ଜଗନ୍ନାଥପ୍ରସାଦ,୪ା୧୨(ଡି.ଏନ୍.ଏ.): ଗଞ୍ଜାମ ଜିଲା ଜଗନ୍ନାଥପ୍ରସାଦ ଥାନା ଅନ୍ତର୍ଗତ ଛାମୁଣ୍ଡା ଗ୍ରାମରେ ଶୁକ୍ରବାର ଜଣେ ବ୍ୟକ୍ତିଙ୍କ ରକ୍ତ ଜୁଡୁବୁଡୁ ମୃତଦେହ ତାଙ୍କ ଘରୁ ଜବତ କରାଯାଇଛି। ମୃତକ ହେଲେ କପିଳା ବେହେରା। ସ୍ବାମୀ ମଦ ପିଇବାକୁ ଟଙ୍କା ମାଗିବାରୁ ତାଙ୍କ ସହ ଝଗଡ଼ା ହୋଇଥିଲା, କିଛି ସମୟ ପରେ ଘରେ ତାଙ୍କ ମୃତଦେହ ପଡ଼ିଥିବା ସ୍ତ୍ରୀ ଅହଲ୍ୟା ବେହେରା ଥାନାରେ ଅଭିଯୋଗ କରିଥିଲେ। ପୋଲିସ ତାଙ୍କୁ ତଦନ୍ତ ପରିସରକୁ ଆଣି ପଚରାଉଚରା କରିଛି। ମୃତଦେହ ବ୍ୟବଚ୍ଛେଦ ପାଇଁ ପଠାଯାଇଛି।
ସୂଚନା ଅନୁଯାୟୀ, ଛାମୁଣ୍ଡା ବାରିସାହି ବସ୍ତିର କପିଳା ଓ ତାଙ୍କ ସ୍ତ୍ରୀ ଅହଲ୍ୟା ବାହାର ରାଜ୍ୟରେ ରହି ଦାଦନ ଖଟୁଥିଲେ। ଗତ ଦୁଇଦିନ ହେଲା ସେମାନେ ଘରକୁ ଫେରିଥିଲେ। ଶୁକ୍ରବାର ସକାଳେ ସ୍ବାମୀ ମଦ ପିଇବାକୁ ଟଙ୍କା ମାଗିବାରୁ ତାଙ୍କ ସହ ବଚସା ହୋଇଥିଲା। ପରେ ସେ ‘ତତେ ମାରିବି ନଚେତ ମୁଁ ମରିବି’ କହି ଘରେ ପଶି ଭିତରୁ କବାଟ ବନ୍ଦ କରିଦେବାରୁ ଅହଲ୍ୟା ବାହାରକୁ ପଳାଇଥିଲେ। କିଛି ସମୟ ପରେ ଘରକୁ ଆସିବାରେ ସ୍ବାମୀଙ୍କ ରକ୍ତ ଜୁଡୁବୁଡୁ ମୃତଦେହ ପଡିଥିବା ଦେଖିଥିଲେ ବୋଲି ଅହଲ୍ୟା ଥାନାରେ ଅଭିଯୋଗ କରିଥିଲେ। ପୋଲିସ ପହଞ୍ଚି ମୃତଦେହକୁ ଜବତ କରିବା ସହ ବିଭିନ୍ନ ଦିଗକୁ ନେଇ ତଦନ୍ତ ଆରମ୍ଭ କରିଛି। ଏ ନେଇ ନଂ. ୨୧/୨୩ରେ ଅପମୃତ୍ୟୁ ମାମଲା ରୁଜୁ ହୋଇଛି। ସୂଚନାଯୋଗ୍ୟ, ଦମ୍ପତିଙ୍କ ୪ ବର୍ଷୀୟ ପୁଅ ଜଣେ ସମ୍ପର୍କୀୟଙ୍କ ଘରେ ରହିଛି।
