ପୁରୀ ଅଫିସ,୫।୩: କରୋନା ସଂକ୍ରମଣ ହ୍ରାସ ପାଇବା ପରେ ଶ୍ରୀମନ୍ଦିରରେ ସର୍ବସାଧାରଣ ଦର୍ଶନ ଚାଲିଛି। କଟକଣା କୋହଳ କରାଯାଇ ଭକ୍ତଙ୍କୁ ଦାରୁଦିଅଁଙ୍କ ଦର୍ଶନର ସୁଯୋଗ ଦିଆଯାଉଛି। ତେବେ ପ୍ରତ୍ୟେକ ରବିବାର ଶ୍ରୀମନ୍ଦିର ପରିସର ସାନିଟାଇଜ ଲାଗି ସାଧାରଣ ଦର୍ଶନ ବନ୍ଦ ରହୁଛି। ଫଳରେ ମହାପ୍ରଭୁଙ୍କ ଦର୍ଶନରୁ ଭକ୍ତଙ୍କୁ ବଞ୍ଚିତ ହେବାକୁ ପଡୁଛି। ଏହାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି। ସେହିପରି ରବିବାର ଛୁଟିଦିନ ହୋଇଥିବାରୁ ବହୁ ଭକ୍ତ ପୁରୀ ଆସି ମହାପ୍ରଭୁଙ୍କ ଦର୍ଶନ ସହ ବେଳାଭୂମି ବୁଲି ଓ ସମୁଦ୍ର ସ୍ନାନ କରି ମଜା ଉଠାଇଥାନ୍ତି। ମାତ୍ର ଉକ୍ତ ଦିନ ଦର୍ଶନ ବନ୍ଦ ରହୁଥିବାରୁ ଭକ୍ତମାନେ ନିରାଶ ହେଉଥିବାବେଳେ ହୁଣ୍ଡି ଆୟ ନାହିଁ କହିଲେ ଚଳେ। ତେଣୁ ବିଶୋଧନ ଆଳରେ ଶ୍ରୀମନ୍ଦିର ରାଜସ୍ବକୁ ଅଣଦେଖା କରାଯାଉଛି।
ସମ୍ପ୍ରତି ନୂଆ ଏସ୍ଓପି ଅନୁଯାୟୀ ଶ୍ରୀମନ୍ଦିରରେ ଦର୍ଶନ ବ୍ୟବସ୍ଥା ଚାଲିଛି। ଡବଲ ଡୋଜ୍ କୋଭିଡ୍ ଟିକା ପ୍ରମାଣପତ୍ର କିମ୍ବା ଆର୍ଟି-ପିସିଆର୍ ସାର୍ଟିଫିକେଟ ବିନା ସପ୍ତାହରେ ୬ଦିନ ଭକ୍ତଙ୍କୁ ଶ୍ରୀମନ୍ଦିରରେ ପ୍ରବେଶ ସୁଯୋଗ ମିଳୁଛି। ତେବେ ପ୍ରତ୍ୟେକ ରବିବାର ଦର୍ଶନ ବନ୍ଦ ରଖାଯାଉଛି। ଏହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ବାଲେଶ୍ୱରର ଏକ ଘରୋଇ କମ୍ପାନୀରେ କାର୍ଯ୍ୟରତ ଶଶାଙ୍କ ନାୟକ କହିଛନ୍ତି, ରବିବାର ଛୁଟିଦିନ ହୋଇଥିବାରୁ ଆମ ଭଳି ଚାକିରିଆ ଲୋକେ ପୁରୀ ଯାଇ ମହାପ୍ରଭୁଙ୍କୁ ଦର୍ଶନ କରିବାକୁ ଚାହୁଁଥିଲେ ମଧ୍ୟ ପ୍ରଶାସନର କଟକଣା ଯୋଗୁ ତାହା ସମ୍ଭବ ହୋଇପାରୁ ନାହିଁ। ଛୁଟିଦିନରେ ଶ୍ରୀମନ୍ଦିର ବନ୍ଦ ରଖାଯିବା ଯଥାର୍ଥ ନୁହେଁ। ଶଶାଙ୍କଙ୍କ ପରି ଅନେକେ ଏଭଳି ମତ ରଖିଛନ୍ତି। ଶ୍ରୀଜଗନ୍ନାଥ ଭକ୍ତ ପରିଷଦର ଆବାହକ ସୂର୍ଯ୍ୟ ନାରାୟଣ ରଥ କହିଛନ୍ତି, ପ୍ରକୃତ ଉଦ୍ଦେଶ୍ୟ ଲୁଚାଯାଉଛି। ସାନିଟାଇଜ ଉଦ୍ଦେଶ୍ୟରେ ନୁହେଁ ବରଂ ରବିବାର ଗହଳି ରୋକିବା ପାଇଁ ପ୍ରଶାସନ ଏଭଳି କଟକଣା କରିଛି। ଏହି ଆଳରେ ଭକ୍ତଙ୍କୁ ମହାପ୍ରଭୁଙ୍କ ଦର୍ଶନରୁ ବଞ୍ଚିତ କରାଯାଉଛି। ସେହିପରି ହୁଣ୍ଡି ଆୟ ହେଉଛି ଶ୍ରୀମନ୍ଦିର ପ୍ରଶାସନର ରାଜସ୍ବ ସଂଗ୍ରହର ଅନ୍ୟତମ ମାଧ୍ୟମ। ତେବେ ରବିବାର ଦର୍ଶନ ବନ୍ଦ ଯୋଗୁ ହୁଣ୍ଡି ଆୟ ସମେତ ପର୍ଯ୍ୟଟନ ଓ ହୋଟେଲ ଶିଳ୍ପ ମଧ୍ୟ ପ୍ରଭାବିତ ହେଉଛି। ତେଣୁ ରାଜସ୍ବକୁ ଅଣଦେଖା କରାଯାଉଛି ବୋଲି କୁହାଯାଇପାରେ। ସେହିପରି ଏକ ହୋଟେଲର ମାଲିକ ସୁଶାନ୍ତ ସାହୁ କହିଛନ୍ତି, ବେଳାଭୂମି ଉଠାଦୋକାନୀଙ୍କ ସମେତ ହୋଟେଲ ଶିଳ୍ପ ପ୍ରଭାବିତ ହେଉଛି। ଛୁଟି ଦିନଗୁଡ଼ିକରେ ଭଲ ବ୍ୟବସାୟ ହୋଇଥାଏ। ଏଭଳି ସ୍ଥଳେ ଶ୍ରୀମନ୍ଦିର ବନ୍ଦ ରହିଲେ ବ୍ୟବସାୟ ମାନ୍ଦା ପଡୁଛି। ଅନ୍ୟପକ୍ଷରେ ଶ୍ରୀମନ୍ଦିର ପରିସର ସାନିଟାଇଜ ପାଇଁ ୩ରୁ ୪ଘଣ୍ଟା ଲାଗିଥାଏ ବୋଲି ପୁରୀ ଅଗ୍ନିଶମ ଅଧିକାରୀ ମନୋଜ ମହାପାତ୍ର କହିଛନ୍ତି। ଏ ନେଇ ଆଇନଜୀବୀ ଚିନ୍ମୟ ଦାଶ କହିଛନ୍ତି, ଶନିବାର ରାତି କିମ୍ବା ରବିବାର ସକାଳେ ସାନିଟାଇଜ କରାଯାଇପାରିବ। ତେବେ ପ୍ରଶାସନ କାହିଁକି ଗୋଟିଏ ଦିନ ଶ୍ରଦ୍ଧାଳୁଙ୍କୁ ଦର୍ଶନରୁ ବଞ୍ଚିତ କରୁଛି ତାହା ବୁଝାପଡୁନାହିଁ।
