ଟୋକିଓ,୭।୮: ଟୋକିଓ ଅଲିମ୍ପିକ୍ସରେ ଜାଭେଲିନ ଥ୍ରୋୟର ନୀରଜ ଚୋପ୍ରା ଐତିହାସିକ ସ୍ବର୍ଣ୍ଣ ପଦକ ଅର୍ଜନ କରି ଇତିହାସ ସୃଷ୍ଟ କରିଛନ୍ତି। ଏଭଳି ସଫଳତା ପରେ ତାଙ୍କ ନିକଟକୁ ଛୁଟିଛି ଶୁଭେଚ୍ଛାର ସୁଅ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ରାଷ୍ଟ୍ରପତି ରାମନାଥ କୋବିନ୍ଦଙ୍କ ଠାରୁ ଆରମ୍ଭ କରି ଦେଶର ବହୁ ମାନ୍ୟଗଣ୍ୟ ବ୍ୟକ୍ତି ଟୁଇଟ୍ କରି ଶୁଭେଚ୍ଛା ଜଣାଇଛନ୍ତି। ପ୍ରଧାନମନ୍ତ୍ରୀ ମୋଦି ଲେଖିଛନ୍ତି, ଟୋକିଓରେ ଇତିହାସ ରଚାଗଲା। ନୀରଜ ଆଜି ଯେଉଁ ସଫଳତା ହାସଲ କରିଛନ୍ତି, ତାହା ସର୍ବଦା ମନେ ରହିବ। ଯୁବ ନୀରଜ ଚମତ୍କାର ପ୍ରଦର୍ଶନ କରିଥିଲେ। ସ୍ବର୍ଣ୍ଣ ପଦକ ଜିତିବା ପାଇଁ ତାଙ୍କୁ ହାର୍ଦ୍ଦିକ ଶୁଭେଚ୍ଛା।
ରାଷ୍ଟ୍ରପତି କୋବିନ୍ଦ ଲେଖିଛନ୍ତି, ନୀରଜ ଚୋପ୍ରାଙ୍କ ଅପ୍ରତ୍ୟାଶିତ ବିଜୟ। ତୁମ ଜାଭେଲିନ ବାଧା ଭାଙ୍ଗିବା ସହ ଇତିହାସ ସୃଷ୍ଟି କରିଛି। ତୁମେ ତୁମ ପ୍ରଥମ ଅଲିମ୍ପିକ୍ସରେ ଭାରତକୁ ଆଣି ଦେଇଛ ପ୍ରଥମ ଟ୍ରାକ ଓ ଫିଲ୍ଡ ମେଡାଲ। ତୁମ ସଫଳତା ଆମ ଯୁବବର୍ଗଙ୍କୁ ପ୍ରେରଣା ଦେବ। ହୃଦୟରୁ ଶୁଭେଚ୍ଛା। ଶୁଭେଚ୍ଛୁଙ୍କ ତାଲିକାରେ ଉପରାଷ୍ଟ୍ରପତି ଏମ୍. ଭେଙ୍କିୟା ନାୟୁଡୁ, କ୍ରୀଡ଼ା ମନ୍ତ୍ରୀ ଅନୁରାଗ ଠାକୁର, ଆଇନ ମନ୍ତ୍ରୀ କିରେନ ରିଜିଜୁ, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ପ୍ରମୁଖ ରହିଛନ୍ତି।
