ହାଇଦ୍ରାବାଦ,୨୪ା୮: ପୁଣି ଏକ ବର୍ବର ହତ୍ୟାକାଣ୍ଡ ସାମ୍ନାକୁ ଆସିଛି। ହାଇଦ୍ରାବାଦରେ ଜଣେ ୨୭ ବର୍ଷୀୟ ଟ୍ୟାକ୍ସି ଡ୍ରାଇଭର ତାଙ୍କ ୨୧ ବର୍ଷୀୟା ଗର୍ଭବତୀ ସ୍ତ୍ରୀଙ୍କୁ ହତ୍ୟା କରିବା ପରେ ମୃତଦେହକୁ ଖଣ୍ଡଖଣ୍ଡ କରି ନଦୀରେ ଫିଙ୍ଗିଦେଇଥିବା ଅଭିଯୋଗ ହୋଇଛି। ମୃତ ମହିଳା ସ୍ବାତୀ ଓରଫ ଜ୍ୟୋତିଙ୍କ ଶରୀରର କେତେ ଖଣ୍ଡ ହାଇଦ୍ରାବାଦ ମେଟ୍ରୋପଲିଟାନ ଅଞ୍ଚଳ ଅନ୍ତର୍ଗତ ମେଡିପାଲ୍ଲିସ୍ଥିତ ଡ୍ରାଇଭରଙ୍କ ଘରୁ ମିଳିଥିବାବେଳେ ଅନ୍ୟ ଖଣ୍ଡଗୁଡ଼ିକ ନଦୀରେ ଫିଙ୍ଗାଯାଇଥିବା ସ୍ଥାନୀୟ ପୋଲିସ କହିଛି। ହତ୍ୟାକାଣ୍ଡ ପଛର କାରଣ ଜଣାପଡ଼ି ନ ଥିବାବେଳେ ତଦନ୍ତ ଜାରି ରହିଛି।
ମେଡିପାଲ୍ଲୀର ବୋଡୁପାଲ ଅଞ୍ଚଳରେ ଜ୍ୟୋତି ସ୍ବାମୀ ମହେନ୍ଦର ରେଡ୍ଡୀଙ୍କ ସହ ରହୁଥିଲେ। ଶନିବାର ଅପରାହ୍ନ ୪ଟା ୩୦ ମିନିଟ୍ ସମୟରେ ଏହି ହତ୍ୟାକାଣ୍ଡ ଘଟିଛି। ପାରିବାରିକ ବିବାଦକୁ ନେଇ ଝଗଡ଼ା ପରେ ମହେନ୍ଦର ସ୍ତ୍ରୀଙ୍କୁ ତଣ୍ଟିଚିପି ହତ୍ୟା କରିଥିବା ଅଭିଯୋଗ ହୋଇଛି। ପ୍ରମାଣ ଲୁଚାଇବାକୁ ସେ ମୃତଦେହକୁ ଆରିରେ ଖଣ୍ଡଖଣ୍ଡ କରି ହାତ, ଗୋଡ଼ ଓ ମୁଣ୍ଡକୁ ମୁସି ନଦୀରେ ଫିଙ୍ଗିଦେଇଥିଲେ। ଅବଶିଷ୍ଟ ଅଙ୍ଗକୁ ମହେନ୍ଦର ନିଜ କୋଠରୀ ଭିତରେ ଏକ ଟ୍ରଙ୍କ୍ରେ ରଖିଥିଲେ ବୋଲି ପୋଲିସ କହିଛି।
ସ୍ତ୍ରୀ ନିଖୋଜ ଥିବାନେଇ ମହେନ୍ଦର ତାଙ୍କ ଭଉଣୀଙ୍କୁ କହିଥିଲେ। ଭଉଣୀ ସନ୍ଦେହ କରି ଜଣେ ସମ୍ପର୍କୀୟଙ୍କୁ ଜଣାଇବା ପରେ ଉଭୟ ଥାନାକୁ ଯାଇଥିଲେ। ବିକାରାବାଦ ଜିଲାର ମହେନ୍ଦର ଓ ଜ୍ୟୋତି ୨୦୨୪ ଜାନୁଆରୀରେ ବିବାହ କରିଥିଲେ। ଏହା ପୂର୍ବରୁ ସେମାନଙ୍କ ମଧ୍ୟରେ ପ୍ରେମ ସମ୍ପର୍କ ରହିଥିଲା। ବିବାହ ପରେ ସେମାନେ ହାଇଦ୍ରାବାଦ ଆସି ଏକ ଭଡ଼ାଘରେ ରହୁଥିଲା ବେଳେ ସେମାନଙ୍କ ମଧ୍ୟରେ ବାରମ୍ବାର ଝଗଡ଼ା ଲାଗୁଥିଲା ବୋଲି ସ୍ଥାନୀୟ ଲୋକେ କହିଛନ୍ତି।
