଦୂରେଇ ଯାଉଛନ୍ତି। ଏବେ ୫୬ ଇଞ୍ଚ ଛାତି ଏବେ କେଉଁଠି? ସରକାର ଏହାକୁ ଗୁରୁତର ସହକାରେ ନେଇ ନିଜର ଇଚ୍ଛା ଶକ୍ତି ପ୍ରଦର୍ଶନ କରିବା ଉଚିତ ବୋଲି ସେ କହିଛନ୍ତି।
