ସାଉଥାମ୍ପଟନ, ୧୦ା୭ (ପି.ଟି.)-‘ବ୍ୟାଡ୍ ଲାଇଟ୍’ ନିୟମ ବର୍ଷ ବର୍ଷ ଧରି ଟେଷ୍ଟ ମ୍ୟାଚଗୁଡ଼ିକୁ ପ୍ରଭାବିତ କରିଆସୁଛି। ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଏହି ନିୟମର ପରିବର୍ତ୍ତନ କରିବା ଆବଶ୍ୟକ ବୋଲି କହିଛନ୍ତି ଇଂଲଣ୍ଡର ପୂର୍ବତନ ଅଧିନାୟକ ନାସେର ହୁସେନ। ବ୍ୟାଡ୍ ଲାଇଟ୍ ଯୋଗୁ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ଚାଲିଥିବା ପ୍ରଥମ ଟେଷ୍ଟର ପ୍ରଥମ ଦିବସରେ ମାତ୍ର ୧୭.୪ଓଭର ଖେଳ ସମ୍ଭବ ହୋଇଥିଲା। ବ୍ୟାଡ୍ଲାଇଟ୍ ଯୋଗୁ ଖେଳ ଜାରି ରଖିବା ବିପଜ୍ଜନକ କିମ୍ବା ସମ୍ଭବ ହୋଇ ନ ଥାଏ। ସେ ସମୟରେ ଖେଳକୁ ସ୍ଥଗିତ ରଖିବା ନିଷ୍ପତ୍ତି ଆଇସିସି ଅମ୍ପାୟରଙ୍କ ଉପରେ ଛାଡ଼ି ଦେଇଥାଏ। ହୁସେ ଇଂଲଣ୍ଡ ତରଫରୁ ୯୬ ଟେଷ୍ଟ ଖେଳି ୫୭୬୪ ରନ ସଂଗ୍ରହ କରିଛନ୍ତି। ସେ କହିଛନ୍ତି ଖରାପ ଆଲୋକ ପରିସ୍ଥିତି ହେଲେ ଫ୍ଲଡ୍ ଲାଇଟ୍ ବ୍ୟବସ୍ଥା କରି ଖେଳକୁ ଜାରି ରଖାଯାଇପାରନ୍ତା। ବ୍ୟାଡ୍ଲାଇଟ୍ ନିୟମକୁ ଅତୀତରେ ସମାଲୋଚନା କରାଯାଇଛି। ୨୦୧୩ ଆଶେସ ସରିଜରେ ୨୨୭ ଟାର୍ଗେଟକୁ ପିଛା କରୁଥିବାବେଳେ ହାତରେ ୫ ଉଇକେଟ ଥାଇ ବିଜୟ ପାଇଁ ଇଂଲଣ୍ଡ ୨୪ ବଲ୍ରେ ୨୧ ରନ ଆବଶ୍ୟକ କରୁଥିଲା। ମାତ୍ର ସେତେବେଳେ ବ୍ୟାଡ୍ଳାଇଟ୍ ଯୋଗୁ ଅମ୍ପାୟର ଖେଳକୁ ସ୍ଥଗିତ ରଖିଥିଲେ। ସେହିପରି ଗତବର୍ଷ ଜାନୁୟାରୀରେ ଏସ୍ଏସ୍ଜିଠାରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ମ୍ୟାଚ ଖେଳାଯାଉଥିବାବେଳେ ଖରାପ ଆଲୋକ ପାଇଁ ଅମ୍ପାୟର ଚତୁର୍ଥ ଦିବସ ଖେଳକୁ ସ୍ଥଗିତ ରଖିଥିଲେ। ସେତେବେଳେ ବ୍ୟାଡ୍ଲାଇଟ୍ ନିୟମକୁ ନେଇ ପ୍ରଶ୍ନ ଉଠିଥିଲା।
