ଭୁବନେଶ୍ୱର,୨୭।୪(ବ୍ୟୁରୋ): ମଞ୍ଚେଶ୍ୱର ଥାନା ରସୁଲଗଡ଼ ଅଞ୍ଚଳରେ ୨୦୧୨ରେ ଯୌତୁକ ଦାବିକରି ସ୍ତ୍ରୀଙ୍କୁ କାଠଫାଳିଆରେ ହତ୍ୟା କରିବା ଅଭିଯୋଗରେ ଜଣେ ବ୍ୟକ୍ତିଙ୍କୁ ମଙ୍ଗଳବାର ଭୁବନେଶ୍ୱର ଅତିରିକ୍ତ ଜିଲାଜଜ୍-୩ ସସ୍ମିତା ପାଢ଼ୀ ଦୋଷୀ ସାବ୍ୟସ୍ତ କରିଛନ୍ତି। ମାମଲାର ବିଚାର କରି ଜେଲରେ ଥିବା ଜଗତ୍ସିଂହପୁର ଜିଲା ବାଲିକୁଦା ଥାନା ଅଞ୍ଚଳର ଅଭିଯୁକ୍ତ ସ୍ବାମୀ ଶ୍ରୀକାନ୍ତ ପରିଡ଼ାଙ୍କୁ ଅଦାଲତ ଆଜୀବନ ଜେଲ ଦଣ୍ଡାଦେଶରେ ଦଣ୍ଡିତ କରିଛନ୍ତି। ଏଥିସହ ୧୩ହଜାର ଟଙ୍କା ଅର୍ଥଦଣ୍ଡରେ ଦଣ୍ଡିତ କରିଛନ୍ତି। ଅର୍ଥ ଅନାଦାୟ ଅଧିକ ବର୍ଷେ ଜେଲ ଦଣ୍ଡ ଭୋଗିବାକୁ କୋର୍ଟ କହିଛନ୍ତି। ଏଥିସହିତ ଓଡ଼ିଶା ଭିକ୍ଚିମ୍ କମ୍ପେନସେଶନ୍ ସ୍କିମ୍ ମାଧ୍ୟମରେ ମୃତା ଲକ୍ଷ୍ମୀପ୍ରିୟା ଜେନାଙ୍କ ନାବାଳକ ପୁଅଙ୍କୁ ସହାୟତା ରାଶି ଯୋଗାଇ ଦେବାକୁ ଅଦାଲତ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ମାମଲାରେ ଅଭିଯୁକ୍ତ ଶ୍ରୀକାନ୍ତଙ୍କ ବାପା ଧ୍ରୁବ ପରିଡ଼ା, ଭଉଣୀ ପ୍ରମିଳା ବିଶ୍ୱାଳ ଜାମିନରେ ଆସିଥିବାବେଳେ ଉଭୟଙ୍କ ଶୁଣାଣି ବାକି ରହିଛି। ପୀଡ଼ିତାଙ୍କ ପକ୍ଷରୁ ସରକାରୀ ଓକିଲ ପ୍ରଦୀପ୍ତ ମିଶ୍ର ମାମଲା ଲଢ଼ୁଛନ୍ତି।
ସୂଚନା ଅନୁଯାୟୀ, ଶ୍ରୀକାନ୍ତ ରସୁଲଗଡ଼ରେ ରହି ଫିନାଇଲ, ବ୍ଲିଚିଂ ପାଉଡର ଆଦି ବ୍ୟବସାୟ କରୁଥିଲେ। ବାଲିକୁଦା ଅଞ୍ଚଳର ଲକ୍ଷ୍ମୀପ୍ରିୟାଙ୍କୁ ସେ ୨୦୦୫ରେ ବିବାହ କରିଥିଲେ। ବିବାହ ସମୟରେ ଦାବି ମୁତାବକ ଶ୍ରୀକାନ୍ତଙ୍କୁ ୫୦ ଗ୍ରାମର ସୁନା, ୧ ଲକ୍ଷ ଟଙ୍କା ସହ ଅନ୍ୟାନ୍ୟ ସାମଗ୍ରୀ ଯୌତୁକ ଆକାରରେ ଦିଆଯାଇଥିଲା। ହେଲେ ପୁଣି ୧ ଲକ୍ଷ ଟଙ୍କା ଦାବି କରି ଲକ୍ଷ୍ମୀପ୍ରିୟାଙ୍କୁ ଶ୍ରୀକାନ୍ତ ମାଡ଼ ମାରୁଥିଲେ। ପରେ ଲକ୍ଷ୍ମୀପ୍ରିୟାଙ୍କ ଭାଇ ୧୦ ହଜାର ଟଙ୍କା ଶ୍ରୀକାନ୍ତଙ୍କୁ ଦେବା ପରେ ମଧ୍ୟ ସେ ନିର୍ଯାତନା ଦେଇ ଆସୁଥିଲେ। ଏଥିରେ ଶ୍ୱଶୁର ଧ୍ରୁବ ଓ ନଣନ୍ଦ ପ୍ରମିଳା ସହଯୋଗ କରୁଥିଲେ। ୨୦୧୨ ନଭେମ୍ବର ୭ ରାତିରେ ଶ୍ରୀକାନ୍ତ ଏକ କାଠଫାଳିଆରେ ୬ ବର୍ଷର ପୁଅ ସାମ୍ନାରେ ଲକ୍ଷ୍ମୀପ୍ରିୟାଙ୍କୁ ପ୍ରବଳ ପିଟିଥିଲେ। ଫଳରେ ଲକ୍ଷ୍ମୀପ୍ରିୟାଙ୍କ ମୃତ୍ୟୁ ହୋଇଥିଲା। ଏହାପରେ ଶ୍ରୀକାନ୍ତ ନାବାଳକ ପୁଅକୁ ଧରି ରସୁଲଗଡ ଥାନାରେ ଆତ୍ମସମର୍ପଣ କରିଥିଲେ। ଯୌତୁକ ପାଇଁ ଲକ୍ଷ୍ମୀପ୍ରିୟାଙ୍କୁ ହତ୍ୟା କରାଯାଇଥିବା କାକା ମାଗୁଣି ଜେନା ମହିଳା ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ମହିଳା ଥାନାରେ ଆଇପିସି ଦଫା ୪୯୮(ଏ), ୩୦୨, ୩୦୪(ବି) ଓ ଯୌତୁକ ନିରୋଧୀ ଆଇନର ଦଫା ୪ରେ ଏକ ମାମଲା (ନଂ.୪୫୬/୨୦୧୨) ରୁଜୁ କରି ତଦନ୍ତ ଆରମ୍ଭ କରିଥିଲା। ମାମଲାର ଶୁଣାଣି ସମୟରେ ୧୭ଜଣ ସାକ୍ଷୀଙ୍କ ବୟାନକୁ ଆଧାର କରି ଅଦାଲତ ଏହି ଦଣ୍ଡ ଶୁଣାଇଛନ୍ତି।
