ଲକ୍ଷ୍ନୌ,୪।୧୦ : ଉତ୍ତରପ୍ରଦେଶର ଲକ୍ଷ୍ମୀପୁର ଖେରି ଜିଲାରେ ରବିବାର ସ୍ବରାଷ୍ଟ୍ର ରାଜ୍ୟମନ୍ତ୍ରୀ ଅଜୟ କୁମାର ମିଶ୍ରାଙ୍କ ସହ ଆସିଥିବା କାର୍ ଆନ୍ଦୋଳନରତ କୃଷକଙ୍କ ଉପରେ ମାଡ଼ି ଯାଇଥିଲା। ଏହି ଦୁର୍ଘଟଣାରେ ୨ ଚାଷୀଙ୍କ ମୃତ୍ୟୁ ହେବା ପରେ ଆନ୍ଦୋଳନକାରୀମାନେ ପୋଡ଼ାଜଳା କରିଥିଲେ। ଏଥିଲାଗି କେନ୍ଦ୍ରମନ୍ତ୍ରୀଙ୍କ ପୁଅ ଆଶିଷଙ୍କ ବିରୋଧରେ ହତ୍ୟା ମାମଲା ରୁଜୁ କରାଯାଇଥିବା ବେଳେ ଦୁର୍ଘଟଣା ସମୟରେ ସେ କାର୍ରେ ଉପସ୍ଥିତ ନ ଥିବା ସଫେଇ ଦେଇଛନ୍ତି।
”ଆମେ ଯୋଗଦେବାକୁ ଯାଇଥିବା ପ୍ରୋଗ୍ରାମ ପ୍ରାୟ ୩୫ ବର୍ଷ ହେଲା ପାଳନ କରାଯାଉଛି। ଅତିଥିମାନେ ଆସିବା ପରେ ସେମାନଙ୍କୁ ସ୍ବାଗତ କରିବା ପାଇଁ ଆମେ ଦୁଇରୁ ତିନି କାର୍ ପଠାଇଥିଲୁ। ମୁଁ କାର୍ରେ ନ ଥିଲି। ମୁଁ ବାନଓ୍ବିରପୁର ଗ୍ରାମସ୍ଥିତ ମୋ ପୈତୃକ ଘରକୁ ଯାଇଥିଲି। ସେଠାରେ ଏକ କୁସ୍ତି ମ୍ୟାଚ୍ ଆୟୋଜନ ହୋଇଥିଲା। ମୁଁ ସେଠାରେ ସକାଳୁ ଇଭେଣ୍ଟ ଶେଷ ହେବା ପର୍ଯ୍ୟନ୍ତ ଥିଲି“ ବୋଲି ଆଶିଷ ମିଶ୍ରା କହିଛନ୍ତି।
ମୋ ଫର୍ଚ୍ୟୁନର ଚାଷୀଙ୍କ ଉପରେ ମାଡ଼ିଯିବା ଘଟଣାରେ ସତ୍ୟତା ନାହିଁ। ସତ କଥା ହେଲା ଆମ କର୍ମୀମାନେ ଉପ ମୁଖ୍ୟମନ୍ତ୍ରୀଙ୍କୁ ସ୍ବାଗତ କରିବାକୁ ଯାଇଥିଲେ। ସାମ୍ନାରେ ଥିବା ଏସ୍ୟୁଭି ଉପରେ ଚାଷୀମାନେ ଟେକା ମାଡ଼ କରିଥିଲେ। ଫଳରେ ଫର୍ଚ୍ୟୁନର ନିୟନ୍ତ୍ରଣ ହରାଇ ଓଲଟି ପଡ଼ିଥିଲା। ଏଥିରେ ଦୁଇ ଜଣ ଆହତ ହୋଇଥିଲେ, ପରବର୍ତ୍ତୀ ସମୟରେ ସେମାନଙ୍କ ମୃତ୍ୟୁ ହୋଇଥିଲା। ଏଭଳି କାର୍ଯ୍ୟ କରୁଥିବା ଲୋକଙ୍କୁ ଚାଷୀ କୁହାଯାଇ ପାରିବ ନାହିଁ। ଭାରତୀୟ ଚାଷୀ କଦାପି ଏତେ ନିଷ୍ଠୁର ନୁହନ୍ତି। ତେବେ ଏହି ଘଟଣା ପାଇଁ କୃଷକ ସଂଗଠନର ନେତୃତ୍ୱ ଦାୟୀ ବୋଲି ସେ କହିଛନ୍ତି।
