ଧର୍ମଶାଳା,୧ା୬(ଶିବପ୍ରସାଦ ମହାନ୍ତି): ଯାଜପୁର ଜିଲା ଧର୍ମଶାଳା ବ୍ଲକ ଅନ୍ତର୍ଗତ କାନପୁର ଓ ଭୁବନପୁରକୁ ସଂଯୋଗ କରୁଥିବା ରାସ୍ତାର ଅବସ୍ଥା ଅତି ଶୋଚନୀୟ ହୋଇପଡ଼ିଛି। ରାସ୍ତା ଉପରେ ବିରାଟ ବିରାଟ ଗର୍ତ୍ତ ସୃଷ୍ଟି ହୋଇଛି ଯାହା ଫଳରେ ବର୍ଷା ସମୟରେ ଯାତାୟାତରେ ନାନା ସମସ୍ୟା ଦେଖା ଦେଉଛି। ବର୍ଷା ପାଣି ଜମି ରହିଥିବାରୁ ଅନେକ ସମୟରେ ଦୁର୍ଘଟଣା ଘଟୁଛି। ପାଖାପାଖି ପାଞ୍ଚରୁ ଊର୍ଦ୍ଧ୍ୱ ପଞ୍ଚାୟତର ୨୦ହଜାରରୁ ଊଦ୍ଧର୍ବ ଲୋକ ଏହି ରାସ୍ତା ଉପରେ ନିର୍ଭର କରୁଥିବା ବେଳେ ନାନା ସମସ୍ୟା ହେଉଥିବା ସ୍ଥାନୀୟ ବାସିନ୍ଦା କହିଛନ୍ତି। ସେଠାରେ ଥିବା ଜଣେ ସ୍ଥାନୀୟ କ୍ରସର ମାଲିକଙ୍କ ନିର୍ଦ୍ଦେଶରେ ଅନେକ ଠିକାଦାର ଦୁର୍ନୀତିରେ ସାମିଲ ହୋଇଥିବା ନେଇ ଚର୍ଚ୍ଚା ହେଉଛି।
ମଧୁପୁରଗଡ଼ ସରପଞ୍ଚ ରବୀନ୍ଦ୍ର ନାଥ ସେଠୀ କହିଛନ୍ତି ଏହି ରାସ୍ତା ନିର୍ମାଣ ହେଉଥିବା ବେଳେ ନିମ୍ନମାନର କରାଯାଉଥିବା ଅଭିଯୋଗ ହୋଇଥିଲା। କିନ୍ତୁ କୌଣସି ପ୍ରଭାବ ପଡ଼ି ନ ଥିଲା ବରଂ ଠିକାଦାର ଓ ପ୍ରଶାସନିକ ଅଧିକାରୀଙ୍କ ମଧ୍ୟରେ ସଲାସୁତରାରେ ରାସ୍ତା କାର୍ଯ୍ୟ ହୋଇଥିଲା। ଯାହା ଫଳରେ ଅଳ୍ପ ଦିନ ମଧ୍ୟରେ ରାସ୍ତାର ଅବସ୍ଥା ସଙ୍କଟାପନ୍ନ ହୋଇପଡ଼ିଛି। ଧର୍ମଶାଳାରେ ବ୍ଲକ କାର୍ଯ୍ୟଳୟଠାରୁ ଆରମ୍ଭ କରି ମେଡିକାଲ, ଥାନା, କଲେଜ ରହିଥିବାରୁ ଦୈନଦିନ ଲୋକଙ୍କଠାରୁ ଆରମ୍ଭ କରି ଛାତ୍ରୀଛାତ୍ର ଏହି ରାସ୍ତା ଉପରେ ନିର୍ଭର କରିଥାନ୍ତି। ତେଣୁ ଏହାକୁ ତୁରନ୍ତ ନିର୍ମାଣ କରିବାକୁ ଦାବି କରିଛନ୍ତି।
ଏହି ରାସ୍ତାଟି ଗ୍ରାମ ଉନ୍ନୟନ ବିଭାଗ ଅଧୀନରେ କାର୍ଯ୍ୟ କରାଯାଇଥିଲା ଏବଂ ରାସ୍ତାରେ ଭାରୀଯାନ ଓଭର ଲୋଡ୍ ଦେଇ ଚଳାଚଳ ହେବା ଦାର ଏହା ନଷ୍ଟ ହୋଇ ଥିବା କହିଛନ୍ତି। ତେଣୁ ଆଗମୀ ଦିନରେ ଏହାର ମରାମତି ବା ପ୍ରଶସ୍ତିକରଣ କାର୍ଯ୍ୟ ପୂର୍ତ୍ତ ବିଭାଗ ଅଧୀନରେ କରାଯିବ ବୋଲି ଜାରକା ଗ୍ରାମ୍ୟ ଉନ୍ନୟନ ବିଭାଗ ସହକାରୀ ଯନ୍ତ୍ରୀ ଜନ୍ମେଜୟ ଷଡ଼ଙ୍ଗୀ କହିଛନ୍ତି।
