ଡେରାଡୁନ୍,୭।୨:ଉତ୍ତରାଖଣ୍ଡ ବୁଧବାର ଇତିହାସ ସୃଷ୍ଟି କରିଛି। ଉତ୍ତରଖଣ୍ଡ ବିଧାନସଭାରେ ଆଲୋଚନା ପରେ ସମାନ ନାଗରିକ ସଂହିତା (ୟୁସିସି) ବିଲ୍ ପାରିତ ହୋଇଛି। ଦିନସାରା ବିଧାନସଭାରେ ଏହି ବିଲ ବିଷୟରେ ଆଲୋଚନା ହୋଇଥିଲା, ଯାହା ପରେ ସିଏମ ସମ୍ବୋଧିତ କରିଥିଲେ। ସାରେ ୟୁସିସି ବିଲ ଭଏସ ଭୋଟ ଦ୍ୱାରା ପାରିତ ହୋଇଥିଲା।
ବିଧାନସଭା ନିର୍ବାଚନ ସମୟରେ ନିର୍ବାଚନୀ ଇସ୍ତାହାରରେ ରାଜ୍ୟରେ ୟୁନିଫର୍ମ ସିଭିଲ କୋଡ ଲାଗୁ କରିବାକୁ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଘୋଷଣା କରିଥିଲେ। ଭାଜପା କ୍ଷମତାକୁ ଫେରିବା ପରେ ସେ ସମାନ ନାଗରିକ ସଂହିତା ପ୍ରସଙ୍ଗରେ ପ୍ରଥମେ ନିଷ୍ପତ୍ତି ନେବାକୁ ମଧ୍ୟ ଘୋଷଣା କରିଥିଲେ। କ୍ଷମତାକୁ ଆସିବା ପରେ ପ୍ରଥମ କ୍ୟାବିନେଟରେ ଧାମି ସରକାର ସମାନ ନାଗରିକ ସଂହିତା ପାଇଁ ଏକ ବିଶେଷଜ୍ଞ କମିଟି ଗଠନ କରିବାକୁ ନିଷ୍ପତ୍ତି ନେଇଥିଲେ।
ଉତ୍ତରାଖଣ୍ଡ ସରକାର ମଙ୍ଗଳବାର ରାଜ୍ୟ ବିଧାନସଭାରେ ସମାନ ନାଗରିକ ସଂହିତା (ୟୁସିସି) ବିଲ୍ ଆଗତ କରିଥିଲେ। ସ୍ବାଧୀନତା ପରେ ଏଭଳି ବିଲ୍ ଆଣିବାରେ ଉତ୍ତରାଖଣ୍ଡ ପ୍ରଥମ ରାଜ୍ୟ। ଆଦିବାସୀମାନଙ୍କୁ ପ୍ରସ୍ତାବିତ ଆଇନରୁ ବାଦ୍ ଦିଆଯାଇଛି।
ଚିଠା ଆଇନରେ ବହୁପତ୍ନୀ ଗ୍ରହଣକୁ ନିଷେଧ କରାଯିବା ସହ ଲିଭ୍-ଇନ୍ ରିଲେଶନରେ ରହିଲେ ପଞ୍ଜୀକରଣକୁ ବାଧ୍ୟତାମୂଳକ କରାଯାଇଛି। ଏଭଳି ସମ୍ପର୍କରୁ ଜନ୍ମିତ ସନ୍ତାନଙ୍କୁ ବୈଧ ବିବେଚନା କରାଯିବ ଏବଂ ଛାଡ଼ପତ୍ର କ୍ଷେତ୍ରରେ ମହିଳାଙ୍କୁ ତାଙ୍କ ପୁରୁଷ ସାଥୀ କ୍ଷତିପୂରଣ ଦେବେ। ପ୍ରସ୍ତାବିତ ଆଇନରେ ଝିଅମାନଙ୍କ ବିବାହ ବୟସ ୧୮ ଏବଂ ପୁଅଙ୍କ ପାଇଁ ୨୧ ବର୍ଷ ରହିବ। ବିବାହ ପଞ୍ଜୀକରଣ ବାଧ୍ୟତାମୂଳକ ହେବ। ଛାଡ଼ପତ୍ର ପାଇଁ ଉଭୟ ସ୍ବାମୀ ଏବଂ ସ୍ତ୍ରୀଙ୍କୁ ସମାନ କାରଣ ଦର୍ଶାଇବାକୁ ହେବ। ଜଣେ ସ୍ତ୍ରୀ ବଞ୍ଚତ୍ଥିବା ଯାଏ ଦ୍ୱିତୀୟ ବିବାହ କରାଯାଇପାରିବ ନାହଁ। ପୁଅଙ୍କ ଭଳି ଝିଅମାନଙ୍କୁ ସମ୍ପତ୍ତି ଉପରେ ସମାନ ଅଧିକାର ମିଳିବ।
ଲୋକ ସଭା ନିର୍ବାଚନ ପୂର୍ବରୁ ଉତ୍ତରାଖଣ୍ଡ ସରକାର ୟୁସିସି ବିଲ୍ ଆଣିବା ଗୁରୁତ୍ୱପୂର୍ଣ୍ଣ। ବିବାହ, ଛାଡ଼ପତ୍ର, ଜମିଜମା, ସମ୍ପତ୍ତି ଏବଂ ଉତ୍ତରାଧିକାରକୁ ନେଇ ସମସ୍ତ ନାଗରିକଙ୍କ ପାଇଁ ସମାନ ଆଇନ ଆଣିବା ଭାଜପା କାର୍ଯ୍ୟସୂଚୀର ଅନ୍ୟତମ ମୁଖ୍ୟ ପ୍ରସଙ୍ଗ ଥିଲା। ଅନ୍ୟ ଭାଜପା ଶାସିତ ରାଜ୍ୟ ଅନୁରୂପ ଆଇନ ଆଣିପାରନ୍ତି ବୋଲି କୁହାଯାଇଛି।
