ନୂଆଦିଲ୍ଲୀ,୧୧।୨: ନାମିବିଆ ବିପକ୍ଷ ମ୍ୟାଚ୍ ପୂର୍ବରୁ ଭାରତୀୟ ଦଳର ଅଭ୍ୟାସ ସେସନରେ ଏକ ଭିନ୍ନ ଚିତ୍ର ଦେଖିବାକୁ ମିଳିଛି। ଗୋଟିଏ ପଟେ ଦଳର ବାକି ସଦସ୍ୟମାନେ ହସଖୁସି ଓ ରୋମାଞ୍ଚଭରା ମୁଡ୍ରେ ଥିବାବେଳେ, ଅନ୍ୟପଟେ ୱିକେଟକିପର ବ୍ୟାଟର ସଞ୍ଜୁ ସାମସନ ନିଜ ଫର୍ମ ଓ ସ୍ଥାନ ଫେରି ପାଇବା ପାଇଁ ଏକାକୀ ସଂଘର୍ଷ କରୁଥିବା ନଜର ଆସିଛନ୍ତି।
ନାମିବିଆ ବିପକ୍ଷ ଗୁରୁତ୍ୱପୂର୍ଣ୍ଣ ମ୍ୟାଚ୍ ପୂର୍ବରୁ ଭାରତୀୟ ଦଳର ଅଭ୍ୟାସ ସେସନ ବେଶ୍ ରୋମାଞ୍ଚକର ରହିଥିଲା। ତେବେ ଏହି ଅଭ୍ୟାସ ସମୟରେ କିଛି ପ୍ରମୁଖ ଘଟଣା ସାମ୍ନାକୁ ଆସିଛି, ଯାହା ଦଳର ଚୂଡ଼ାନ୍ତ ଏକାଦଶକୁ ନେଇ ସଙ୍କେତ ଦେଉଛି।
ସାମସନ ବନାମ ଈଶାନ:
ଅଭ୍ୟାସ ସମୟରେ ଈଶାନ କିଷାନ ବେଶ୍ ଆତ୍ମବିଶ୍ୱାସର ସହ ବଡ଼ ବଡ଼ ସଟ୍ ଖେଳୁଥିବା ବେଳେ ସଞ୍ଜୁ ସାମସନ ସଂଘର୍ଷ କରୁଥିବା ଦେଖାଯାଇଥିଲା। ଅର୍ଶଦୀପ ସିଂହ ଓ ହାର୍ଦ୍ଦିକ ପାଣ୍ଡ୍ୟାଙ୍କ ପେସ୍ ବୋଲିଂ ବିପକ୍ଷରେ ସାମସନ ଅସହଜ ମନେ ହେଉଥିଲେ। ବାଟିଂ କୋଚ୍ ସିତାଂଶୁ କୋଟକ ତାଙ୍କୁ ସ୍ୱତନ୍ତ୍ର ଭାବେ ୨୦ ମିନିଟ୍ ସମୟ ଦେଇଥିଲେ। ସହକାରୀ କୋଚ୍ ରାୟନ୍ ଟେନ୍ ଡୋସେଟ୍ କହିଛନ୍ତି ଯେ, ସାମସନଙ୍କ ମନୋଭାବ ଭଲ ଅଛି, କିନ୍ତୁ ଅନ୍ୟମାନଙ୍କ ଭଲ ପ୍ରଦର୍ଶନ ଯୋଗୁଁ ଚୟନ ପ୍ରକ୍ରିୟା କଷ୍ଟକର ହେଉଛି।
ଅନ୍ୟପଟେ ଭାରତୀୟ ଓପନର ଅଭିଷେକ ଶର୍ମା ପେଟରେ ସଂକ୍ରମଣ ଯୋଗୁଁ ମଙ୍ଗଳବାର ଅଭ୍ୟାସରେ ଯୋଗ ଦେଇପାରିନାହାନ୍ତି। ସୂଚନା ଅନୁଯାୟୀ, ତାଙ୍କୁ ଦିଲ୍ଲୀର ଏକ ଡାକ୍ତରଖାନାରେ ଭର୍ତ୍ତି କରାଯାଇଛି। ରବିବାର ପାକିସ୍ତାନ ବିପକ୍ଷ ବଡ଼ ମ୍ୟାଚ୍ ପୂର୍ବରୁ ଦଳ ତାଙ୍କୁ ନେଇ କୌଣସି ବିପଦ ନେବାକୁ ଚାହୁଁନାହିଁ। ଏଭଳି ସ୍ଥିତିରେ ସାମସନଙ୍କୁ ଗୁରୁବାର ମ୍ୟାଚ୍ରେ ସୁଯୋଗ ମିଳିପାରେ।
ଅସୁସ୍ଥତା ଯୋଗୁଁ ଆମେରିକା ବିପକ୍ଷ ମ୍ୟାଚ୍ ମିସ୍ କରିଥିବା ଜସପ୍ରୀତ ବୁମରା ସମ୍ପୂର୍ଣ୍ଣ ଫିଟ୍ ହୋଇ ନେଟ୍ସକୁ ଫେରିଛନ୍ତି। ସେ ସିରାଜଙ୍କ ସ୍ଥାନରେ ନାମିବିଆ ବିପକ୍ଷରେ ଖେଳିବା ସମ୍ଭାବନା ଅଛି। ଆହତ ସମସ୍ୟାରୁ ମୁକ୍ତ ହୋଇ ସୁନ୍ଦର ନେଟ୍ସରେ ଉଭୟ ବୋଲିଂ ଓ ବ୍ୟାଟିଂରେ ଚମତ୍କାର ପ୍ରଦର୍ଶନ କରିଛନ୍ତି। ହାର୍ଦ୍ଦିକ ପାଣ୍ଡ୍ୟା ଏବଂ ଶିବମ ଦୁବେ ନେଟ୍ସରେ ଆକ୍ରମଣାତ୍ମକ ବ୍ୟାଟିଂ କରି ଷ୍ଟାଡିୟମ ବାହାରକୁ ବଲ୍ ପଠାଇଥିଲେ। ଅଭ୍ୟାସ ସେସନକୁ ଦେଖିଲେ ଭାରତୀୟ ଦଳର ମୁଡ୍ ବହୁତ ଉତ୍ସାହଜନକ ରହିଛି ଏବଂ ସମସ୍ତେ ପାକିସ୍ତାନ ବିପକ୍ଷ ହାଇ-ଭୋଲଟେଜ୍ ମ୍ୟାଚ୍ ପୂର୍ବରୁ ନିଜକୁ ପ୍ରସ୍ତୁତ ରଖିବାକୁ ଚେଷ୍ଟା କରୁଛନ୍ତି।
