ଭୁବନେଶ୍ୱର (ବ୍ୟୁରୋ) /ପୁରୁଣା ଭୁବନେଶ୍ୱର,୧୭।୩ (ଡି.ଏନ.ଏ.): ଶିଶୁପାଳଗଡ଼ ଇତିହାସର ନିଦର୍ଶନ। ଏହି ଅମୂଲ୍ୟ ଐତିହ୍ୟ ଦିଗରେ ପଦକ୍ଷେପ ଗ୍ରହଣ କରିବା ନିହାତି ଜରୁରୀ। ରାଜ୍ୟ ସରକାର ଶିଶୁପାଳଗଡ଼ରେ ଚାଲିଥିବା ବେଆଇନ ଜବରଦଖଲକୁ ତୁରନ୍ତ ବନ୍ଦ କରନ୍ତୁ। ସଂରକ୍ଷିତ ଶିଶୁପାଳଗଡ଼ରେ ଚାଲିଥିବା ବେଆଇନ ଖନନ ଦିଗରେ ଶୀଘ୍ର ପଦକ୍ଷେନ ନେବାକୁ ଗୁରୁବାର କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଟୁଇଟ୍ କରି ଜଣାଇଛନ୍ତି। ଗତ ଜାନୁୟାରୀ ୧୦ରେ ହାଇକୋର୍ଟ ଶିଶୁପାଳଗଡ଼ରେ ବେଆଇନ ଖନନ ସଂକ୍ରାନ୍ତ ମାମଲାର ରାୟ ପ୍ରକାଶ କରିଥିଲେ। ୬ମାସ ମଧ୍ୟରେ ରାଜ୍ୟ ସରକାର ଜବରଦଖଲ ଉଚ୍ଛେଦ ପ୍ରକ୍ରିୟା ଶେଷକରି ଶିଶୁପାଳଗଡ଼ର ଚିହ୍ନିତ ଅଞ୍ଚଳକୁ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା(ଏଏସ୍ଆଇ)କୁ ହସ୍ତାନ୍ତର କରିବେ। ଭାରତୀୟ ପ୍ରତ୍ନତତ୍ତ୍ୱ ବିଭାଗ ଅଧିକାରୀ ଓ ସ୍ଥାନୀୟ ତହସିଲଦାର ମିଳିତ ଭାବେ ଘଟଣାସ୍ଥଳ ସର୍ଭେ କରିବେ। ସେହିପରି ଶିଶୁପାଳଗଡ଼ରେ ଥିବା ସମସ୍ତ ସରକାରୀ ଜମିକୁ ଚିହ୍ନଟ କରି ପ୍ରତ୍ନତତ୍ତ୍ୱ ବିଭାଗକୁ ହସ୍ତାନ୍ତର କରିବେ। ଏହି କାମ ୯୦ଦିନ ମଧ୍ୟରେ ସାରିବାକୁ ନିର୍ଦ୍ଦେଶ ଦିଆଯାଇଥିଲା। ନିର୍ଦ୍ଦେଶ ପରେ ଜମି ଚିହ୍ନଟ ସରିଛି ସତ, କିନ୍ତୁ ଜମି ମାଫିଆ ବେଆଇନ ଭାବେ ଜବରଦଖଲ କରିବା ସହ ଖୋଳିବିଦାରି ଶିଶୁପାଳଗଡ଼କୁ ଧ୍ୱଂସ କରିଚାଲିଛନ୍ତି। ଗତ ୨୦ଦିନରୁ ଅଧିକ ହେବ ଜେସିବି ଲଗାଇ ଶିଶୁପାଳଗଡ଼କୁ ତାଡି ଚାଲିଛନ୍ତି। ଶିଶୁପାଳଗଡ଼ର ଚାରିପଟେ ଥିବା ରାମପର୍ଟକୁ ତାଡ଼ି ମାଟି ବୋହି ନେଇ ଯାଉଛନ୍ତି। ପ୍ରାଚୀନ କଳିଙ୍ଗର ରାଜଧାନୀ ଭାବେ ଦିନେ ମୁଣ୍ଡ ଟେକିଥିବା ଶିଶୁପାଳଗଡ଼ ଆଜି ନିଶ୍ଚିହ୍ନ ଦିଗରେ ଛିଡ଼ା ହୋଇଛି।
ଏକାମ୍ର ଜନଜାଗରଣ ମଞ୍ଚର ସଭାପତି ଲକ୍ଷ୍ମୀନାରାୟଣ ନାୟର ଏଏସ୍ଆଇକୁ ଚିଠି ଲେଖି ଏହି ବେଆଇନ ଖନନ କାମ ଶୀଘ୍ର ବନ୍ଦ ନ କଲେ ଶିଶୁପାଳଗଡ଼ ନିଶ୍ଚିହ୍ନ ହେବାରୁ କେହି ରୋକିପାରିବେନି ବୋଲି ଉଲ୍ଲେଖ କରିଛନ୍ତି। ଏଥିସହ ଦୋଷୀମାନଙ୍କୁ ଚିହ୍ନଟ କରି ଉଦାହରଣ ଭତ୍ତିକ କାର୍ଯ୍ୟାନୁଷ୍ଠାନ ନେବା ଆବଶ୍ୟକ ବୋଲି କହିଛନ୍ତି। ଆମ୍ସାର ଆକ୍ଟ ୨୦୧୦ ହିସାବରେ ସଂରକ୍ଷିତ କୀର୍ତ୍ତିରାଜିର ୧୦୦ ମିଟର ଦୂରରେ କୌଣସି କାମ ହୋଇପାରିବ ନାହିଁ ଓ ୨୦୦ ମିଟର ଭିତରେ କିଛି ଗୁରୁତ୍ୱପୂର୍ଣ୍ଣ ହେଲେ ଯାଇ ନବୀକରଣ ବା ପୁନଃନିର୍ମାଣ ପାଇଁ ସ୍ଥାନ ଦିଆଯିବ। କିନ୍ତୁ ଏବେ ଖନନ ହେବା ସହ ଶିଶୁପାଳଗଡ଼ର ଆଖପାଖରେ ଘର ମଧ୍ୟ ଗଢ଼ି ଉଠିଲାଣି। ଅନ୍ୟପକ୍ଷେ ଏକାମ୍ରକ୍ଷେତ୍ରର ଶୁକସାରୀ ମନ୍ଦିର ପାଖେ ଖନନ ହେବା ସମୟରେ ଅନେକ ଐତିହାସିକ ଏହାକୁ ବିରୋଧ କରିଥିଲେ। ସେହି ସମୟରେ ରାଜ୍ୟ ସରକାର ୯ଜଣ ବିଶିଷ୍ଟ ଐତିହାସିକ ଓ ପ୍ରତ୍ନତତ୍ତ୍ୱବିଦ୍ଙ୍କୁ ନେଇ ଏକ କମିଟି ଗଠନ କରିଥିଲେ। ଭୁବନେଶ୍ୱରରେ କୌଣସି ଐତିହ୍ୟ ଖନନ ହେଲେ କମିଟି ତାହାକୁ ଚିହ୍ନଟ କରିବ। କିନ୍ତୁ ଶିଶୁପାଳଗଡ଼ରେ ଐତିହ୍ୟ ଜବରଦଖଲ ସହ ବେଆଇନ ଖନନ କରି ଘର ତିଆରି ଚାଲିଥିଲେ ମଧ୍ୟ କମିଟିର ଭୂମିକା କିଛି ଜଣାପଡୁନି। ତେବେ ବର୍ତ୍ତମାନ ଏହି ବେଆଇନ ଖନନକୁ କେମିତି ବନ୍ଦ କରାଯିବ ସେ ନେଇ ବିରାଟ ବଡ଼ ପ୍ରଶ୍ନ ଉଠିଛି।
ପିସିଆର୍ ଉପସ୍ଥିତିରେ ବି ବେଆଇନ କାମ ଚାଲୁଛି
ଭୁବନେଶ୍ୱର ସର୍କଲର ଅଧୀକ୍ଷଣ ପ୍ରତ୍ନତତ୍ତ୍ୱବିଦ୍ ଦିବିସଦ ଗଡ଼ନାୟକ କହିଛନ୍ତି, ଲୋକମାନେ ଜାଗ୍ରତ ନୁହନ୍ତି। ଆମ ଐତିହ୍ୟ ପାଇଁ ଆମେମାନେ ସତର୍କ ହେବା କଥା। ଯଦି ସ୍ଥାନୀୟ ଲୋକେ ଏହାର ମୂଲ୍ୟ ବୁଝିପାରୁନାହାନ୍ତି, ତେବେ ଏହାଠାରୁ ବଡ଼ ଦୁଃଖ ଆଉକିଛି ନାହିଁ। ହାଇକୋର୍ଟଙ୍କ ରାୟ ପରେ ମୁଖ୍ୟମନ୍ତ୍ରୀଙ୍କ ଦପ୍ତର, ରାଜ୍ୟ ସଂସ୍କୃତି ମନ୍ତ୍ରୀ, ନିର୍ଦ୍ଦେଶକ, ସଚିବ ସମେତ କେନ୍ଦ୍ରକୁ ମଧ୍ୟ ଚିଠି ଲେଖାଯାଇଛି। ସେମାନେ ଏ ଦିଗରେ କାର୍ଯ୍ୟାନୁଷ୍ଠାନ ନେବାକୁ ମଧ୍ୟ କହିଛନ୍ତି। ଧଉଳି ଥାନାରେ ମାମଲା ମଧ୍ୟ ରୁଜୁ ହୋଇଛି। ପିସିଆର୍ ଗାଡ଼ି ଉପସ୍ଥିତିରେ ବି ଏହି ବେଆଇନ କାମ ସେମିତି ଚାଲିଛି। କୌଣସି କାର୍ଯ୍ୟାନୁଷ୍ଠାନ ହୋଇପାରୁନାହିଁ। ମୋତେ ଲଜ୍ଜା ଲାଗୁଛି, ମୁଁ ଓଡ଼ିଶାର ଲୋକ। ଖୁବ୍ଶୀଘ୍ର ସ୍ଥାନୀୟ ଲୋକଙ୍କ ସହ ଆଲୋଚନା କରାଗଲେ ହୁଏତ କିଛି ସମାଧାନର ବାଟ ବାହାରି ପାରିବ ବୋଲି ଆଶା।
