ଓ୍ବାଶିଂଟନ,୧୭।୪: ଭାରତୀୟ ମୂଳ ବୈଜ୍ଞାନିକଙ୍କ ନେତୃତ୍ୱରେ ଆମେରିକୀୟ ଅନୁସନ୍ଧାନକାରୀଙ୍କ ଏକ ଦଳ କରୋନା ଭୂତାଣୁର ମୁକାବିଲା କରିବାରେ ଏକ ସଫଳତା ହାସଲ କରିଛନ୍ତି। ସେମାନେ ମାନବ ଜିନ୍ର ଏକ ଗୋଷ୍ଠୀ ଚିହ୍ନଟ କରିଛନ୍ତି। ଯାହା କରୋନା ସୃଷ୍ଟି କରୁଥିବା SARS-Cove-2 ଭୂତାଣୁ ସହିତ ମୁକାବିଲା କରିବାରେ ସକ୍ଷମ ବୋଲି କୁହାଯାଉଛି। ଏହି ଅଧ୍ୟୟନ କେବଳ ରୋଗର ଗମ୍ଭୀରତାକୁ ପ୍ରଭାବିତ କରୁଥିବା କାରଣଗୁଡିକ ବୁଝିବାରେ ସାହାଯ୍ୟ କରିବ ନାହିଁ ବରଂ ନୂତନ ଚିକିତ୍ସା ବିକଳ୍ପଗୁଡ଼ିକର ବିକାଶ ପାଇଁ ବାଟ ବି ଖୋଲିପାରେ।
ଆମେରିକାର ସାନଫୋର୍ଡ ବର୍ନହାଇମ ପ୍ରିବିସ ମେଡିକାଲ ଆବିଷ୍କାର ପ୍ରତିଷ୍ଠାନର ଅନୁସନ୍ଧାନକାରୀଙ୍କ ଦ୍ୱାରା କରାଯାଇଥିବା ଏହି ଅଧ୍ୟୟନ ମଲିକୁଲାର ସେଲ ପତ୍ରିକାରେ ପ୍ରକାଶ ପାଇଛି। ଅନୁଷ୍ଠାନର ପ୍ରଫେସର ତଥା ଇମ୍ୟୁନିଟି ଆଣ୍ଡ୍ ପାଥୋଜେନେସିସ ପ୍ରୋଗ୍ରାମର ନିର୍ଦ୍ଦେଶକ ସୁମିତ କେ ଚନ୍ଦା କହିଛନ୍ତି ଯେ, ଆମେ SARS-Cove-2ର ସେଲୁଲାର୍ ପ୍ରତିକ୍ରିୟାକୁ ଭଲ ଭାବରେ ବୁଝିବାକୁ ଚାହୁଁଛୁ। ଏହି ଅଧ୍ୟୟନରେ ଜୀବାଣୁ କିପରି ମାନବ କୋଷ ଉପରେ ଆକ୍ରମଣ କରେ ସେ ବିଷୟରେ ମଧ୍ୟ ଆମେ ନୂତନ ସୂଚନା ପାଇଛୁ।
ଚନ୍ଦା ଏବଂ ତାଙ୍କ ଟିମ୍ ଏମିତି ଏକ ଇଣ୍ଟରଫେରନ-ଷ୍ଟିମ୍ୟୁଲେଟେଡ୍ ଜିନ୍(ଆଇଏସ୍ଜି) ଚିହ୍ନଟ କରିଛନ୍ତି ଯାହା କରୋନା ସଂକ୍ରମଣକୁ ରୋକିବାରେ ସାହାଯ୍ୟ କରିବ। ସେ କହିଛନ୍ତି, ୬୫ ଆଇଏସ୍ଜି ସାର୍ସ କୋଭ୍-୨ ସଂକ୍ରମଣକୁ ନିୟନ୍ତ୍ରଣ କରନ୍ତି। ସେମାନଙ୍କ ମଧ୍ୟରୁ କେତେକଙ୍କର ଭୂତାଣୁ ରୋକିବାର କ୍ଷମତା ରହିଛି। ଏହି ଅଧ୍ୟୟନ ସହିତ ଜଡ଼ିତ ଅନୁସନ୍ଧାନକାରୀମାନେ ପରବର୍ତ୍ତୀ ସମୟରେ କରୋନା ପ୍ରକାରର ଜୀବବିଜ୍ଞାନକୁ ଦେଖିବେ। କରୋନାର ନୂଆ ଷ୍ଟ୍ରେନ୍ ଅଧିକ ସଂକ୍ରାମକ ହେଉଛି। ଏହି କାରଣରୁ ଟିକାକରଣକୁ ନେଇ ପ୍ରଶ୍ନ ଉଠିଛି।
