ନୂଆଦିଲ୍ଲୀ,୮।୪: ମିରଟର ସୌରଭ ହତ୍ୟା ମାମଲାର ଅଭିଯୁକ୍ତ ମୁସ୍କାନ ରସ୍ତୋଗୀ ମା’ ହେବାକୁ ଯାଉଛନ୍ତି। ତାଙ୍କ ଗର୍ଭଧାରଣ ଟେଷ୍ଟ ପଜିଟିଭ ବାହାରିଛି। ମୁସ୍କାନ ଜେଲରେ ଅନେକ ଥର ବାନ୍ତି କରିବାରୁ ଜେଲ ପ୍ରଶାସନ ତାଙ୍କ ସ୍ବାସ୍ଥ୍ୟ ଯାଞ୍ଚ କରିଥିଲେ। ରିପୋର୍ଟ ଆସିବା ପରେ ସେ ଗର୍ଭବତୀ ଥିବା ସ୍ପଷ୍ଟ ହୋଇଥିଲା। ମୁସ୍କାନ ଗର୍ଭବତୀ ଥିବା ଜଣାପଡିବା ପରେ ତାଙ୍କ ଗର୍ଭରେ କାହାର ସନ୍ତାନ ଅଛି ସେନେଇ ପୋଲିସ ତଦନ୍ତ ଆରମ୍ଭ କରିଛି। କାରଣ ସ୍ବାମୀ ସୌରଭ ରାଜପୁତ ଏବଂ ପ୍ରେମିକ ସାହିଲ ଶୁକ୍ଳାଙ୍କ ସହ ମୁସ୍କାନଙ୍କ ସମ୍ପର୍କ ଥିଲା।
ମୁସ୍କାନ ଏବଂ ସାହିଲ ମାର୍ଚ୍ଚ ୧୯ରୁ ମିରଟ ଜିଲା ଜେଲରେ ବନ୍ଦୀ ଅଛନ୍ତି। ମୁସ୍କାନ ପ୍ରେମିକ ସାହିଲଙ୍କ ସହିତ ମିଶି ସ୍ବାମୀ ସୌରଭଙ୍କୁ ହତ୍ୟା କରିଥିଲେ। ଜେଲକୁ ଆସିବା ପରେ, ମୁସ୍କାନର ପ୍ରାଥମିକ ଡାକ୍ତରୀ ପରୀକ୍ଷା କରାଯାଇଥିଲା। ସେତେବେଳେ ସେ ସମ୍ପୂର୍ଣ୍ଣ ସୁସ୍ଥ ଥିଲେ। ମିରଟର ବ୍ରହ୍ମପୁରୀର ଇନ୍ଦିରା ନଗରରେ ସୌରଭ ରାଜପୁତଙ୍କ ହତ୍ୟା ମାମଲାରେ, ପୋଲିସ ମୁସ୍କାନଙ୍କ ମା’ କବିତା ରସ୍ତୋଗୀ ଏବଂ ବାପା ପ୍ରମୋଦ ରସ୍ତୋଗୀଙ୍କୁ ଥାନାକୁ ଡକାଇ ସେମାନଙ୍କ ବୟାନ ରେକର୍ଡ କରିଥିଲା। ମୁସ୍କାନଙ୍କ ବାପାମାଆ ପୋଲିସ ଆଗରେ ହତ୍ୟାର ଖୁଲାସାକୁ ପୁଣି ଥରେ ଦୋହରାଇଛନ୍ତି। ଶୀଘ୍ର ବାକି ଲୋକଙ୍କ ବୟାନ ରେକର୍ଡ କରିବା ପାଇଁ ମଧ୍ୟ ପ୍ରସ୍ତୁତି ଚାଲିଛି। ପୋଲିସର ଚାର୍ଜସିଟ ମଧ୍ୟ ପ୍ରାୟ ପ୍ରସ୍ତୁତ। ଖୁବ୍ଶୀଘ୍ର କୋର୍ଟରେ ଚାର୍ଜସିଟ ଦାଖଲ କରାଯିବ। ସୌରଭଙ୍କ ଝିଅ ପିହୁ ତାଙ୍କ ଜେଜେମା’ଙ୍କ ପାଖରେ ଅଛନ୍ତି।
ମାର୍ଚ୍ଚ ୩ ରାତିରେ, ଇନ୍ଦିରା ନଗର ନିବାସୀ ସୌରଭଙ୍କୁ ତାଙ୍କ ସ୍ତ୍ରୀ ମୁସ୍କାନ ତାଙ୍କ ପ୍ରେମିକ ସାହିଲ ସହିତ ମିଶି ହତ୍ୟା କରିଥିଲେ। ଉଭୟ ସୌରଭଙ୍କୁ ବେହୋସ କରିଦେଇଥିଲେ ଏବଂ ତାଙ୍କ ଛାତିରେ ଛୁରୀ ଭୁସି ଦେଇଥିଲେ। ହତ୍ୟା ପରେ, ମୃତଦେହକୁ ବାଥରୁମକୁ ନିଆଯାଇ ଖଣ୍ଡ ଖଣ୍ଡ କରି କାଟି ଦିଆଯାଇଥିଲା। ମାର୍ଚ୍ଚ ୪ରେ ଏକ ନୀଳ ଡ୍ରମ କିଣି ସେଥିରେ ମୃତଦେହ ରଖିଥିଲେ। ସିମେଣ୍ଟ ଏବଂ ବାଲି ମିଶାଇ ଏହାକୁ ପ୍ଲାଷ୍ଟର କରିଦେଇଥିଲେ। ୧୧ ମାର୍ଚ୍ଚରେ, ମୁସ୍କାନ ମନାଲିରେ ସାହିଲଙ୍କ ଜନ୍ମଦିନ ପାଳନ କରିଥିଲେ। ସାହିଲ ଏବଂ ମୁସ୍କାନ ୧୭ ମାର୍ଚ୍ଚ ବିଳମ୍ବିତ ରାତିରେ ମିରୁଟ ଆସିଥିଲେ ଏବଂ ୧୮ ମାର୍ଚ୍ଚରେ ମୁସ୍କାନ ସୌରଭଙ୍କ ହତ୍ୟାର ଖୁଲାସା କରିଥିଲେ।
ମୁସ୍କାନ ବାପାମାଆ କହିଛନ୍ତି, ୧୮ ମାର୍ଚ୍ଚ ସକାଳେ ମୁସ୍କାନ ପ୍ରଥମେ ସୌରଭଙ୍କ ହତ୍ୟାର ଏକ ମିଥ୍ୟା କାହାଣୀ କହିଥିଲେ। ସନ୍ଦେହ ହେବାରୁ ତାଙ୍କୁ ପଚରାଉଚରା କରାଗଲା। ତାଙ୍କୁ ପୋଲିସ ଷ୍ଟେଶନକୁ ନିଆଯିବା ପରେ ସେ ସୌରଭଙ୍କୁ ହତ୍ୟା କରିଥିବା ସ୍ବୀକାର କରିଥିଲେ। ପୋଲିସ ଉଭୟଙ୍କ ବୟାନ ରେକର୍ଡ କରିଛି। ଏହି ମାମଲାରେ ସାହିଲ ଏବଂ ମୁସ୍କାନ ଜେଲରେ ଅଛନ୍ତି। ଏପ୍ରିଲ ୧୫ରେ ଉଭୟ କୋର୍ଟରେ ପୁଣି ହାଜର ହେବେ।
