ଭୁବନେଶ୍ୱର/ନୂଆପଡ଼ା, ୨୨ା୯ (ରବିନାରାୟଣ ଜେନା/ ମକାରୁ ବେମାଲ):ନୂଆପଡ଼ାକୁ ଥରେ କି ଦୁଇଥର ନୁହେଁ, ବାରମ୍ବାର ଆସିବି। ନୂଆପଡ଼ାର ସର୍ବାଙ୍ଗୀନ ବିକାଶ ମୋର ଦାୟିତ୍ୱ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି। ନୂଆପଡ଼ା ଜିଲା ଖରିଆର ରୋଡ୍ ଏଫ୍ସିଆଇ ଗୋଦାମ ପରିସର ପଡିଆଠାରେ ରବିବାର ପୂର୍ବତନ ମନ୍ତ୍ରୀ ତଥା ବିଧାୟକ ସ୍ବର୍ଗତ ରାଜେନ୍ଦ୍ର ପ୍ରସାଦ ଢୋଲକିଆଙ୍କ ଜିଲାସ୍ତରୀୟ ଶ୍ରଦ୍ଧାଞ୍ଜଳି ସଭାରେ ମୁଖ୍ୟମନ୍ତ୍ରୀ ଯୋଗଦେଇ କହିଥିଲେ, ନୂଆପଡ଼ା ଜିଲା ଭୁବନେଶ୍ୱରରୁ ବହୁ ଦୂରରେ ଥିଲେ ମଧ୍ୟ ତାଙ୍କ ଫୋକସ୍ରେ ରହିଛି। ତେଣୁ ଜିଲାକୁ ବାରମ୍ବାର ଆସି ଏହାର ସର୍ବାଙ୍ଗୀନ ଉନ୍ନତି ପାଇଁ ସଦାସର୍ବଦା ଚେଷ୍ଟା କରିବେ।
ମୁଖ୍ୟମନ୍ତ୍ରୀ କହିଥିଲେ, ଢୋଲକିଆଙ୍କ ରାଜନୈତିକ ପ୍ରତିଦ୍ବନ୍ଦ୍ୱୀ ଥାଇପାରନ୍ତି କିନ୍ତୁ ତାଙ୍କର କେହି ରାଜନୈତିକ ଶତ୍ରୁ ନ ଥିଲେ। ତାଙ୍କ ବିୟୋଗରେ ନୂଆପଡ଼ା ତଥା ଓଡ଼ିଶା ଜଣେ ସୁଦକ୍ଷ ଦରଦୀ ରାଜନେତାଙ୍କୁ ହରାଇଲା ବୋଲି ସେ କହିଥିଲେ l ମୁଖ୍ୟମନ୍ତ୍ରୀ କହିଥିଲେ, ୨୦୧୯ରେ ଢୋଲକିଆଙ୍କୁ ରାଜ୍ୟ କ୍ୟାବିନେଟ ମନ୍ତ୍ରୀ ଦାୟିତ୍ୱ ମିଳିଥିଲା। ତାଙ୍କର ଲୋକପ୍ରିୟତା କେବଳ ନୂଆପଡ଼ା ଜିଲା ନୁହେଁ, ସାରା ରାଜ୍ୟରେ ରହିଛି। ସେ ନୂଆପଡ଼ା ଜିଲାର ବିକାଶର ବିନ୍ଧାଣୀ ଥିଲେ। ତାଙ୍କ ସହିତ ୨୦୦୭, ୨୦୧୯ ଓ ୨୦୨୪ରେ ବିଧାୟକ ଭାବରେ ମିଶି କାର୍ଯ୍ୟ କରିବାର ସୁଯୋଗ ପାଇଥିଲି ା ଶେଷରେ ସେ ଆମକୁ ଶୋକସାଗରରେ ଭସାଇ ଚାଲିଗଲେ ବୋଲି ମୁଖ୍ୟମନ୍ତ୍ରୀ କହିଥିଲେ। ସେ ଆହୁରି କହିଥିଲେ, ଢୋଲକିଆ ବୃଦ୍ଧାବୃଦ୍ଧ, ଦିବ୍ୟାଙ୍ଗ, ଗରିବ, ଅସହାୟମାନଙ୍କ ସେବା କରୁଥିଲେ ା ପିଲାମାନଙ୍କୁ କ୍ରିକେଟ ବ୍ୟାଟ, ଫୁଟ୍ବଲ, ଭଲିବଲ ଭଳି ଖେଳ ସାମଗ୍ରୀ ପ୍ରଦାନ କରୁଥିବାରୁ ଛୋଟ ପିଲାମାନେ ସ୍ନେହରେ ତାଙ୍କୁ ‘ରାଜୁ ଭାଇ’ ବୋଲି ସମ୍ବୋଧନ କରୁଥିଲେ। ଢୋଲକିଆ ୧୯୯୭ରେ ରାଜନୀତି ମଇଦାନକୁ ଓହ୍ଲାଇ ୩ଥର ଖରିଆର ରୋଡ୍ ଏନ୍ଏସି ଅଧ୍ୟକ୍ଷ ହୋଇଥିଲେ। ୨୦୦୪ରେ ସେ ସ୍ବାଧୀନ ଭାବେ ଲଢ଼ି ବିଧାୟକ ହୋଇଥିଲେ। ଏହା ପରଠାରୁ ଲଗାତର ୩ଥର ବିଜେଡି ଟିକେଟରେ ବିଜୟୀ ହୋଇ ବିଧାୟକ ହୋଇଥିଲେ। ଏହି ସଭାରେ ବିଜୁ ଜନତା ଦଳର ବହୁ ବରିଷ୍ଠ ନେତା ଯଥା ନିରଞ୍ଜନ ପୂଜାରୀ, ସ୍ନେହାଙ୍ଗିନୀ ଛୁରିଆ, ଦେବୀ ପ୍ରସାଦ ମିଶ୍ର, ଅଧିରାଜ ମୋହନ ପାଣିଗ୍ରାହୀ, କଳିକେଶ ନାରାୟଣ ସିଂଦେଓ, ଦିବ୍ୟଶଙ୍କର ମିଶ୍ର, ପ୍ରଦୀପ ଦିଶାରି, ରମେଶ ଚନ୍ଦ୍ର ମାଝି, ପୁଷ୍ପେନ୍ଦ୍ର ସିଂଦେଓ, ପ୍ରସନ୍ନ ଆଚାର୍ଯ୍ୟ, ଗୋବର୍ଦ୍ଧନ ଦାସ, ରଜନୀକାନ୍ତ ସିଂ, ଲମ୍ବୋଦର ନିଆଲ, ଡଲି ମାଝି, ଅବନୀ ରଞ୍ଜନ ଯୋଶୀ, ମନୋଜ କୁମାର ମିଶ୍ର ପ୍ରମୁଖ ଯୋଗଦେଇ ସ୍ବର୍ଗତ ଢୋଲକିଆଙ୍କ ସ୍ମୃତିଚାରଣ କରିଥିଲେ ା
ସୂଚନାଯୋଗ୍ୟ, ଏକ ସ୍ବତନ୍ତ୍ର ବିମାନ ଯୋଗେ ମୁଖ୍ୟମନ୍ତ୍ରୀ ଭୁବନେଶ୍ୱରରୁ ଆସି ଗୋତମା ଉଡାଜାହାଜ ପଡ଼ିଆରେ ପହଞ୍ଚତ୍ବା ପରେ ଜିଲାପାଳ ମଧୁସୂଦନ ଦାଶ, ଜିଲା ଆରକ୍ଷୀ ଅଧୀକ୍ଷକ ଅମୃତ ପାଲ ସିଂ, ପୂର୍ବତନ କଳାହାଣ୍ଡି ଏମ୍ପି ବସନ୍ତ କୁମାର ପଣ୍ଡା, ଭାଜପା ଜିଲା ସଭାପତି କମଲେଶ ଦୀକ୍ଷିତ ପ୍ରମୁଖ ତାଙ୍କୁ ସ୍ବାଗତ କରିଥିଲେ।
