ବଲାଙ୍ଗୀର,୬ା୯(ସୁନିଲ କୁମାର ମହାନ୍ତି): ବଲାଙ୍ଗୀର ଜିଲା ଓକିଲ ସଂଘ ପକ୍ଷରୁ ରବିବାର ହାଇକୋର୍ଟ ଜ୍ୟୋତିଯାତ୍ରା କାର୍ଯ୍ୟକ୍ରମ ଅନୁଷ୍ଠିତ ହୋଇଛି। ବଲାଙ୍ଗୀରଠାରେ ହାଇକୋର୍ଟ ସ୍ଥାୟୀ ବେଞ୍ଚ ପ୍ରତିଷ୍ଠା କରାଯିବାକୁ ଦାବି କରିଆସୁଛନ୍ତି। ଏହି ଉପଲକ୍ଷେ ପ୍ରତିବର୍ଷ ସେପ୍ଟେମ୍ବର ୬ ତାରିଖରେ ବଲାଙ୍ଗୀରରେ ହାଇକୋର୍ଟ ସ୍ଥାୟୀ ବେଞ୍ଚ ପ୍ରତିଷ୍ଠା ଦାବି ନେଇ ହାଇକୋର୍ଟ ଜ୍ୟୋତିଯାତ୍ରା ସହର ପରିକ୍ରମା କରିଆସୁଛି। ରବିବାର ପାଟଣେଶ୍ବରୀ ମନ୍ଦିରରେ ପୂଜାର୍ଚ୍ଚନା କରାଯାଇଥିଲା। ଜ୍ୟୋତି ମଶାଲକୁ ବରିଷ୍ଠ ଆଇନଜୀବୀ ଅମରେନ୍ଦ୍ର ମିଶ୍ର ଜ୍ୟୋତି ମଶାଲ ଧରି ପରିକ୍ରମା ଶୁଭାରମ୍ଭ କରିଥିଲେ।
ଏହି ଶୋଭାଯାତ୍ରାରେ ଜିଲା ଓକିଲ ସଂଘ ସଭାପତି ବାସୁଦେବ ରଥ, ସମ୍ପାଦକ ଅସିତ ଷଡ଼ଙ୍ଗୀ, ବରିଷ୍ଠ ଓକିଲ ଭବାନୀ ଶଙ୍କର ଶତପଥୀ, ଡ. ଶ୍ରୀକର ମିଶ୍ର, ସରୋଜ ଗୁପ୍ତା, ରବିନାରାୟଣ ବହିଦାର, ପ୍ରମୋଦ ତ୍ରିପାଠୀ, ଜୟରାମ ମିଶ୍ର, ରତନ ମହାରଣା, ଦୀପ୍ତି ଶର୍ମା, ଦେବେନ୍ଦ୍ର ପାଣିଗ୍ରାହୀ, ସୁଧାଂଶୁ ଶେଖର ଦେଓ, ସଞ୍ଜୟ ପଟେଲ, ଦେବାଶିଷ ବିଶ୍ବାଳ, ସନ୍ତୋଷ ପାଢ଼ୀ, ବୁଲୁ ଦାନୀ, ଉମାକାନ୍ତ ସାହୁ, ଅର୍ଜୁନ ମୁଗ୍ରୀ ଓ ଅନ୍ୟମାନେ ଉପସ୍ଥିତ ଥିଲେ। ବଲାଙ୍ଗୀର କଚେରି ଛକଠାରେ ଶୋଭାଯାତ୍ରା ପହଞ୍ଚିବା ପରେ ସେଠାରେ ବିକ୍ଷୋଭ ପ୍ରଦର୍ଶନ କରିଥିଲେ। ସେଠାରେ ପୂର୍ବତନ ମନ୍ତ୍ରୀ ନରସିଂହ ମିଶ୍ର ଯୋଗଦେଇ ଓକିଲମାନଙ୍କୁ ଉତ୍ସାହିତ କରିଥିଲେ। ଶୋଭାଯାତ୍ରାଟି ସହର ପରିକ୍ରମା କରି ସିଭିଲ କୋର୍ଟରେ ପହଞ୍ଚିଥିଲା।
