ଭୁବନେଶ୍ୱର/ବଲାଙ୍ଗୀର,୧୮।୧୧( ସୁନିଲ କୁମାର ମହାନ୍ତି): ସବୁଦିନ ପାଇଁ ଆଖି ବୁଜିଛନ୍ତି କଣ୍ଠଶିଳ୍ପୀ ହ୍ୟୁମାନ ସାଗର। ଚିର ନିଦ୍ରାରେ ଶୋଇଯାଇଛନ୍ତି ହ୍ୟୁମାନ। ତାଙ୍କୁ ଭଲ ପାଉଥିବା ପ୍ରତ୍ୟୋକଟି ଲୋକଙ୍କ ଆଖିରେ ଅସରନ୍ତି ଲୁହ। ଯେମିତି ଆଖିର ଲୁହ ବୋଲ ମାନୁନି। ଜନ୍ମମାଟି କାନ୍ଦୁଛି, ଗାଁର ଗଳି, କନ୍ଦି ଗଛ ଡାଳ ସବୁ କାନ୍ଦୁଛନ୍ତି ତାଙ୍କ ପାଇଁ।
ପୈତୃକ ଗାଁ ବଲାଙ୍ଗୀରର ଡେଙ୍ଗ ଗାଁରେ ହ୍ୟୁମାନଙ୍କୁ ଝୁରିଝୁରି ଗାଁଟା ସାରା ଲୋକଙ୍କ ଲୁହଗୁଡା ବୋହିଯାଉଛି। କହୁଛନ୍ତି କୁଆଡେ ଗଲୁରେ ପୁଅ। ଫେରିଆରେ। ହେ ମୋ ଧନରେ, ଆମେ କେତେ ଆଶା ରଖିଥିଲୁରେ ପୁଅ। ଏମିତି କହି ଭୂଇଁରେ ମୁଣ୍ଡପିଟୁଛନ୍ତି।
ଓଡ଼ିଶାର ସୁନାମଧନ୍ୟ ଓ ଲୋକପ୍ରିୟ କଣ୍ଠଶିଳ୍ପୀ ହ୍ୟୁମାନ ସାଗରଙ୍କର ପରଲୋକ ହୋଇଯାଇଛି। ଭୁବନେଶ୍ୱର ଏମ୍ସ (AIIMS) ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ତାଙ୍କର ଦେହାନ୍ତ ଘଟିଛି।
ଗତ କିଛିଦିନ ହେବ ତାଙ୍କ ସ୍ୱାସ୍ଥ୍ୟାବସ୍ଥା ସଙ୍କଟାପନ୍ନ ରହିଥିଲା। ସେ ମୁଖ୍ୟତଃ ଲିଭର୍ ଓ କିଡନୀ ଜନିତ ଗୁରୁତର ରୋଗ ସହ ଶ୍ୱାସକ୍ରିୟା ଜନିତ ଅସୁବିଧା, ନିମୋନିଆ ଆଦିରେ ପୀଡ଼ିତ ଥିଲେ ଏବଂ ଭେଣ୍ଟିଲେଟରରେ ଥିଲେ।
ତାଙ୍କ ସ୍ତ୍ରୀ’ଙ୍କ ସହ ଛାଡପତ୍ର ହେବା ପରେ ହ୍ୟୁମାନ ପୂର୍ବ ଅପେକ୍ଷା ଅଧିକ ମଦ୍ୟପାନ କରୁଥିଲେ, ଯାହା ତାଙ୍କ ସ୍ୱାସ୍ଥ୍ୟକୁ ଅଧିକ ଖରାପ କରିଥିଲା। ଏପରିକି ସେ ଅତୀତରେ ‘ମଦରେ ମଦରେ ତୁ ସାହାରା’ ଭଳି ଗୀତ ମଧ୍ୟ ଗାଇଥିଲେ।
ଗୁରୁତର ଅବସ୍ଥା ଯୋଗୁଁ କଟକର ଏକ ଘରୋଇ ହସ୍ପିଟାଲରୁ ତାଙ୍କୁ ଏମ୍ସ ସ୍ଥାନାନ୍ତର କରାଯାଇଥିଲା। ତାଙ୍କୁ ରାଜ୍ୟ ବାହାରକୁ ଚିକିତ୍ସା ପାଇଁ ନେବାର ଯୋଜନା ଥିବାବେଳେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଧ୍ୟ ଡାକ୍ତରଙ୍କ ସହ ତାଙ୍କ ସ୍ୱାସ୍ଥ୍ୟାବସ୍ଥା ବିଷୟରେ ଆଲୋଚନା କରିଥିଲେ।
