ମୁମ୍ବାଇ,୧୯।୪ : ଅଜିତ ପାୱାରଙ୍କ ଉପରେ କଠୋର ଆଭିମୁଖ୍ୟ ଦର୍ଶାଇ ଶିବସେନା (ଉଦ୍ଧବ ବାଲ ଠାକରେ) ନେତା ସଞ୍ଜୟ ରାଉତ ସ୍ପଷ୍ଟ କରିଛନ୍ତି ଠାକରେ ସେନା ତାଙ୍କ ଉପରେ କଡ଼ା ପଦକ୍ଷେପ ଗ୍ରହଣ କରିବା ସ୍ଥିତିରେ ଅଛନ୍ତି। ମୁଁ ସାମାନାରେ ସତ୍ୟ ଲେଖିଥିଲି, ଯେଉଁଥିପାଇଁ ଏନସିପିରେ ଭାଜପାର ଅପରେଶନ ଲୋଟସ ବିଫଳ ହୋଇଛି। ମୋ ଲେଖାର ସତ୍ୟତା ଅଜିତ ପୱାରଙ୍କୁ କାହିଁକି ଖରାପ ଲାଗୁଛି?
ଗଣମାଧ୍ୟମ ସହ କଥାବାର୍ତ୍ତା କରି ସଞ୍ଜୟ ରାଉତ କହିଛନ୍ତି, ଆଜି ଏନସିପିର ଅନେକ ନେତା କେନ୍ଦ୍ରୀୟ ଅନୁସନ୍ଧାନକାରୀ ଏଜେନ୍ସିଙ୍କ ଚାପରେ ଅଛନ୍ତି। ଏହି ଚାପ ମାଧ୍ୟମରେ ଭାଜପା ଏନସିପିକୁ ଭାଙ୍ଗିବାକୁ ଚେଷ୍ଟା କରୁଛି। ଯେତେବେଳେ ଶିବସେନା ଭାଙ୍ଗିଗଲା, ସେତେବେଳେ ଅଜିତ ପାୱାର ଏବଂ ତାଙ୍କ ଦଳ ବହୁ ପ୍ରଚାର କରିଥିଲେ କାହିଁକି? ଯେତେବେଳେ ମୁଁ ଏହା କରୁଛି ସେତେବେଳେ ଅଜିତଙ୍କୁ ଖରାପ କାହିଁକି ଲାଗୁଛି? ମୁଁ ଏମଭିଏର ଚୌକିଦାର ଏବଂ ଏଥିରେ ସାମିଲ ହୋଇଥିବା ସମସ୍ତ ଦଳଙ୍କୁ ଏକଜୁଟ କରି ରଖିବା ମୋର ଦାୟିତ୍ୱ।
ମୁଁ ସାମନାରେ ଲେଖିବି, ମୁଁ କାହାର ବାପାଙ୍କୁ ବି ଭୟ କରେ ନାହିଁ। ଅଜିତ ପାୱାରଙ୍କ ଉପରେ ସଞ୍ଜୟ ରାଉତ ମନ୍ତବ୍ୟ ଦେଇଥିଲେ। ସାମନା ଖବରକାଗଜର ସ୍ତମ୍ଭ ସେ ଲେଖିଥିଲେ, ଭାଜପା ଅଜିତ ପାୱାରଙ୍କ ସମେତ କେତେକ ଏନସିପି ନେତାଙ୍କୁ ଇଡି ଯାଞ୍ଚ ଏବଂ ଜେଲ ଯିବା ଭୟ ଧମକ ଦେଉଛି। ଜାରଣ୍ଡେଶ୍ୱର ଚିନି ମିଲର ଇଡି ଅନୁସନ୍ଧାନରେ ଦାଖଲ ହୋଇଥିବା ଚାର୍ଜଶିଟରେ ଅଜିତ ପାୱାରଙ୍କ ନାମ ନାହିଁ। ଏହା ଚାପ ପକାଯାଉଥିବା ରାଜନୀତି।
ମଙ୍ଗଳବାର ଅଜିତ ପାୱାର ସଞ୍ଜୟ ରାଉତଙ୍କ ନାମ ନ ନେଇ ପ୍ରତିକ୍ରିୟା ଦେଇ କହିଥିଲେ, ଅନ୍ୟ ଦଳର ସଦସ୍ୟ ଥିବାବେଳେ କିଛି ଲୋକ ଏନସିପିର ମୁଖପାତ୍ର ହେବାର ପ୍ରୟାସ କରୁଛନ୍ତି, ସେମାନଙ୍କୁ ନିଜ ଦଳ ବିଷୟରେ କହିବା ଆବଶ୍ୟକ। ଏନେଇ ସଞ୍ଜୟ ରାଉତ କହିଛନ୍ତି, ଅଜିତ ପାୱାର ମୋର ବିଶ୍ୱାସନୀୟତା ଉପରେ ପ୍ରଶ୍ନ ଉଠାଇ ପାରିବେ ନାହିଁ। କେବଳ ଶରଦ ପାୱାର ଏହା କରିପାରିବେ। ମୁଁ ସବୁବେଳେ ଲେଖିବି ଏବଂ ଯଦି ଏହା କାହାକୁ ଅପମାନିତ କରେ ସେଥିରେ ମୋର କିଛି ଯାଏ ଆସେ ନାହିଁ। ଅଜିତ ପାୱାର ଖରାପ ଅନୁଭବ କରୁଛନ୍ତି କାରଣ ମୁଁ ସାମନାରେ ସତ୍ୟ ଲେଖିଛି। ମୋର କିଛି ଆପତ୍ତି ନାହିଁ। ସାମନାରେ ଲେଖାଯାଇଥିବା ସବୁକିଛି ଠିକ। ମୁଁ ଲେଖି ନ ଥିଲେ , ଭାଜପାର ଅପରେଶନ ଲୋଟସ ସଫଳ ହୋଇଥାନ୍ତା।
