ଭାରତରେ କରୋନା ମହାମାରୀ ଦ୍ରୁତ ଗତିରେ ମାଡ଼ିଚାଲିଛି। ଦେଶରେ ପ୍ରତିଦିନ ୪ ଲକ୍ଷରୁ ଅଧିକ କରୋନା ଆକ୍ରାନ୍ତ ଚିହ୍ନଟ ହେଉଛନ୍ତି। ଫଳରେ ହସ୍ପିଟାଲରେ ବେଡ୍, ଅକ୍ସିଜେନ ଏବଂ ଔଷଧର ଅଭାବ ପରିଲକ୍ଷିତ ହେଉଛି। ଏହି ସମୟରେ ସ୍ବାସ୍ଥ୍ୟ ବିଶେଷଜ୍ଞମାନେ କରୋନାର ସାମାନ୍ୟ ଲକ୍ଷଣ ପ୍ରକାଶ ପାଇଲେ ହସ୍ପିଟାଲ ନ ଆସି ହୋମ୍ ଆଇସୋଲେଶନ୍ରେ ରହି ଚିକିତ୍ସିତ ହେବାକୁ ପରାମର୍ଶ ଦେଉଛନ୍ତି। ଏଥିପାଇଁ ଘରେ ରହୁଥିବା ଲୋକଙ୍କଠାରେ କିଛି ସ୍ବତନ୍ତ୍ର ଲକ୍ଷଣ ଚିହ୍ନଟ କରିବା ଜରୁରୀ ଅଟେ।
ନୂଆଦିଲ୍ଲୀସ୍ଥିତ ଏମ୍ସର ଡାକ୍ତର ରଣଦୀପ ଗୁଲେରିଆଙ୍କ କିଛି ବିଶେଷ କଥାକୁ ସ୍ବାସ୍ଥ୍ୟ ମନ୍ତ୍ରଣାଳୟ ଟୁଇଟ୍ର ପେଜ୍ରେ ଶେୟାର କରାଯାଇଛି। ଏଥିରେ ଲୋକଙ୍କୁ ନିବେଦନ କରାଯାଇଛି ଯେ, ହସ୍ପିଟାଲ ଦୌଡ଼ିବା ପରିବର୍ତ୍ତେ ପ୍ରଥମେ ରୋଗ ଚିହ୍ନଟ କର। ଆବଶ୍ୟକ ସମୟରେ ଡାକ୍ତରଖାନା ଯାଅ।
ଗୁଲେରିଆ କହିଛନ୍ତି, ଲୋକେ ପ୍ରଥମେ କରୋନାର ଲକ୍ଷଣ ବିଷୟରେ ଜାଣିବା ଦରକାର। ଯଦିଓ ଆପଣ ହୋମ୍ ଆଇସୋଲେଶନ୍ରେ ରହିଛନ୍ତି ତେବେ ନିରନ୍ତର ଭାବେ ଡାକ୍ତରଙ୍କ ସମ୍ପର୍କରେ ରୁହନ୍ତୁ। ପ୍ରତି ରାଜ୍ୟରେ ହେଲ୍ପଲାଇନ୍ ସୁବିଧା ଦିଆଯାଇଛି। ଚାହିଁଲେ ରୋଗୀଙ୍କ ସହ ସକାଳେ ଆଉ ସନ୍ଧ୍ୟାରେ କଥା ହୋଇପାରିବେ।
ସେ କହିଛନ୍ତି, ଯଦି ଆପଣଙ୍କୁ ଖୁବ୍ ଜୋର୍ରେ ଜ୍ୱର ଆସୁଥାଏ, ଛାତି ଦରଜ ହୁଏ, ନିଃଶ୍ୱାସ ନେବାରେ କଷ୍ଟହୁଏ ତେବେ ତୁରନ୍ତ ଡାକ୍ତରଙ୍କ ସହ ପରାମର୍ଶ କରନ୍ତୁ। ପରେ ହସ୍ପିଟାଲ ଆସନ୍ତୁ। ଏହି ପରିସ୍ଥିତିରେ ରୋଗୀଙ୍କୁ ଘରେ ରଖିବା ଆଦୌ ଠିକ୍ ନୁହେଁ। ଠିକ୍ ସମୟରେ ରୋଗୀଙ୍କୁ ଔଷଧ ଦେଲେ ସ୍ବାସ୍ଥ୍ୟାବସ୍ଥା ଆହୁରି ବିଗିଡ଼ିଯାଏ।
