ଭୁବନେଶ୍ୱର, ୨୧।୧୧(କ୍ରୀଡ଼ା ପ୍ରତିନିଧି): ମିଶନ ଅଲିମ୍ପିକ୍ସ ସ୍ପୋଟର୍ସ ଫାଉଣ୍ଡେଶନ(ଏମ୍ଓଏସ୍ଏଫ୍) ଓ ଇନ୍ଜେନ୍ୟୁଟି ଆଣ୍ଡ ଇନୋଭେଶନ୍ ଗ୍ଲୋବାଲ୍ ସ୍ପୋଟର୍ସ ଏକାଡେମୀ (ଆଇଆଇଜି ସ୍ପୋଟର୍ସ ଏକାଡେମୀ) ସହଯୋଗରେ କେଟି ଗ୍ଲୋବାଲ୍ ସ୍କୁଲ୍ ପରିସରରେ ୭ ଦିନିଆ ହାଇପରଫର୍ମାନ୍ସ ଟେନିସ ଟ୍ରେନିଂ କ୍ୟାମ୍ପ ସୋମବାରଠାରୁ ଆରମ୍ଭ ହେବାକୁ ଯାଉଛି। ଏହା ୨୭ ତାରିଖ ପର୍ଯ୍ୟନ୍ତ ଚାଲିବ। ଥାଇଲାଣ୍ଡ ଇମ୍ପାକ୍ଟ ଟେନିସ୍ ଏକାଡେମୀ ନିର୍ଦ୍ଦେଶକ ଷ୍ଟିଫେନ୍ ଶୋନ୍ ୟେ କୁନ୍ଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି କ୍ୟାମ୍ପ ପରିଚାଳିତ ହେବ ବୋଲି ରବିବାର ଏଠାରେ ଆୟୋଜିତ ଏକ ଖବରଦାତା ସମ୍ମିଳନୀରେ ଆୟୋଜକଙ୍କ ପକ୍ଷରୁ ସୂଚନା ଦିଆଯାଇଛି।
ଷ୍ଟିଫେନ୍ କୁନ୍ ଖେଳ ଦୁନିଆର ଜଣେ ପ୍ରତିଷ୍ଠିତ କୋଚ୍ଭାବେ ବିଶେଷ ପରିଚିତ। ସେ ଦକ୍ଷିଣ ଆଫ୍ରିକାର କେଭିନ ଆଣ୍ଡରସନ୍, ତାଇୱାନର ଲୁ ୟେନ-ହସୁନ୍ ଏବଂ ଚୁନ୍ ହସିନ୍ ସେଙ୍ଗ, କୋରିଆର ହେୟନ ଚୁଙ୍ଗ୍, ଜର୍ଜିଆର ନିକୋଲୋଜ ବାସିଲାଶଭିଲିଙ୍କ ଭଳି ବିଶ୍ୱର ୧୦୦ ର଼୍ୟାଙ୍କ୍ ମଧ୍ୟରେ ଥିବା ତାରକା ଖେଳାଳିଙ୍କ ସହ କାମ କରିଛନ୍ତି। ଭାରତର ୟୁକି ଭାମ୍ବ୍ରି (ବିଶ୍ୱର ପୂର୍ବତନ ଜୁନିୟର ନମ୍ବର-୧), ପ୍ରଞ୍ଜଲା ୟାଡଲାପଲୀ, ରିୟା ଭାଟିଆ, ଦେବ ଜାଭିଆ, ୟୁଭାନ୍ ନନ୍ଦଲ, ଶ୍ରୁତି ଅହଲୱତ ଆଦି ଅନେକ ଭାରତୀୟ ଖେଳାଳିଙ୍କୁ ମଧ୍ୟ କୋଚିଂ ଦେଇଛନ୍ତି। ଏହା ବ୍ୟତୀତ ୫୦ରୁ ଊର୍ଦ୍ଧ୍ୱ ଆଇଟିଏଫ୍ ଟପ୍-୧୦୦ ଜୁନିୟର ଖେଳାଳି ଏବଂ ୧୨ ଟପ୍ ୧୦୦ ଏଟିପି ଓ ଡବ୍ଲ୍ୟୁଟିଏ ପେସାଦାର ଖେଳାଳିଙ୍କୁ ସେ ପ୍ରଶିକ୍ଷଣ ଦେଇଛନ୍ତି। ପ୍ରଶିକ୍ଷଣ ଶିବିରରେ ମୁଖ୍ୟତଃ ପଡ଼ିଆ ମଧ୍ୟରେ ୪ଟି ବଡ଼ ଦିଗ ବୈଷୟିକ ତ୍ରୁଟିର ସଂଶୋଧନ, କାର୍ଯ୍ୟକ୍ଷମ ଟ୍ରେନିଂ, ଉନ୍ନତ ଫୁଟ୍ଓ୍ବର୍କ ଏବଂ ଆଡ୍ଭାନ୍ସଡ୍ ଟେନିସ ସ୍ପେଶିଫିକ୍ ଡ୍ରିଲ୍ସ ଉପରେ ଫୋକସ ରହିବ। କ୍ୟାମ୍ପ ପାଇଁ ମୋଟ ୧୬ ଜଣ ଖେଳାଳିଙ୍କୁ ମନୋନୀତ କରାଯାଇଛି। ଏହି ୧୬ ଜଣଙ୍କ ମଧ୍ୟରୁ ୬ ଜଣଙ୍କର ଓଡ଼ିଶା ମାଇନିଂ କର୍ପୋରେଶନ ପ୍ରାୟୋଜକ ରହିଛି। ଖବରଦାତା ସମ୍ମିଳନୀରେ କେଟି ଗ୍ଲୋବାଲ ସ୍କୁଲ ଚେୟାରମ୍ୟାନ ସୋମଦତ୍ତ ବେହୁରା, ନିର୍ଦ୍ଦେଶକ ପୂର୍ଣ୍ଣାଶିଷ ରଥ, ମେଣ୍ଟର ଏବଂ ପରାମର୍ଶଦାତା ଅରୁଣ କୁମାର ଦାସ, ଏମ୍ଓଏସ୍ଏଫ୍ ଟ୍ରଷ୍ଟି ସନ୍ତୋଷ କୁମାର ମଲିକ ଏବଂ ସିଇଓ ତଥା ପୂର୍ବତନ ଏଟିପି ପ୍ରଫେଶନାଲ ଚିନ୍ମୟ ପ୍ରଧାନ ପ୍ରମୁଖ ଉପସ୍ଥିତ ଥିଲେ।
