ନୂଆଦିଲ୍ଲୀ, ୩୧।୦୭: ସଂସଦରେ ମୌସୁମୀ ଅଧିବେଶନ ଜାରି ରହିଛି । ରାଜ୍ୟ ସଭାରେ ଆଜି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କ ଅଲଗା ରୂପ ଦେଖିବାକୁ ମିଳିଛି । ଗୃହର ବିରୋଧୀ ଦଳ ନେତା ଅଚାନକ ଭାବୁକ ହୋଇଯାଇଥିଲେ । ପରେ ପୁଣି ବର୍ଷିଥିଲେ । ଭାଜପା ନେତା ଘନଶ୍ୟାମ ତିୱାରୀ ମଙ୍ଗଳବାର ରାଜ୍ୟସଭାରେ ଖଡ଼ଗେଙ୍କୁ ଟାର୍ଗେଟ୍ କରି କହିଥିଲେ ଯେ, ସେ ପରିବାରବାଦରୁ ରାଜନୀତିକୁ ଆସିଛନ୍ତି। ଯାହାକୁ ନେଇ ଖଡ଼ଗେ ମର୍ମାହତ ହୋଇଥିବା କହିଛନ୍ତି ।
ପରିବାରବାଦ ଅଭିଯୋଗରେ ରାଜ୍ୟସଭାରେ ବିରୋଧୀ ଦଳର ନେତା ମଲ୍ଲିକାର୍ଜୁନ ଖଡ଼ଗେ କହିଛନ୍ତି ଯେ ଗତକାଲି ମୁଁ ଗୃହରେ ନଥିବା ବେଳେ ଘନଶ୍ୟାମ ତିୱାରୀ ଏକ ସମସ୍ୟା ଉଠାଇଥିଲେ। ରାଜନୀତିରେ ଏହା ମୋର ପ୍ରଥମ ପିଢ଼ି । ମୋ ବାପା ରାଜନୀତିରେ ନଥିଲେ। ମା ମଧ୍ୟ ନଥିଲେ । ବାପା ମୋତେ ବଢ଼ାଇଛନ୍ତି । ମୁଁ ତାଙ୍କ ଆଶୀର୍ବାଦ ସହିତ ଏଠାରେ ପହଞ୍ଚିଛି । ମୋର ୮୫ ବର୍ଷ ଅତୀତ ଅତିବାହିତ ହୋଇସାରିଲାଣି ।
ତେବେ ଏହାକୁ ନେଇ ରାଜ୍ୟ ସଭା ଚେୟାରମ୍ୟାନ ଜଗଦୀପ ଧନଖର କହିଛନ୍ତି ଯେ ଆପଣ ଅଧିକ ଦିନ ବଞ୍ଚିବେ । ଖଡ଼ଗେ କିନ୍ତୁ କହିଛନ୍ତି, ’ବାଚସ୍ପତି, ମୁଁ ଆଉ ଏହି ପରିବେଶରେ ବଞ୍ଚିବାକୁ ଚାହେଁ ନାହିଁ। ମୁଁ ଖରାପ ଅନୁଭବ କଲି ଯେ ତିୱାରୀ କହିଛନ୍ତି ଯେ ମୁଁ ପରିବାରବାଦରୁ ଆସିଛି । ମଲ୍ଲିକାର୍ଜୁନା ହେଉଛି ଶିବଙ୍କ ନାମ । ୧୨ ଜ୍ୟୋର୍ତିଲିଙ୍ଗ ମଧ୍ୟରୁ ଏହା ଗୋଟିଏ ନାମ । ବୁଝି ବିଚାରି ମୋ ବାପା ଏହି ନାମ ଦେଇଥିଲେ । କିନ୍ତୁ ମୁଁ ମୋ ପରିବାରରୁ ଏକାକୀ ରାଜନୀତିକୁ ଆସିଛି ।
