ଢେଙ୍କାନାଳ ଅଫିସ,୧୨ା୪: ଦୀର୍ଘବର୍ଷ ଧରି ଯୋଜନା ପରେ ଯୋଜନା ହେଉଥିଲା। କିନ୍ତୁ ଢେଙ୍କାନାଳ ସହରରେ ପ୍ରସ୍ତାବିତ ନୂତନ ବସ୍ଷ୍ଟାଣ୍ଡ ନିର୍ମାଣ କେବଳ ଫାଇଲ୍ ମଧ୍ୟରେ ରହିଯାଉଥିଲା। ବିଳମ୍ବରେ ହେଲେ ମଧ୍ୟ ଜିଲା ପ୍ରଶାସନ ପକ୍ଷରୁ ଏଥିପାଇଁ ପଦକ୍ଷେପ ନିଆଯାଇଛି। ୫୫ନଂ. ଜାତୀୟ ରାଜପଥ ପାର୍ଶ୍ୱ ମହିଷାପାଟ ପଡିଆରେ ୫ ଏକର ଜାଗା ଚିହ୍ନଟ ପ୍ରାୟ ଚୂଡାନ୍ତ ହୋଇସାରିଛି। ଆସନ୍ତା ୬ମାସ ମଧ୍ୟରେ ନିର୍ମାଣ ପ୍ରକ୍ରିୟା ଆରମ୍ଭ ହେବ ବୋଲି ଜିଲାପାଳ ଭୂମେଶ ଚନ୍ଦ୍ର ବେହେରା ସୂଚନା ଦେବା ପରେ ଅତ୍ୟାଧୁନିକ ନୂଆ ବସ୍ଷ୍ଟାଣ୍ଡ ନିର୍ମାଣ ନେଇ ଆଶା ସଞ୍ଚାର ହୋଇଛି।
ପ୍ରକାଶ ଯେ, କିଛିବର୍ଷ ତଳେ ମହିଷାପାଟ ପଡିଆରେ ବସ୍ଷ୍ଟାଣ୍ଡ ନିର୍ମାଣ ପାଇଁ ଯୋଜନା ପ୍ରସ୍ତୁତ ହୋଇଥିଲା। କିନ୍ତୁ ପରବର୍ତ୍ତୀ ସମୟରେ ଏହା କେବଳ ଫାଇଲ ମଧ୍ୟରେ ସୀମିତ ରହିଯାଇଥିଲା। ଜିଲା ଆଞ୍ଚଳିକ ଉନ୍ନୟନ ସଂସ୍ଥା ପକ୍ଷରୁ ସେହି ସମୟରେ ଉକ୍ତ ଜାଗାକୁ ଏକ ଠିକାସଂସ୍ଥାକୁ ହସ୍ତାନ୍ତର କରାଯାଇଥିଲା। ପରେ ଏହାକୁ ନେଇ ବିବାଦ ଉପୁଜିବାରୁ ବସ୍ଷ୍ଟାଣ୍ଡ ନିର୍ମାଣ ଯୋଜନା ଅଟକିଯାଇଥିଲା। ୨୦୦୪ ମସିହାରେ ପୌରସଂସ୍ଥା ପକ୍ଷରୁ ସେହି ମହିଷାପାଟ ପଡିଆଠାରେ ବସ୍ଷ୍ଟାଣ୍ଡ ନିର୍ମାଣ ପାଇଁ ଭିତ୍ତିପ୍ରସ୍ତର ପକାଯିବା ସହ ଏକ ଯାତ୍ରୀ ବିଶ୍ରାମାଗାର ଓ ଶୌଚାଳୟ ନିର୍ମାଣ ହୋଇଥିଲା। ହେଲେ ପରବର୍ତ୍ତୀ ସମୟରେ ବସ୍ଷ୍ଟାଣ୍ଡ ନିର୍ମାଣ କାର୍ଯ୍ୟ ଆରମ୍ଭ ହୋଇପାରି ନ ଥିଲା। ଶେଷରେ ଉକ୍ତ ମହିଷାପାଟ ପଡିଆରେ ୫ ଏକର ଜାଗାକୁ ନୂତନ ବସ୍ଷ୍ଟାଣ୍ଡ ନିର୍ମାଣ ପାଇଁ ଚିହ୍ନଟ କରାଯାଇଛି। ଏହି ପଡିଆରେ କିଛିବର୍ଷ ହେଲା ଲକ୍ଷ୍ମୀପୂଜା ଅବସରରେ ପଲ୍ଲିଶ୍ରୀ ମେଳା ଆୟୋଜନ କରାଯାଉଥିଲା। ତେବେ ପଲ୍ଲିଶ୍ରୀ ମେଳା ଆୟୋଜନ ପାଇଁ ନିକଟରେ ଅନ୍ୟ ଏକ ୩ ଏକରରୁ ଊର୍ଦ୍ଧ୍ୱ ଜାଗା ତହସିଲ ପକ୍ଷରୁ ଚିହ୍ନଟ କରାଯାଇଛି। ପ୍ରସ୍ତାବିତ ଏହି ଅତ୍ୟାଧୁନିକ ବସ୍ଷ୍ଟାଣ୍ଡରେ ଯାତ୍ରୀମାନଙ୍କ ପାଇଁ ସମସ୍ତ ସୁବିଧା ରହିବ। କଟକ ଏବଂ ଅନୁଗୋଳ ଆଡୁ ଆସୁଥିବା ବସ୍ଗୁଡିକ ଚଳପ୍ରଚଳ ପାଇଁ ଦୁଇଟି ଫାଟକ ବ୍ୟବସ୍ଥା ହେବ। ଏ ସମ୍ପର୍କରେ ଜିଲାପାଳ ଭୂମେଶ ଚନ୍ଦ୍ର ବେହେରା କହିଛନ୍ତି, ନୂତନ ବସ୍ଷ୍ଟାଣ୍ଡ ମହିଷାପାଟଠାରେ ୫ ଏକର ଜାଗାରେ କରାଯିବା ନିମନ୍ତେ ଯୋଜନା ହୋଇଛି। ଏ ସଂକ୍ରାନ୍ତରେ ରାଜ୍ୟ ପରିବହନ ବିଭାଗ ସହିତ ଆଲୋଚନା ହୋଇଛି। ପଲ୍ଲିଶ୍ରୀ ମେଳା ପାଇଁ ମଧ୍ୟ ଅନ୍ୟ ଏକ ଜାଗା ଚିହ୍ନଟ କରାଯାଇଥିବା ଜିଲାପାଳ ସୂଚନା ଦେଇଛନ୍ତି।
