ଭୋପାଳ,୧୪।୭: ଚାକିରି କରିବା ପରେ ଜଣେ ସରକାରୀ ଅଧିକାରୀଙ୍କ ତୃତୀୟ ସନ୍ତାନ ହେବାରୁ ହାଇକୋର୍ଟ ତାଙ୍କ ଅଯୋଗ୍ୟ ଘୋଷିତ କରିଛନ୍ତି। ମଧ୍ୟପ୍ରଦେଶର ଗ୍ବାଲିୟର ହାଇକୋର୍ଟଙ୍କ ପକ୍ଷରୁ ରାଜ୍ୟରେ ପ୍ରଣୟନ ହୋଇଥିବା ସଭିଲ୍ ସର୍ଭିସ୍ ଅଧିନିୟମ ୧୯୬୧ ଅନ୍ତର୍ଗତ ସମ୍ପୃକ୍ତ ସରକାରୀ ଅଧିକାରୀଙ୍କୁ ଚାକିରୀ କରିବାକୁ ଅଯୋଗ୍ୟ ବୋଲି ଘୋଷଣା କରିଛନ୍ତି। ରାଜ୍ୟରେ ୨୦୦୧ ଜାନୁୟାରୀ ୨୬ରୁ ଏହି ଆଇନର ପ୍ରଣୟନ କରାଯାଇଛି ବୋଲି କୋର୍ଟ କହିଛନ୍ତି। ଲକ୍ଷ୍ମଣ ସିଂ ବଘେଲା ନାମକ ଆବେଦନ କାରୀ ୨୦୦୯ରେ ସହକାରୀ ବିହନ ପ୍ରମାଣନ ଅଧିକାରୀ ପଦବୀ ପାଇଁ ପରୀକ୍ଷା ଦେଇଥିଲେ। ୨୦୦୯ ଜୁନ୍ ୩୦ ସୁଦ୍ଧା ତାଙ୍କର ୨ ସନ୍ତାନ ଥିବା ସେ ଆବେଦନ ପତ୍ରରେ ଉଲ୍ଲେଖ କରିଥିଲେ। ତେବେ ନଭେମ୍ବର ୨୦ରେ ତାଙ୍କର ତୃତୀୟ ସନ୍ତାନ ହୋଇଥିଲା। ସେ ଏନେଇ କୌଣସି ସୂଚନା ପ୍ରଦାନ କରି ନ ଥିଲେ। ମାତ୍ର ମୂଳ ନିବାସ ପ୍ରମାଣ ପତ୍ର ଏବଂ ରାଶନ କାର୍ଡରେ ତାଙ୍କର ୩ ସନ୍ତାନ ଥିବା ଦର୍ଶାଯାଇଥିଲା। ଖବର ଜଣାପଡ଼ିବା ପରେ ଲକ୍ଷ୍ମଣଙ୍କ ବିରୋଧରେ ମାମଲା ରୁଜୁ କରାଯାଇଥିଲା। ଲକ୍ଷ୍ମଣ ହାଇକୋର୍ଟର ଜଣିକିଆ ଖଣ୍ଡପୀଠରେ ଏନେଇ ଆବେଦନ କରିଥିଲେ। ଜଣିକିଆ ଖଣ୍ଡପୀଠ ଏହାକୁ ଖାରଜ କରିଦେଇଥିଲେ। ପରେ ଲକ୍ଷ୍ମଣ ଏନେଇ ଦୁଇ ଜରିଆ ଖଣ୍ଡପୀଠର ଦ୍ୱାରସ୍ଥ ହୋଇଥିଲେ। ମାତ୍ର ଏବେ ଦୁଇ ଜଣିଆ ଖଣ୍ଡପୀଠ ପୂର୍ବ ରାୟକୁ କାଏମ୍ ରଖିଛନ୍ତି।
