କରୋନାରେ ସଂକ୍ରମିତ ହୋଇ ଲକ୍ଷ ଲକ୍ଷ ଲୋକ ଏବେ ଚିକିତ୍ସାଧୀନ ଅଛନ୍ତି। ଏଥିପାଇଁ ସରକାରୀ ହସ୍ପିଟାଲରେ ଲୋକଙ୍କ ଭିଡ଼ ଜମୁଛି। ମାତ୍ର ଅଧିକ ଖର୍ଚ୍ଚ ଭୟରେ ପ୍ରାଇଭେଟ୍ ହସ୍ପିଟାଲକୁ ଯିବାକୁ ଲୋକେ ଭୟ କରୁଛନ୍ତି। ଏମିତିରେ ଦୁବାଇର ଏକ ପ୍ରାଇଭେଟ ହସ୍ପିଟାଲରେ ତେଲେଙ୍ଗାନାର ଜଣେ କରୋନା ପଜିଟିଭ ବ୍ୟକ୍ତି ଚିକିତ୍ସିତ ହୋଇ ଭଲ ହୋଇଛନ୍ତି। ଏଥିପାଇଁ ତାଙ୍କର ମେଡିକାଲ ଖର୍ଚ୍ଚ ବାବଦ ଆସିଥିବା ୧.୫୨ କୋଟି ଟଙ୍କାର ବିଲ୍କୁ ହସ୍ପିଟାଲ ଛାଡ଼ କରିଛି। ଏଥିସହ ହସ୍ପିଟାଲ ପକ୍ଷରୁ ଉକ୍ତ ବ୍ୟକ୍ତିଙ୍କୁ ଫ୍ଲାଇଟ୍ ଟିକଟ ସହ ୧୦ ହଜାର ଟଙ୍କା ଦେଇ ଘରକୁ ପଠାଯାଇଛି।
ତେଲେଙ୍ଗାନାର ଜଗିତାଲରେ ରହୁଥିବା ୪୨ ବର୍ଷୀୟ ଓଦନଲା ରାଜେଶ କରୋନା ପଜିଟିଭ ଜଣାପଡ଼ିଥିଲେ। ଏପ୍ରିଲ ୨୩ରେ ତାଙ୍କୁ ଚିକିତ୍ସା ପାଇଁ ଦୁବାଇର ଏକ ହସ୍ପିଟାଲରେ ଭର୍ତ୍ତି କରାଗଲା। ପ୍ରାୟ ୮୦ ଦିନ ସେ ହସ୍ପିଟାଲରେ ରହି ଚିକିତ୍ସିତ ହେଲେ। ସୁସ୍ଥ ହେବା ପରେ ତାଙ୍କୁ ହସ୍ପିଟାଲକୁ ଛାଡି ଦିଆଗଲା। ମାତ୍ର ତାଙ୍କର ୧ କୋଟି ୫୨ ଲକ୍ଷ ଟଙ୍କାର ବିଲ ଆସିଲା। ଏହା ଦେବା ତାଙ୍କ ପକ୍ଷେ କଷ୍ଟକର ଥିଲା। ଏ ନେଇ ସେ ଦୁବାଇର ଗଲ୍ଫ ଓ୍ବାର୍କର୍ସ ପ୍ରୋଟେକ୍ସନ ସୋସାଇଟିର ଅଧ୍ୟକ୍ଷ ଗୁନ୍ଦେଲି ନରସିମ୍ହାଙ୍କ ସହ ଯୋଗାଯୋଗ କଲେ। ଗୁନ୍ଦେଲି ଏହି ବିଲ୍ ବିଷୟରେ ଦୁବାଇର ଭାରତୀୟ ବାଣିଜ୍ୟ ଦୁତାବାସ ଅଧିକାରୀ ସୋମନାଥ ରେଡ୍ଡୀଙ୍କୁ ଜଣାଇଲେ। ଏ ନେଇ ରାଷ୍ଟ୍ରଦୂତ ହରଜୀତ ସିଂହ ହସ୍ପିଟାଲକୁ ଚିଠି ଲେଖି ଉକ୍ତ ଗରୀବଙ୍କ ବିଲ୍ ଛାଡ଼ କରିବାକୁ ଅନୁରୋଧ କଲେ। ଏହା ପରେ ହସ୍ପିଟାଲ ପକ୍ଷରୁ ରାଜେଶଙ୍କ ପୁରା ବିଲ୍ ଛାଡ କରାଗଲା। ଏଥିସହ ରାଜେଶ ଏବଂ ତାଙ୍କର ଜଣେ ବନ୍ଧୁଙ୍କୁ ଭାରତ ପଠାଇବା ପାଇଁ ଏୟାର ଇଣ୍ଡିଆର ଫ୍ରି ଟିକେଟ ଏବଂ ଖର୍ଚ୍ଚ ବାବଦ ୧୦ ହଜାର ଟଙ୍କା ହସ୍ପିଟାଲ ପକ୍ଷରୁ ତାଙ୍କୁ ଦିଆଗଲା। ମଙ୍ଗଳବାର ରାଜେଶ ଭାରତ ଫେରିଥିବା ବେଳେ ୧୪ ଦିନ ସେ ହୋମ୍ କ୍ୱାରାଣ୍ଟାଇନ୍ରେ ରହିବେ ବୋଲି ଜଣାପଡ଼ିଛି।
