ବଇଣ୍ଡା,୮।୧୨(ଡି.ଏନ.ଏ.): ଅନୁଗୋଳ ଜିଲା କିଶୋରନଗର ବ୍ଲକ ହଣ୍ଡପା ରେଞ୍ଜ ଚାରଖମଣ ଜଙ୍ଗଲରୁ ଚାଲିଛି କାଠ ଚୋରା ଚାଲାଣ। ଗତ ୩ ମାସ ମଧ୍ୟରେ ଚୋରା ବେପାରୀମାନେ ୭୮୦ ଗଛ କାଟି ନେଇଛନ୍ତି। ତେଣୁ ସୁରକ୍ଷା ଦିଆ ନ ଗଲେ ଏହି ୩୦ ବର୍ଷର ଗ୍ରାମ୍ୟ ଜଙ୍ଗଲକୁ ଦୁର୍ବୃତ୍ତମାନେ କାଟି ସଫା କରିଦେବେ ବୋଲି ଚାରଖମଣ ଗ୍ରାମବାସୀ ସୋମବାର ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି।
ଗ୍ରାମବାସୀ ଦର୍ଶାଇଛନ୍ତି ଯେ, ୧୯୯୦ ମସିହାରେ ଏହି ଗ୍ରାମ୍ୟ ଜଙ୍ଗଲରେ ଚାରା ରୋପଣ କରାଯାଇଥିଲା। ଗ୍ରାମବାସୀଙ୍କ ରକ୍ଷାବେକ୍ଷଣ ଯୋଗୁ ଏବେ ଗଛଗୁଡ଼ିକ ବଡ଼ ହୋଇଯିବାରୁ ଜଙ୍ଗଲ ଅଧିକ ଘଞ୍ଚ ହୋଇଯାଇଛି। ତେଣୁ କାଠ ଚୋରଙ୍କ ନଜର ଏହା ଉପରେ ପଡ଼ିଛି। ସେମାନେ ବନ ବିଭାଗର କେତେଜଣ ତଳିଆ କର୍ମଚାରୀଙ୍କୁ ହାତ କରି ନିୟମିତ ଭାବେ ମହୁଲ, ଶିଶୁ, ଶାଳ, ପିଆଶାଳ ଓ ଶାଗୁଆନ ଗଛ ମେଶିନ ମାଧ୍ୟମରେ କାଟି ଚୋରା ଚାଲାଣ କରୁଛନ୍ତି। କେତୋଟି ଦାମୀ ଗାଡ଼ିରେ ଜିଲା ବାହାରକୁ କାଠ ପଠାଯାଉଥିବା ଗ୍ରାମବାସୀ ଖବର ପାଉଛନ୍ତି। ଗତ ଅଗଷ୍ଟ ମାସରୁ ନଭେମ୍ବର ମଧ୍ୟରେ ଜଙ୍ଗଲରୁ ୭୮୦ ଗଛ କାଟି ନେଇସାରିଛନ୍ତି। ଏ ନେଇ ଡିଏଫ୍ଓଙ୍କ ନିକଟରେ ଅଭିଯୋଗ କରାଯାଇଥିଲା। ଏସ୍ସିଏଫ୍ ସାଧନା ସ୍ବାଇଁ ଘଟଣାସ୍ଥଳକୁ ଯିବା ସହ ତଦନ୍ତ କରି ଛେଣ୍ଡିପଦା ଥାନା ଅଞ୍ଚଳରୁ ୪ ଜଣ କାଠ ଚୋରଙ୍କୁ ଗିରଫ କରିଥିଲେ। କିନ୍ତୁ ଆବଶ୍ୟକ ସୁରକ୍ଷା ବ୍ୟବସ୍ଥା କରାଯାଉ ନ ଥିବାରୁ ଚୋରା ଚାଲାଣକାରୀ ପୁଣି ସକ୍ରିୟ ହୋଇ ଉଠିଛନ୍ତି। ଗ୍ରାମବାସୀ ବିରୋଧ କଲେ ସେମାନଙ୍କୁ ହତ୍ୟା ଧମକ ଦେଉଛନ୍ତି। ତେଣୁ ଜିଲାପାଳ ତୁରନ୍ତ ଏଥିପ୍ରତି ଧ୍ୟାନ ନ ଦେଲେ ଏହି ଗ୍ରାମ୍ୟ ଜଙ୍ଗଲ ପଦା ହୋଇଯିବ ବୋଲି ଗ୍ରାମବାସୀ ଅଭିଯୋଗରେ ଉଲ୍ଲେଖ କରିଛନ୍ତି। ଏ ସମ୍ପର୍କରେ ହଣ୍ଡପା ରେଞ୍ଜର ଚୈତନ୍ୟ ବେହେରା କହିଛନ୍ତି, କାଠ ଚାଲାଣରେ ସ୍ଥାନୀୟ ଅଞ୍ଚଳର କେତେଜଣ ଲୋକଙ୍କ ସମ୍ପୃକ୍ତି ରହିଛି। ବନ ବିଭାଗ ତଦନ୍ତ ଜାରି ରଖିଛି। ଖୁବ୍ଶୀଘ୍ର ଚଢ଼ାଉ କରାଯିବ ବୋଲି ରେଞ୍ଜର ପ୍ରକାଶ କରିଛନ୍ତି।
