ଲାଞ୍ଜିଗଡ,୧୬।୬(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ ବ୍ଲକ ଲାଞ୍ଜିଗଡ ଥାନା ଅନ୍ତର୍ଗତ ହରେକୃଷ୍ଣପୁର ଛକ ନିକଟରେ ହାଇୱା ସହିତ ବାଇକ ଧକ୍କା ହୋଇଛି । ଚିକିତ୍ସାଧୀନ ଅବସ୍ଥାରେ ଯୁବକଙ୍କର ମୃତ୍ୟୁ ହୋଇଛି । ମୃତକ ନର୍ଲା ଥାନା ଅନ୍ତର୍ଗତ ପାଣିମୁଣ୍ଡା ଗ୍ରାମର ଶମ୍ଭୁ ଗୌଡ଼ (୨୫) ଅଟେ ।
ସୂଚନାନୁସାରେ, ଏକ ହାଇୱା ଗାଡି ଛତ୍ରପୁର ଛକ ନିକଟରୁ ପାଉଁଶ ବୋଝେଇ କରି ରାତ୍ର ସାଢେ ୮ ଘଣ୍ଟା ସମୟରେ ବିଶ୍ୱନାଥପୁର ଆଡକୁ ଯାଉଥିଲା । ଏହି ସମୟରେ ନର୍ଲା ଥାନା ଅନ୍ତର୍ଗତ ପାଣିମୁଣ୍ଡା ଗ୍ରାମର ଶମ୍ଭୁ ଗୌଡ଼ ଲାଞ୍ଜିଗଡ ଠାରୁ ନିଜଗାଁ ପାଣିମୁଣ୍ଡା ଯାଉଥିଲା । ଲାଞ୍ଜିଗଡ ଠାରୁ ବିଶ୍ୱନାଥପୁରକୁ ସଂଯୋଗ କରୁଥିବା ମୁଖ୍ୟ ରାସ୍ତାର ହରେକୃଷ୍ଣପୁର ଛକ ନିକଟରେ ଏକ ପାଉଁଶ ବୋଝେଇ ହାଇୱାକୁ ଭାରସାମ୍ୟ ହରାଇ ହାଇୱା ସହିତ ଧକ୍କା ହୋଇ ଗୁରୁତର ହୋଇ ତଳେ ପଡ଼ିଯାଇଥିଲେ ।
ଗୁରୁତର ହୋଇ ତଳେ ପଡ଼ିଥିବା ବେଳେ ସ୍ଥାନୀୟ ଲୋକେ ଲାଞ୍ଜିଗଡ ପୋଲିସକୁ ଖବର ଦେଇଥିଲେ । ଖବରପାଇ ଲାଞ୍ଜିଗଡ ଥାନାଧିକାରୀ ଯଶବନ୍ତ ହିଆଲଙ୍କ ନେତୃତ୍ୱରେ ଏସ ଆଇ ଡୋଳାମଣି ବିଶି ପୋଲିସ ବଳ ସହିତ ଘଟଣାସ୍ଥଳକୁ ଯାଇ ଗୁରୁତର ଆହତକୁ ଲାଞ୍ଜିଗଡ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିଲେ । ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଡାକ୍ତର ଚିକିତ୍ସା ପରେ ଆହତ ଜଣକ ଅଧିକ ଗୁରୁତର ଥିବା ଦେଖି ଭବାନୀପାଟଣା ଜିଲା ମୁଖ୍ୟାଳୟ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିବା ଲାଞ୍ଜିଗଡ ବ୍ଲକ ସ୍ୱାସ୍ଥ୍ୟଧିକାରୀ ଭବାନୀ ଶଙ୍କର ଲେଙ୍କା ପ୍ରକାଶ କରିଥିଲେ । ଗୁରୁତର ଆହତକୁ ଭବାନୀପାଟଣା ସ୍ଥାନାନ୍ତରିତ ବେଳେ ବାଟରେ ମୃତ୍ୟୁ ହୋଇଥିବା ପୋଲିସ ପକ୍ଷରୁ ସୂଚନା ମିଳିଛି ।
