ଲାଠୋର, ୫ା୭: ବଲାଙ୍ଗୀର ଜିଲା ଲାଠୋର ଥାନା ଅନ୍ତର୍ଗତ ପାଢ଼େଲ ଡୁଙ୍ଗୁରି(ପାହାଡ଼)ରୁ ସୋମବାର ପୋଲିସ ଏକ ନରକଙ୍କାଳ ଜବତ କରିଛି। ଏ ନେଇ ଏକ ମାମଲା(ନଂ.୬/୨୧) ରୁଜୁ କରି ପୋଲିସ ଜବତ କଙ୍କାଳର ବ୍ୟବଚ୍ଛେଦ ପାଇଁ ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ହସ୍ପିଟାଲ ପଠାଇଛି। କଙ୍କାଳ ନିକଟରୁ ମିଳିଥିବା ଧୋତି ଓ ଶାଲ୍ ଗତ ଜୁନ୍ ୫ତାରିଖରୁ ନିଖୋଜ ଲାଠୋର ତଳିପଡ଼ାର କପୁରଚନ ଭୁଏ (୭୦)ଙ୍କର ବୋଲି ତାଙ୍କ ପରିବାର ଲୋକେ ଚିହ୍ନଟ କରିଛନ୍ତି। ତେବେ ଜବତ କଙ୍କାଳ କପୁରଚନଙ୍କର କି ନୁହେଁ ତାହାର ଅନୁସନ୍ଧାନ ଚାଲିଛି ବୋଲି ଲାଠୋର ଥାନା ଅଧିକାରୀ ଧର୍ମେନ୍ଦ୍ର ଶାନ୍ତି କହିଛନ୍ତି। ସକାଳେ ଲାଠୋର ଗଁାର କେତେଜଣ ଲୋକ ପାଢ଼େଲ ଡୁଙ୍ଗୁରିକୁ ଯାଇଥିବା ବେଳେ ଚଟାଣ ଉପରେ ଏକ କଙ୍କାଳ ପଡ଼ିଥିବା ଦେଖିଥିଲେ। ଅପରପକ୍ଷରେ ମାସକ ତଳେ ଶୌଚ ପାଇଁ ଯାଇ ଘରକୁ ଫେରି ନ ଥିବା କପୁରଚନଙ୍କର ଏହି କଙ୍କାଳ ହୋଇଥାଇ ପାରେ ବୋଲି ସନ୍ଦେହ କରି ସେମାନେ ପୋଲିସ ଓ ତାଙ୍କ ପରିବାର ଲୋକଙ୍କୁ ଖବର ଦେଇଥିଲେ।
