ଓ୍ବାଶିଂଟନ୍/ତେହରାନ,୧୧।୬: ଏକ ଆପାଚେ ହେଲିକପ୍ଟର ଖସାଇ ଦିଆଯିବା ପରେ ଆମେରିକା ଏବଂ ଇରାନ ମଧ୍ୟରେ ଯୁଦ୍ଧ ପୁଣି ତୀବ୍ର ହୋଇଛି। ଲଗାତାର ଦ୍ୱିତୀୟ ଦିନ ପାଇଁ ଆମେରିକା ଏକାଧିକ ଇରାନୀ ଲକ୍ଷ୍ୟସ୍ଥଳ ଉପରେ ଆକ୍ରମଣ ଆରମ୍ଭ କରିଛି। ପ୍ରତିଶୋଧ ସ୍ବରୂପ, ତେହରାନ ମଧ୍ୟ ଆମେରିକୀୟ ସ୍ଥାନଗୁଡ଼ିକୁ ଟାର୍ଗେଟ କରିଛି ଏବଂ ହର୍ମୁଜ ପ୍ରଣାଳୀ ବନ୍ଦ କରିଛି। ଡୋନାଲ୍ଡ ଟ୍ରମ୍ପ ଗୋଟିଏ ଦିନ ପୂର୍ବରୁ ଇରାନ ବିରୋଧରେ ଆକ୍ରମଣ ତୀବ୍ର କରାଯିବ ବୋଲି ସିଧାସଳଖ ଚେତାବନୀ ଜାରି କରିଥିଲେ।
ଟ୍ରମ୍ପଙ୍କ ଚେତାବନୀ ପରେ, ଆମେରିକା ପଶ୍ଚିମ ତେହରାନ, ଫାର୍ସ ପ୍ରଦେଶ, ବନ୍ଦର ଆବାସ ଏବଂ କ୍ୱେଶମ ସମେତ ଇରାନର ଅନେକ ଅଞ୍ଚଳକୁ ଟାର୍ଗେଟ କରିଥିଲା। ଆମେରିକା ଗୋର୍ଗାନ, ସିରକି ଏବଂ ମିନାବ ସମେତ ଅନ୍ୟ ସହରଗୁଡ଼ିକୁ ମଧ୍ୟ ଆକ୍ରମଣ କରିଥିଲା। ଆକ୍ରମଣ ପରେ ପଶ୍ଚିମ ତେହେରାନ ଏବଂ ଫାର୍ସ ପ୍ରଦେଶରେ ବାୟୁ ପ୍ରତିରକ୍ଷା ପ୍ରଣାଳୀ ସକ୍ରିୟ କରାଯାଇଥିଲା।
ଆମେରିକୀୟ ଆକ୍ରମଣର ଜବାବରେ ଇରାନ ମଧ୍ୟ ଏହାର ଆକ୍ରମଣକୁ ତୀବ୍ର କରିଛି। ଇରାନର IRGC କହିଛି ଯେ, ଆମେରିକୀୟ ଆକ୍ରମଣର ପ୍ରତିଶୋଧ ସ୍ବରୂପ ଏହା ୧୮ଟି ପ୍ରମୁଖ ଆମେରିକୀୟ ସାମରିକ ସ୍ଥାନକୁ ଟାର୍ଗେଟ କରିଛି। ବିଶେଷକରି କୁଏତରେ ଅଲି ଅଲ-ସାଲେମ ଏବଂ ଅହମ୍ମଦ ଅଲ-ଜାବେର ଘାଟି ଏବଂ ବାହାରିନରେ ଶେଖ ଇସା ଏୟାରବେସ ଉପରେ ମଧ୍ୟ ଟାର୍ଗେଟ୍ କରାଯାଇଛି। ଏହା ସହିତ ଆମେରିକାର ଆକ୍ରମଣ ପରେ ଇରାନ ହର୍ମୁଜ ପ୍ରଣାଳୀକୁ ସମ୍ପୂର୍ଣ୍ଣ ବନ୍ଦ କରିଦେଇଛି। IRGC ଏହି ଅଞ୍ଚଳ ଦେଇ ଯାଉଥିବା ଦୁଇଟି ଜାହାଜ ଉପରେ ଆକ୍ରମଣ କରିଛି।