ଇସଲାମାବାଦ/ନୂଆଦିଲ୍ଲୀ,୧୨ା୩: ଏଥର ହୋଲି ପର୍ବ ୧୪ ମାର୍ଚ୍ଚରେ ପାଳନ କରାଯିବ। ଏହି ସମୟରେ ସାରା ଦେଶରେ ହୋଲି ପର୍ବ ପାଇଁ ପ୍ରସ୍ତୁତି ଚାଲିଛି। ଅନେକ ସମୟରେ ଭାରତର ପଡ଼ୋଶୀ ଦେଶ ପାକିସ୍ତାନରୁ ଚର୍ଚ୍ଚିତ ଖବର ଆସିଥାଏ ଯେ, ସେଠାରେ ହିନ୍ଦୁମାନଙ୍କୁ ହୋଲି ପର୍ବ ପାଳନ କରିବାରୁ ବାରଣ କରାଯାଏ ବୋଲି।
ଏହି ସମୟରେ ପାକିସ୍ତାନର ଜଣେ ହିନ୍ଦୁ ମହିଳା ହୋଲି ପାଳନ ସମ୍ପର୍କରେ ଏକ ବଡ଼ ବୟାନ ଦେଇଛନ୍ତି। ସେ କହିଛନ୍ତି ଯେ, ସରକାର ପାକିସ୍ତାନରେ ହୋଲି ପାଳନ କରିବାରୁ ଲୋକମାନଙ୍କୁ ବାଧା ଦିଅନ୍ତି ନାହିଁ।
କରାଚୀର ରତ୍ନେଶ୍ୱର ମନ୍ଦିରକୁ ଆସିଥିବା ନୀତୁ କହିଛନ୍ତି, ‘ମୁଁ ଜଣେ ହିନ୍ଦୁ ଏବଂ ପାକିସ୍ତାନରେ ରହେ। ମୁଁ ଏଠାରେ କୌଣସି ପ୍ରକାରର ସମସ୍ୟାର ସମ୍ମୁଖୀନ ହୁଏ ନାହିଁ। ମୁଁ ସମ୍ପୂର୍ଣ୍ଣ ସ୍ବାଧୀନତା ସହିତ ରହୁ, ଆମର ପର୍ବ ପାଳନ କରୁ ଏବଂ ଉପଭୋଗ କରୁ। ଏଠାକାର ସରକାର ଆମ ପାଇଁ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜନ କରନ୍ତି ଏବଂ ସୁରକ୍ଷା ମଧ୍ୟ ଯୋଗାଇ ଦିଅନ୍ତି। ଆମ ଚାରିପାଖରେ ଅନେକ ମୁସଲମାନ ରହୁଛନ୍ତି, କିନ୍ତୁ ସେମାନଙ୍କ ଯୋଗୁ ଆମେ କେବେ କୌଣସି ସମସ୍ୟାର ସମ୍ମୁଖୀନ ହେଉନାହୁଁ।’
ଏକ ରିପୋର୍ଟରୁ ପ୍ରକାଶ ଯେ, ଫେବୃଆରୀ ୨୩ରେ କରାଚୀର ଦାଉଦ ଇଞ୍ଜିନିୟରିଂ ଆଣ୍ଡ୍ ଟେକ୍ନୋଲୋଜି ବିଶ୍ୱବିଦ୍ୟାଳୟ କ୍ୟାମ୍ପସରେ ହିନ୍ଦୁ ପର୍ବ ହୋଲି ପାଳନ କରିଥିବା ଛାତ୍ରମାନଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଥିଲା। ରିପୋର୍ଟ ଅନୁସାରେ, ବିଶ୍ୱବିଦ୍ୟାଳୟ ପରିସରରେ ରାଜ୍ୟ ବିରୋଧୀ ସ୍ଲୋଗାନ ଦେବା ଅଭିଯୋଗରେ ଅନେକ ହିନ୍ଦୁ ଛାତ୍ରଙ୍କ ବିରୋଧରେ ଏଫ୍ଆଇଆର୍ ରୁଜୁ କରାଯାଇଥିଲା।
ପାକିସ୍ତାନର ଜାତୀୟ ପରିଷଦର ପୂର୍ବତନ ସଦସ୍ୟ ଲାଲ ମାଲହି ସୋସିଆଲ ମିଡିଆରେ ପାକିସ୍ତାନରେ ସଂଖ୍ୟାଲଘୁଙ୍କ ଧାର୍ମିକ ପ୍ରଥାର ବର୍ଦ୍ଧିତ ଅପରାଧୀକରଣ ଉପରେ ଚିନ୍ତା ପ୍ରକାଶ କରି ଏକ ପ୍ରଶ୍ନ ଉଠାଇବା ପରେ ଏହି ପ୍ରସଙ୍ଗ ସମସ୍ତଙ୍କ ଦୃଷ୍ଟିକୁ ଆସିଥିଲା। ମାଲହି ପଚାରିଲେ, ‘ହୋଲି ପାଳନ କରିବା କ’ଣ ଏବେ ଅପରାଧ ହୋଇଗଲାଣି? ବିଶ୍ୱବିଦ୍ୟାଳୟରେ ହୋଲି ପାଳନ କରିବା କ’ଣ ରାଜ୍ୟ ବିରୋଧୀ କାର୍ଯ୍ୟ ବୋଲି ବିବେଚନା କରାଯାଏ?’ ନୋଟିସ୍ରେ ଛାତ୍ରମାନେ ରାଜ୍ୟ ପ୍ରତି ଅପମାନଜନକ କାର୍ଯ୍ୟକଳାପରେ ଲିପ୍ତ ଥିବା ଅଭିଯୋଗ କରାଯାଇଥିଲା।
