ମୁମ୍ବାଇ: ସୋସିଆଲ ମିଡିଆରେ ଟେଲିଭିଜନ ଅଭିନେତ୍ରୀ ବୈଷ୍ଣବି ଧନରାଜଙ୍କ ଏକ ଭିଡିଓ ସାମ୍ନାକୁ ଆସିଛି। ଯେଉଁଥିରେ ଅଭିନେତ୍ରୀ ସାହାଯ୍ୟ ପାଇଁ ନିବେଦନ କରୁଥିବା ନଜର ଆସିଛନ୍ତି। ତାଙ୍କ ମୁହଁ ଏବଂ ଶରୀରରେ ଅନେକ ଆଘାତ ଚିହ୍ନ ରହିଛି। ଭିଡିଓରେ ଅଭିନେତ୍ରୀ କହିଛନ୍ତି ଯେ ତାଙ୍କ ପରିବାର ସଦସ୍ୟ ତାଙ୍କୁ ମାଡ଼ ମାରିଥିଲେ।
ସେ ଅନେକ ବଡ ବଡ ଟେଲିଭିଜନ ଶୋ’ର ଅଂଶ ହୋଇଆସୁଛନ୍ତି। ସେ କ୍ରାଇମ ଡ୍ରାମା ଶୋ ସିଆଇଡି, ତେରେ ଇଶ୍କ ମେଁ ଘାୟଲ ଏବଂ ବେପନାହ ପରି ଲୋକପ୍ରିୟ ଶୋ’ରେ ଏଅଭିନୟ କରିସାରିଛନ୍ତି।
ତାଙ୍କ ସହ ଘଟିଥିବା ଝଗଡ଼ା ବିଷୟରେ ଏକ ଭିଡିଓ ଜାରି କରି ସମସ୍ତଙ୍କୁ ସାହାଯ୍ୟ କରିବାକୁ ଅନୁରୋଧ କରିଥିଲେ। ଅଭିନେତ୍ରୀ କ୍ୟାମେରାରେ ତାଙ୍କ ମୁହଁ, ଓଠ ଏବଂ ହାତରେ ଆଘାତ ଚିହ୍ନ ମଧ୍ୟ ଦେଖାଇଥିଲେ। ସେ କହିଛନ୍ତି ଯେ ସେ ଏହି ଭିଡିଓକୁ ପୋଲିସ ଷ୍ଟେଶନରୁ ଶୁଟ କରିଛନ୍ତି।
ଅଭିନେତ୍ରୀ ଭିଡିଓରେ କହିଛନ୍ତି, ହେଲୋ, ମୁଁ ବୈଷ୍ଣବି ଧନରାଜ। ମୁଁ ବର୍ତ୍ତମାନ ପ୍ରକୃତରେ ସାହାଯ୍ୟ ଆବଶ୍ୟକ କରେ। ମୁଁ ବର୍ତ୍ତମାନ କାଶିମିରା (ମୀରା ରୋଡ) ପୋଲିସ ଷ୍ଟେଶନରେ ଅଛି ଏବଂ ମୋର ପରିବାର ସଦସ୍ୟ ମୋତେ ମାଡ଼ ମାରିଛନ୍ତି। ମୋତେ ବହୁତ ଜୋରରେ ମାଡ ଦିଆଯାଇଛି। ଦୟାକରି ମୁଁ ଆପଣଙ୍କର ସାହାଯ୍ୟ ଆବଶ୍ୟକ କରେ। ମିଡିଆ, ନ୍ୟୁଜ ଚ୍ୟାନେଲ ଏବଂ ଇଣ୍ଡଷ୍ଟ୍ରିର ସମସ୍ତ ଲୋକ ଦୟାକରି ଆସି ମୋତେ ସାହାଯ୍ୟ କରନ୍ତୁ।
ସୂଚନାଯୋଗ୍ୟ, ସେ ମଧ୍ୟ ପୂର୍ବରୁ ଶାରୀରିକ ହିଂସାର ଶିକାର ହୋଇଥିଲେ। ଏହି ଅଭିନେତ୍ରୀଙ୍କୁ ତାଙ୍କ ବିବାହରେ ଘରୋଇ ହିଂସାର ସାମ୍ନା କରିବାକୁ ପଡିଥିଲା। ସେ ଅଭିନେତା ନିତିନ ଶେରାୱତଙ୍କୁ ୨୦୧୬ରେ ବିବାହ କରିଥିଲେ। ସ୍ପଟବୟକୁ ଦେଇଥିବା ଏକ ସାକ୍ଷାତକାରରେ ଅଭିନେତ୍ରୀ ଜଣାଇଛନ୍ତି ଯେ ସେ ଘରୋଇ ହିଂସାର ଶିକାର ହୋଇଥିଲେ ତେଣୁ ସେ ଛାଡପତ୍ର ନେଇଥିଲେ।
ଅଭିନେତ୍ରୀ କହିଥିଲେ, ସେ ହୁଏତ ମୋ ଜୀବନ ନେଇ ନଥାନ୍ତେ, କିନ୍ତୁ ମୁଁ ଏତେ ଡରି ଯାଇଥିଲି ଯେ ମୁଁ ଘରୁ ପଳାଇ ଯାଇଥିଲି। ସେ ମୋତେ ଏତେ ମାଡ ମାରିଥିଲେ ଯେ ମୋର ଗୋଡରୁ ରକ୍ତସ୍ରାବ ହେଉଥିଲା। ଭାବପ୍ରବଣ, ଶାରୀରିକ ଏବଂ ମାନସିକ ସ୍ତରରେ ସେ ମୋର ଶେଷ ଦିନ ଥିଲା ଶେଷରେ ମୁଁ ଛାଡପତ୍ର ପାଇଲି।
