ବେଜିଂ,୧୪।୩ : ଦାମୀ ଆକାଶ ଛୁଆଁ କୋଠାଥିବା ହଂକଂରେ ଏବେ ଗୃହ ସଙ୍କଟ ବୃଦ୍ଧି ପାଇବାରେ ଲାଗିଛି। ହଂକଂର ସାଧାରଣ ଘର ମଧ୍ୟ ଲକ୍ଷ ଲକ୍ଷ ଡଲାରରେ ବିକ୍ରି ହେଉଛି। ଏପରିକି ପାର୍କିଂ ସ୍ଥାନଗୁଡ଼ିକର ମୂଲ୍ୟ ଦଶ ଲକ୍ଷ ଟଙ୍କା ଛୁଇଁଛି। କିନ୍ତୁ ଏହି ସହରରେ ଅତି କମରେ ଦୁଇ ଲକ୍ଷ ଲୋକ ଅଛନ୍ତି ଯେଉଁମାନେ ପାଞ୍ଚ ବର୍ଷରୁ ଅଧିକ ସମୟ ପୂର୍ବରୁ ସବସିଡିଯୁକ୍ତ ଫ୍ଲାଟ ପାଇଁ ଆବେଦନ କରିଥିଲେ ଏବଂ ସେମାନଙ୍କର ଅପେକ୍ଷା ଶେଷ ହୋଇନାହିଁ।
ହଂକଂର ସାଧାରଣ ପରିଚିତି ହେଉଛି ଧନୀ ଲୋକଙ୍କ ସହର। କିନ୍ତୁ ଜନସଂଖ୍ୟାର ପ୍ରାୟ ୨୦ ପ୍ରତିଶତ ଦାରିଦ୍ର୍ୟ ସୀମାରେଖା ତଳେ ବାସ କରନ୍ତି। ଏହିପରି ଲୋକମାନେ ଗୋଟିଏ ଘର ଭିତରେ ଅତି କଷ୍ଟରେ ରହିଥାନ୍ତି। ୧୯୯୭ରେ ବ୍ରିଟେନ ହଂକଂକୁ କମ୍ୟୁନିଷ୍ଟ ଚାଇନାକୁ ଫେରାଇ ଦେଇଥିଲା। କିନ୍ତୁ ଏଠାରେ ଶାସନ ପରିବର୍ତ୍ତନ ସତ୍ତ୍ୱେ ଗରିବ ଲୋକଙ୍କ ଅବସ୍ଥାରେ କୌଣସି ପରିବର୍ତ୍ତନ ହୋଇନାହିଁ।
ହଂକଂର ଜନସଂଖ୍ୟା ୭୦ ଲକ୍ଷରୁ ଅଧିକ। ଅଧିକାରୀ କହିଛନ୍ତି ଯେ ଗତ ଦଶନ୍ଧି ମଧ୍ୟରେ ଏଠାକୁ ଆସୁଥିବା ଏବଂ ବସବାସ କରୁଥିବା ଲୋକଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇଛି। ତେଣୁ ସେମାନେ ଚାହିଦା ଅନୁଯାୟୀ ଘର ଯୋଗାଇବାରେ ସକ୍ଷମ ହୋଇ ନାହାଁନ୍ତି। ଏହି କାରଣରୁ ଅନେକ ଲୋକଙ୍କୁ ଅସୁବିଧାରେ ରହିବାକୁ ପଡୁଛି। ଗତ ବର୍ଷ ଚାଇନାର ଶି ଜିନପିଙ୍ଗ ସରକାର ସ୍ଥାନୀୟ ପ୍ରଶାସନକୁ ଗୃହ ସମସ୍ୟାର ସମାଧାନ କରିବାକୁ ନିର୍ଦ୍ଦେଶ ଦେଇଥିଲେ। ଏହା ପରେ ସହରର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଜନ ଲି ପାଞ୍ଚ ବର୍ଷ ମଧ୍ୟରେ ୩୦ ହଜାର ଘର ନିର୍ମାଣ ପାଇଁ ଏକ ଯୋଜନା ଘୋଷଣା କରିଥିଲେ।
କିନ୍ତୁ ଯୋଜନା ସମାପ୍ତ ହେବା ନେଇ ଲୋକଙ୍କ ମଧ୍ୟରେ ସନ୍ଦେହ ସୃଷ୍ଟି କରିଛି। ସେମାନଙ୍କ କହିବାନୁସାରେ, ଜମି ନିଲାମ, ବିକ୍ରୟ ଏବଂ ଟିକସ ଉପରେ ସ୍ଥାନୀୟ ସରକାର ନିର୍ଭରଶୀଳ। ବାର୍ଷିକ ଆୟର ପ୍ରାୟ ୨୦ ପ୍ରତିଶତ ଏଥିରୁ ଆସିଥାଏ। ଏହିପରି, ଜମି ଯୋଗାଣକୁ ସୀମିତ କରିବାରେ ଚାଇନାର ନିଜର ସ୍ବାର୍ଥ ରହିଛି । ଯେପର୍ଯ୍ୟନ୍ତ ଏହି ପରିସ୍ଥିତି ଜାରି ରହିବ, ହଂକଂର ଗୃହ ସମସ୍ୟା ସମାଧାନ ହୋଇପାରିବ ନାହିଁ ବୋଲି ଲୋକେ କହୁଛନ୍ତି।
