ହାଇଦ୍ରାବାଦ,୨।୪: ତେଲଙ୍ଗାନାର କଂଗ୍ରେସ ସରକାର ପକ୍ଷରୁ ହାଇଦ୍ରାବାଦର କାଞ୍ଚା ଗଛିବୋୱଲି ଅଞ୍ଚଳର ୪୦୦ ଏକର ଜମିରୁ ଗଛଲତା ହଟାଇ ସଫା କରାଯାଉଛି। ସରକାରଙ୍କ ଏହି ପଦକ୍ଷେପରେ ହାଇଦ୍ରାବାଦ ବିଶ୍ୱବିଦ୍ୟାଳୟର ଛାତ୍ର ଏବଂ ପରିବେଶ କର୍ମୀମାନେ କ୍ଷୁବ୍ଧ ଅଛନ୍ତି।
ହାଇଦ୍ରାବାଦ ବିଶ୍ୱବିଦ୍ୟାଳୟ ଛାତ୍ର ସଂଘ ଏପ୍ରିଲ ୧ଠାରୁ ଅନିର୍ଦ୍ଦିଷ୍ଟ କାଳ ପାଇଁ ପ୍ରତିବାଦ ଏବଂ ଶ୍ରେଣୀ ବର୍ଜନ ଘୋଷଣା କରିଛି। ସେମାନେ ଦାବି କରୁଛନ୍ତି ଯେ, ବିଶ୍ୱବିଦ୍ୟାଳୟ କ୍ୟାମ୍ପସରୁ ପୋଲିସ ଫୋର୍ସ ଏବଂ ନିର୍ମାଣ କାର୍ଯ୍ୟରେ ନିୟୋଜିତ ମେଶିନଗୁଡ଼ିକୁ ତୁରନ୍ତ ହଟାଯାଉ। ଏହାସତ୍ତ୍ୱେ ସେଠାରେ ସଫେଇ କାର୍ଯ୍ୟକ୍ରମ ଜାରି ରହିଛି।
ପୋଲିସ ଉପସ୍ଥିତିରେ ମାର୍ଚ୍ଚ ୩୦ ଅପରାହ୍ନରୁ ‘ଜମି ସଫା’ କାର୍ଯ୍ୟ ଚାଲିଛି। ଏହାକୁ ବିରୋଧ କରିବାରୁ ୫୦ରୁ ଅଧିକ ଲୋକଙ୍କୁ ଅଟକ ରଖାଯାଇଥିଲା ଏବଂ ପରେ ଛାଡି ଦିଆଯାଇଥିଲା।
ରଙ୍ଗାରେଡ୍ଡି ଜିଲାରେ ଅବସ୍ଥିତ ଏହି ୪୦୦ ଏକର ଜମିର ପ୍ରସ୍ତାବିତ ନିଲାମରୁ ରାଜ୍ୟ ସରକାର ୧୦,୦୦୦ ରୁ ୧୫,୦୦୦ କୋଟି ଟଙ୍କା ରୋଜଗାର କରିବେ ବୋଲି ଆଶା କରାଯାଉଛି। ସରକାର ଏଠାରେ ବିଶ୍ୱସ୍ତରୀୟ ଭିତ୍ତିଭୂମି, ଆଇଟି ପାର୍କ ଏବଂ ଆଧୁନିକ ସହରୀ ଆବାସିକ କ୍ଷେତ୍ର ବିକଶିତ କରିବାକୁ ଚାହୁଁଛନ୍ତି।
ମୁଖ୍ୟମନ୍ତ୍ରୀ ରଓ୍ବେନ୍ତ ରେଡ୍ଡୀଙ୍କ କାର୍ଯ୍ୟାଳୟ ପକ୍ଷରୁ ଜାରି ଏକ ବିବୃତ୍ତିରେ, ରାଜ୍ୟ ସରକାର ଜମିର ଆଇନଗତ ମାଲିକାନା ଦାବି କରିଛନ୍ତି। ସରକାର ସ୍ପଷ୍ଟ କରିଛନ୍ତି ଯେ ଦୀର୍ଘ ଦିନ ଧରି ଚାଲିଥିବା ଆଇନଗତ ବିବାଦରେ, ଶେଷରେ ମେ ୨୦୨୪ରେ, ସୁପ୍ରିମକୋର୍ଟ ସରକାରଙ୍କ ସପକ୍ଷରେ ରାୟ ଦେଇଥିଲେ, ଯାହା ସରକାରଙ୍କ ଉପରେ ପୂର୍ଣ୍ଣ ଅଧିକାର ଦେଇଥିଲା।
ରାଜ୍ୟ ସରକାର ଦାବି କରିଛନ୍ତି ଯେ,୨୦୦୪ରେ, ଏହି ଜମି କ୍ରୀଡା ଭିତ୍ତିଭୂମି ବିକାଶ ପାଇଁ ଏକ ଘରୋଇ କମ୍ପାନୀ, IMG ଏକାଡେମୀ ଭାରତ ପ୍ରାଇଭେଟ ଲିମିଟେଡକୁ ଦିଆଯାଇଥିଲା। କିନ୍ତୁ ୨୦୦୬ରେ କମ୍ପାନୀ ପ୍ରକଳ୍ପ ଆରମ୍ଭ କରିବାରେ ବିଫଳ ହୋଇଥିଲା ଏବଂ ସରକାର ଆବଣ୍ଟନ ବାତିଲ କରି ଜମିକୁ ଆନ୍ଧ୍ର ପ୍ରଦେଶ ଯୁବ ଉନ୍ନତି, ପର୍ଯ୍ୟଟନ ଏବଂ ସାଂସ୍କୃତିକ ବିଭାଗକୁ ହସ୍ତାନ୍ତର କରିଥିଲେ।
IMG ଏକାଡେମୀ ୨୦୦୬ରେ ହାଇକୋର୍ଟରେ ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରିଥିଲା, ଯାହା ଫଳରେ ଏକ ଆଇନଗତ ଲଢ଼େଇ ଆରମ୍ଭ ହୋଇଥିଲା। ୭ ମାର୍ଚ୍ଚ ୨୦୨୪ରେ, ତେଲଙ୍ଗାନା ହାଇକୋର୍ଟ ସରକାରଙ୍କ ସପକ୍ଷରେ ରାୟ ଦେଇଥିଲେ ଏବଂ ଜମିଟି ସରକାରଙ୍କର ବୋଲି ନିଶ୍ଚିତ କରିଥିଲେ। IMG ଏକାଡେମୀ ହାଇକୋର୍ଟର ନିଷ୍ପତ୍ତିକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲା, କିନ୍ତୁ ମେ ୩, ୨୦୨୪ରେ ସୁପ୍ରିମକୋର୍ଟ ସେମାନଙ୍କର ଆବେଦନକୁ ଖାରଜ କରିଦେଇଥିଲେ। ସମସ୍ତ ଆଇନଗତ ପ୍ରତିବନ୍ଧକ ଦୂର ହେବା ପରେ, ସରକାର ଜମିକୁ ନିଜ ନିୟନ୍ତ୍ରଣକୁ ନେଇଥିଲେ।
ସରକାର ଆହୁରି ଦାବି କରିଛନ୍ତି ଯେ, ୧୯ ଜୁନ ୨୦୨୪ରେ ତେଲଙ୍ଗାନା ଶିଳ୍ପ ଭିତ୍ତିଭୂମି ନିଗମ (TGIIC) ଏହି ଜମିରେ IT ଏବଂ ଅନ୍ୟାନ୍ୟ ଭିତ୍ତିଭୂମି ବିକାଶ କରିବାକୁ ଯୋଜନା କରିଥିଲା ଏବଂ ସରକାରଙ୍କଠାରୁ ଅନୁମତି ମାଗିଥିଲା। ୨୪ ଜୁନ, ୨୦୨୪ରେ, ରାଜସ୍ବ ବିଭାଗର ପ୍ରମୁଖ ସଚିବ ଆନୁଷ୍ଠାନିକ ଭାବରେ ଏହି ଜମିର ଅଧିକାର TGIICକୁ ହସ୍ତାନ୍ତର କରିଥିଲେ।
ସରକାର ଦାବି କରିଛନ୍ତି ଯେ, ୪ ଜୁଲାଇ, ୨୦୨୪ରେ, TGIIC ହାଇଦ୍ରାବାଦ ବିଶ୍ୱବିଦ୍ୟାଳୟ ସହିତ ଯୋଗାଯୋଗ କରି ଜମିର ସୀମା ସ୍ପଷ୍ଟ କରିବାରେ ସହାୟତା ଲୋଡ଼ିଥିଲା। ବିବାଦିତ ଜମି ବିଶ୍ୱବିଦ୍ୟାଳୟର ସମ୍ପତ୍ତି ନୁହେଁ ବୋଲି ନିଶ୍ଚିତ କରିବା ପାଇଁ ୧୯ ଜୁଲାଇ ୨୦୨୪ରେ ବିଶ୍ୱବିଦ୍ୟାଳୟ ଏବଂ ସରକାରୀ ଅଧିକାରୀଙ୍କ ଉପସ୍ଥିତିରେ ଏକ ସର୍ଭେ କରାଯାଇଥିଲା।
