ନୂଆଦିଲ୍ଲୀ,୮।୧: ଚାଇନା ପରେ ହ୍ୟୁମାନ ମେଟାନ୍ୟୁମୋଭାଇରସ (HMPV) ବର୍ତ୍ତମାନ ଭାରତରେ ପଶିଛି। ଯାହାକୁ ନେଇ ସାରା ଦେଶରେ ଏବେ ଆତଙ୍କ ଖେଳିଯାଇଛି। କର୍ନାଟକ, ତାମିଲନାଡୁ ପରେ ଏବେ ମୁମ୍ବାଇରେ ଏକ ନୂଆ ମାମଲା ଦେଖିବାକୁ ମିଳିଛି। ମୁମ୍ବାଇର ପୋୱାଇର ହିରାନନ୍ଦାନୀ ଡାକ୍ତରଖାନାର ଜଣେ ୬ମାସର ଶିଶୁଠାରେ ଏଚଏମପିଭି ମାମଲା ଦେଖାଦେଇଛି। ତେବେ ଏହି ଭୂତାଣୁ ଏବେ ଭାରତରେ ୮ଜଣଙ୍କୁ ସଂକ୍ରମିତ କରିଛି। ବେଙ୍ଗାଲୁରୁ, ନାଗପୁର ଏବଂ ତାମିଲନାଡୁରେ ଦୁଇଟି ମାମଲା ଏବଂ ଅହମ୍ମଦାବାଦ ଏବଂ ମୁମ୍ବାଇରେ ଗୋଟିଏ ମାମଲା ରୁଜୁ ହୋଇଛି।
ଚାଇନାରେ ଏହି ଭୂତାଣୁ ସଂକ୍ରମଣ ସହ ଜଡିତ ମାମଲା ବୃଦ୍ଧି ହେତୁ ଭାରତୀୟମାନେ ମଧ୍ୟ ଭୟଭୀତ ହେବାକୁ ଲାଗଛନ୍ତି। କିଛି ଲୋକ ଏହି ରୋଗକୁ କୋଭିଡ -19 ସହିତ ତୁଳନା କରିବା ଆରମ୍ଭ କରିଛନ୍ତି। ଏହାକୁ ନେଇ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଜେପି ନଡ୍ଡା କହିଛନ୍ତି ଯେ HMPV ଏକ ନୂଆ ଭୂତାଣୁ ନୁହେଁ।
ମୁମ୍ବାଇରେ ଚିହ୍ନଟ ହୋଇଥିବା ୬ମାସର ଝିଅଟି ଜାନୁଆରୀ ୧ରେ, କାଶ, ଛାତି ଟାଣିବା ଏବଂ ଅମ୍ଳଜାନ ସ୍ତର ୮୪ ପ୍ରତିଶତକୁ ଖସିଯିବା କାରଣରୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଟେଷ୍ଟ ପରେ ଜଣାପଡିଥିଲା କି ଝିଅଟି HMPV ଦ୍ୱାରା ସଂକ୍ରମିତ।
HMPV ହେଉଛି ଏକ ଭୂତାଣୁ ଯାହା ମଣିଷ ଫୁସଫୁସ ଏବଂ ଶ୍ୱାସକ୍ରିୟାରେ ସଂକ୍ରମଣ ସୃଷ୍ଟି କରେ। ଏହା ସାଧାରଣ ଥଣ୍ଡା କିମ୍ବା ଫ୍ଲୁ ପରି ଅବସ୍ଥା ସୃଷ୍ଟି କରେ। ଯେଉଁମାନେ ପୂର୍ବରୁ ଅସୁସ୍ଥ ଅଛନ୍ତି କିମ୍ବା ଆଲର୍ଜିରେ ପୀଡିତ ସେମାନଙ୍କଠାରେ HMPV ସଂକ୍ରମଣ ସାଧାରଣ ଅଟେ।
