ରାଇଘର,୧୩।୪ (କିରଣ ପଟ୍ଟନାୟକ): ସ୍ତ୍ରୀଙ୍କୁ ପିଟି ପିଟି ହତ୍ୟା କରିବା ପରେ ପ୍ରମାଣ ଲୁଚାଇବାକୁ ଯାଇ ସ୍ବାମୀ ଜଣକ ଏକ ପାଇଖାନା ଟାଙ୍କିରେ ମୃତଦେହକୁ ଲୁଚେଇ ରଖିଥିଲେ। ବାପାଙ୍କ ଏଭଳି ଜଘନ୍ୟ କାମକୁ ୪ ବର୍ଷର ପୁଅ ସହି ନ ପାରି ପଡୋଶୀଙ୍କ ନିକଟରେ ହତ୍ୟା ଘଟଣାର ଗୁମର ଖୋଲିଛି l
ଏଭଳି ଚାଞ୍ଚଲ୍ୟ ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲା ରାଇଘର ଥାନା କୋଷକଙ୍ଗା ପଞ୍ଚାୟତ ବୋରଗାଁରେ। ଗ୍ରାମବାସୀ ଏ ସମ୍ପର୍କରେ ପୋଲିସକୁ ଖବର ଦେବାରୁ ରବିବାର ବିଳମ୍ବିତ ରାତିରେ ପୋଲିସ ଘଟଣାସ୍ଥଳରେ ପହଞ୍ଚତ୍ ପାଇଖାନା ଟାଙ୍କିରୁ ମହିଳାଙ୍କ ମୃତଦେହ ଜବତ କରିଛି। ହତ୍ୟାକାରୀ ସୁବାସ ଗଣ୍ଡଙ୍କୁ ପୋଲିସ ଗିରଫ କରି ତଦନ୍ତ କରୁଥିବା ଜଣାପଡିଛି ।
ସୂଚନା ଅନୁଯାୟୀ, ବୋରଗାଁ ଗ୍ରାମର ସୁବାଷ ଗଣ୍ଡ, ସ୍ତ୍ରୀ ମନେଇ ଗଣ୍ଡ ଓ ପରିବାର ସଦସ୍ୟ ଶନିବାର ଏକ ବାହାଘରକୁ ବୁଲିବାକୁ ଯାଇଥିଲେ । ସେହିଦିନ ମଧ୍ୟାହ୍ନ ପ୍ରାୟ ୧୨ ଟାରେ ସମସ୍ତେ ଘରକୁ ଫେରିଥିଲେ। କୌଣସି ଏକ କଥାକୁ ନେଇ ଉଭୟ ସ୍ବାମୀ ସ୍ତ୍ରୀଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ପିଲାଙ୍କ ସମ୍ମୁଖରେ ସ୍ବାମୀ ସୁବାଷ ସ୍ତ୍ରୀ ମନେଇଙ୍କୁ ପିଟି ପିଟି ମାରି ଦେଇଥିଲେ। ସ୍ତ୍ରୀ ମନେଇ ମରିଯିବା ଜାଣିବା ପରେ ତାଙ୍କ ମୃତଦେହ ଘରେ ଲୁଚାଇ ରଖିଥିଲେ। ଶନିବାର ମଧ୍ୟରାତ୍ରି ପ୍ରାୟ ୧୨ ଟାରେ ସମସ୍ତେ ଶୋଇଯିବା ପରେ ପାଇଖାନା ଟାଙ୍କିରେ ନେଇ ପକେଇ ଦେଇଥିଲେ। ରବିବାର ସକାଳୁ ସ୍ତ୍ରୀ କେଉଁଆଡେ ଚାଲି ଯାଇଥିବା ସୁବାଷ ଗ୍ରାମବାସୀଙ୍କ ସମ୍ମୁଖରେ କହିଥିଲେ । ତେବେ ସୁବାଷଙ୍କ ୪ ବର୍ଷର ସାନପୁଅ ଗ୍ରାମବାସୀଙ୍କ ସମ୍ମୁଖରେ ସବୁ ସତ କଥା କହିଦେଇଥିଲା। ବାପା କିପରି ତାଙ୍କ ମା’ଙ୍କୁ ପିଟି ପଯିଟି ମାରିଲେ ଏବଂ ସେ ମରିଗଲା ପରେ ରାତିରେ ତାଙ୍କ ଶବକୁ ପାଇଖାନା ଟାଙ୍କିରେ ଲୁଚାଇ ରଖିଥିବା ସାନପୁର ଗଆମବାସୀଙ୍କ ଆଗରେ କହିଥିଲା।
