ବେଙ୍ଗାଲୁରୁ,୨।୩: ବେଙ୍ଗାଲୁରୁ ସ୍ଥିତ ମନିଟରିଂ ଏବଂ କନ୍ସଲ୍ଟିଂ କମ୍ପାନୀ ‘ଟପ୍ମେଟ୍’ ପକ୍ଷରୁ ଚିଫ୍ ଡେଟିଂ ଅଫିସର ପଦ ପାଇଁ ନିଯୁକ୍ତି ସୁଯୋଗ ବାହାରିଛି। ତେବେ ଏହି ନିଯୁକ୍ତି କୌଣସି ସ୍ନାତକ କିମ୍ବା ସ୍ନାତକୋତ୍ତର ଡିଗ୍ରୀଧାରୀଙ୍କ ପାଇଁ ନୁହେଁ, ବରଂ ପ୍ରେମରେ ବିଫଳ ହୋଇ ବ୍ରେକ୍ଅପ୍ର ସମ୍ମୁଖୀନ ହୋଇଥିବା କିମ୍ବା ଅନ୍ଲାଇନ ଡେଟିଂରେ ଅଭିଜ୍ଞତା ଥିବା ବ୍ୟକ୍ତିଙ୍କ ପାଇଁ ଉଦ୍ଦିଷ୍ଟ। କେବଳ ସେହି ଲୋକମାନେ ଏହି ପୋଷ୍ଟ ପାଇଁ ଆବେଦନ କରିପାରିବେ, ଯେଉଁମାନେ ଜୀବନରେ ଅତି କମ୍ରେ ଥରେ ବ୍ରେକ୍ଅପ୍ ଯନ୍ତ୍ରଣା ଦେଇ ଗତି କରିଛନ୍ତି ଏବଂ ସର୍ବନିମ୍ନ ୩ ଜଣଙ୍କୁ ଡେଟ୍ କରିଛନ୍ତି।
ଟପ୍ମେଟ୍ କମ୍ପାନୀର ମାର୍କେଟିଂ ଲିଡ୍ ନିମିଶା ଚନ୍ଦା ଏକ୍ସ’ରେ ପୋଷ୍ଟ କରି ଏହି ସୂଚନା ଦେଇଛନ୍ତି। ପ୍ରେମୀଯୁଗଳଙ୍କୁ ପରାମର୍ଶ ଦେବା ପାଇଁ ‘ଟପ୍ମେଟ୍’ କମ୍ପାନୀ ଚିଫ୍ ଡେଟିଂ ଅଫିସର ପଦ ପାଇଁ ଯୋଗ୍ୟ ପ୍ରାର୍ଥୀ ଖୋଜୁଥିବା ସେ କହିଛନ୍ତି। ଅତି କମ୍ରେ ଜଣକ ସହ ବ୍ରେକ୍ଅପ୍ ଓ ୩ ଜଣକ ସହ ଡେଟିଂ ଅଭିଜ୍ଞତା ଥିବା ବ୍ୟକ୍ତି ହିଁ ଚିଫ୍ ଡେଟିଂ ଅଫିସର ପଦ ପାଇଁ ଆବେଦନ କରିପାରିବେ ବୋଲି ସେ ସ୍ପଷ୍ଟ କରିଛନ୍ତି। ଏହାକୁ ନିଶ୍ଚିତ କରିବାକୁ କମ୍ପାନୀ ପକ୍ଷରୁ ଆବେଦନକାରୀ ପ୍ରାର୍ଥୀମାନଙ୍କୁ ସେମାନଙ୍କର ପ୍ରେମ କାହାଣୀ ସମ୍ବନ୍ଧରେ ପଚରାଯିବ। ସେହିପରି ଆବେଦନକାରୀ ପ୍ରାର୍ଥୀମାନଙ୍କୁ ସମସ୍ତ ନୂତନ ଡେଟିଂ ନିୟମ ବିଷୟରେ ଅବଗତ ରହିବାକୁ ପଡ଼ିବ। ଏହି ନିଯୁକ୍ତି ସୁଯୋଗକୁ ନେଇ ନିମିଶା କରିଥିବା ପୋଷ୍ଟ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଅନେକ ୟୁଜର୍ସ ଏହି ପୋଷ୍ଟରେ ବିଭିନ୍ନ ମଜାଳିଆ କମେଣ୍ଟ କରିଛନ୍ତି।