ମହାକାଳପଡ଼ା, ୧୨ା୪(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ପ୍ରସିଦ୍ଧ ଶକ୍ତିପୀଠ ମା’ ରାମଚଣ୍ଡୀ ପୀଠରେ ଦୁଇ ଦିନ ପରେ ପଣା ସଂକ୍ରାନ୍ତି ଝାମୁଯାତ୍ରା ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି। ଏହି ଅବସରରେ କେନ୍ଦ୍ରାପଡା ଜିଲାର ଐତିହାସିକ ଜମ୍ବୁ ଦ୍ୱୀପ ମହୋତ୍ସବ ଜିଲା ପ୍ରଶାସନ ପକ୍ଷରୁ ପାଳନ କରାଯିବାର କାର୍ଯ୍ୟକ୍ରମ ରହିଛି। ମହୋତ୍ସବକୁ ସରସ ସୁନ୍ଦର କରିବା ପାଇଁ ସମସ୍ତଙ୍କ ସହଯୋଗ ଆବଶ୍ୟକତା ରହିଛି। ସେଥିପାଇଁ ଶନିବାର ପୂର୍ବାହ୍ନରେ ମା’ ରାମଚଣ୍ଡୀ ମନ୍ଦିର ଟ୍ରଷ୍ଟି କାର୍ଯ୍ୟାଳୟରେ ଏକ ସମୀକ୍ଷା ବୈଠକରେ ଜିଲାପାଳ ରଘୁରାମ ଆର ଆୟର ଯୋଗଦେଇ ପ୍ରସ୍ତୁତି ସମ୍ପର୍କିତ ମହୋତ୍ସବ କମିଟି ସଦସ୍ୟମାନଙ୍କ ସହିତ ଆର୍ଥିକ ଅନୁଦାନ ଓ ଆୟ ବ୍ୟୟର ଆଲୋଚନା କରାଯାଇଥିଲା। ଏହା ଦ୍ୱୀତୀୟ ବାର୍ଷିକ ଜମ୍ବୁ ଦ୍ୱୀପ ମହୋତ୍ସବ ଅନୁଷ୍ଠିତ ହେବ। ଓଡ଼ିଶାର କୋଣ ଅନୁକୋଣର କଳାକାର ସାମିଲ ହୋଇ ତାଙ୍କର ଅଭିନୟ ପ୍ରଦର୍ଶିତ କରିଥିଲେ। ସମ୍ବଲପୁରୀ, ଗୋଟିପୁଅ ଓ ପାଇକ ଆଖଡ଼ା ଭଳି ନୃତ୍ୟରେ ବଛା ବଛା କଳାକାର ସାମିଲ ହୋଇଥିଲେ। ଏଥର ମଧ୍ୟ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ ବୋଲି କୁହାଯାଉଛି। ବୈଠକରେ ଉପଜିଲାପାଳ ଅରୁଣ କୁମାର ନାୟକ, ବିଡିଓ ତଥା ତହସିଲଦାର ରବି ନାରାୟଣ ଆଚାର୍ଯ୍ୟ, ବ୍ଲକ ସାମାଜିକ ସୁରକ୍ଷା ଅଧିକାରୀ ଦୀପକ କୁମାର ପରିଡ଼ା, ରାଜସ୍ବ ନିରୀକ୍ଷକ ବିଜୟ କୁମାର ବେହେରାଙ୍କ ସମେତ କମିଟି ସଦସ୍ୟମାନଙ୍କ ମଧ୍ୟରେ ବ୍ଲକ ଆତ୍ମା ଅଧ୍ୟକ୍ଷ ହିମାଂଶୁ ଶେଖର ପ୍ରଧାନ, ସରୋଜ କାନ୍ତ ସାହୁ, ତରୁଣ କାନ୍ତ କାଞ୍ଜି ଲାଲ, ମିଲନ ଦେବନାଥ, ପ୍ରସନ୍ନ କୁମାର ବେହେରା, ଲକ୍ଷ୍ମୀକାନ୍ତ ସ୍ବାଇଁ, ଲକ୍ଷ୍ମଣ ଦାସ, ଭୀଷ୍ମ ଲେଙ୍କା, ଚନ୍ଦ୍ରକାନ୍ତ ସ୍ବାଇଁ, ପବିତ୍ର ଚୌଧୁରୀ, ଭବେନ ମଣ୍ଡଲ , ବାରେଣୀ ଭୂୟାଁ ଓ ବଣ୍ଟି ଦେବନାଥଙ୍କ ସମେତ ଅନ୍ୟ ସଦସ୍ୟମାନେ ଉପସ୍ଥିତ ଥିଲେ।