ମୋରଡା,୧୮।୯(ସ୍ମାରକ ମାଜୀ): ମୟୂରଭଞ୍ଜ ଜିଲା ମୋରଡ଼ା ଜେଏମ୍ଏଫସି କୋର୍ଟରେ ଗୁରୁବାର ସ୍ତ୍ରୀଙ୍କୁ ମାରପିଟ ଏବଂ ନିର୍ଯାତନା ମାମଲାର ରାୟ ପ୍ରକାଶ ପାଇଛି। ବିଚାରପତି ଶ୍ରୁତି ପଟ୍ଟନାୟକ ମାମଲାର ବିଚାର କରି ଅଭିଯୁକ୍ତ ସ୍ବାମୀଙ୍କୁ ୧ ବର୍ଷ ଜେଲ ଦଣ୍ଡରେ ଦଣ୍ଡିତ କରିଛନ୍ତି। ଏଥି ସହିତ ପୀଡିତାଙ୍କୁ ୧୦ ହଜାର ଟଙ୍କା ପ୍ରଦାନ କରିବାକୁ ନିର୍ଦ୍ଦଶ ଦେଇଛନ୍ତି। ଅନାଦେୟ ଅଧିକ ୪ ମାସ ଜେଲଦଣ୍ଡ ଭୋଗିବାକୁ ନିର୍ଦ୍ଦେଶ ଦେଇଛନ୍ତି।
ମାମଲାର ବିବରଣୀ ଅନୁଯାୟୀ, ମୋରଡ଼ା ଥାନା ଅଧୀନ ସିନ୍ଦୁରଯୋଡ଼ା ଗ୍ରାମର କାଜଲ ମାର୍ଣ୍ଡି ଗ୍ରାମର ସନାତନ ମାର୍ଣ୍ଡିଙ୍କୁ ବିବାହ କରିଥିଲେ l ବିବାହର କିଛି ବର୍ଷ ପରେ ସନାତନ ଅନ୍ୟ ଜଣେ ମହିଳାଙ୍କ ସହିତ ସମ୍ପର୍କ ରଖିଥିଲେ।
ପରେ ସନାତନ ଚକୁଳିଆ ଗ୍ରାମର ଜଣେ ମନାମକ ଝିଅଙ୍କୁ ଦ୍ୱିତୀୟ ବିବାହ କରି ଘରକୁ ଆଣିଥିଲେ l କାଜଲ ଏହାକୁ ବିରୋଧ କରିବାରୁ ସନାତନ ତାଙ୍କୁ ମାର୍ପିଟ କରିଥିଲେ। ଏନେଇ କାଜଲ ପୋଲିସକୁ ଜଣାଇଥିଲେ। ହେଲେ ଗ୍ରାମର କିଛି ଭଦ୍ର ଲୋକଙ୍କ ଉପସ୍ଥିତିରେ ଘଟଣାର ସମାଧାନ ହୋଇଥିଲା l
କିନ୍ତୁ କିଛି ଦିନ ପରେ ସନାତନ ପୁଣି କାଜଲଙ୍କୁ ମାର୍ପିଟ କରିବା ଆରମ୍ଭ କରିଥିଲେ। ଦିନେ କାଜଲଙ୍କୁ ଜୀବନରୁ ମାରିଦେବାର ଧମକ ଦେଇଥିଲେ । ଏସବୁ ଘଟଣାରେ ସନାତନଙ୍କ ଦ୍ୱିତୀୟ ସ୍ତ୍ରୀ ସମ୍ପୃକ୍ତି ମନେଇ କାଜଲ ସନ୍ଦେହ କରିଥିଲେ।
ଦିନେ କାଜଲଙ୍କୁ ସନାତନ ମାଡ଼ ମାରୁଥିବା ସମୟରେ ଗ୍ରାମବାସୀ ଭୀମ ମୁର୍ମୁ, ଗୋବିନ୍ଦ ମୁର୍ମୁ ଦେଖି ତାଙ୍କୁ ଉଦ୍ଧାର କରିଥିଲେ। ଏନେଇ ମୋରଡା ଥାନାରେ ଏକ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା(ନଂ.୭୨/୦୭) ରୁଜୁ କରି ତଦନ୍ତ ଆରମ୍ଭ କରିଥିଲା। ତଦନ୍ତ ପରେ ପୋଲିସ ସ୍ବାମୀ ସନାତନଙ୍କୁ ଗିରଫ କରିଥିଲା। ପରେ ମାମଲା କୋର୍ଟକୁ ଯାଇଥିଲା। ସମସ୍ତ ସାକ୍ଷ ପ୍ରମାଣକୁ ଭିତ୍ତି କରି ବିଚାରପିତି ଅଭିଯୁକ୍ତଙ୍କୁ ଏହି ଦଣ୍ଡଦେଶ ଶୁଣାଇଛନ୍ତି। ଏପିପି ସମ୍ବିତ ଦାଶ ମାମଲା ପରିଚାଳନା କରୁଥିଲେ।
