ସମ୍ବଲପୁର,୪।୯(ପ୍ରମୋଦ ବହିଦାର): ସମ୍ବଲପୁର ଅବକାରୀ ବିଭାଗ ପକ୍ଷରୁ ବୁଧବାର ଧନୁପାଲିଥାନା ଅନ୍ତର୍ଗତ ସୁନାପାଲି ଅଞ୍ଚଳରୁ ଲକ୍ଷାଧିକ ଟଙ୍କା ମୂଲ୍ୟର ବ୍ରାଉନସୁଗାର(ହେରୋଇନ) ଜବତ କରାଯାଇଛି। ଅବକାରୀ ବିଭାଗ ଅଧିକାରୀ ଓ କର୍ମଚାରୀମାନେ ଚଢ଼ାଉ କରି ବେଆଇନ ଭାବେ ଗଛିତ ପ୍ରାୟ ୧୨୦ ଗ୍ରାମ ଓଜନର ବ୍ରାଉନ ସୁଗାର(ହେରୋଇନ) ଜବତ କରିଛନ୍ତି। ଯାହାର ଅନୁମାନିକ ମୂଲ୍ୟ ୧୨ ଲକ୍ଷ ଟଙ୍କା ବୋଲି ଅବକାରୀ ବିଭାଗ ପକ୍ଷରୁ କୁହାଯାଇଛି। ଏ ସଂକ୍ରାନ୍ତରେ ଅବକାରୀ ବିଭାଗ ପକ୍ଷରୁ ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି। ସେମାନେ ହେଲେ ସୁନାପାଲି ଅଞ୍ଚଳର ମହମ୍ମଦ ନସୀମ(୩୯) ଓ ଧନକଉଡ଼ା ଗେଙ୍ଗୁଟିପାଲିର ବିନୋଦ ସାମଲ(୩୧) l
ସମ୍ବଲପୁର ଅବକାରୀ ବିଭାଗ ସୂତ୍ରରୁ ମିଳିଥିବା ସୂଚନା ମତେ, ସମ୍ବଲପୁର ସହରକୁ କଲିକତାରୁ ଟ୍ରେନ ଯୋଗେ ବ୍ରାଉନସୁଗାର ଚୋରାଚାଲାଣ ହେଉଥିବା ସମ୍ପର୍କରେ ବିଶ୍ୱସ୍ତ ସୂତ୍ରରୁ ତାଙ୍କ ବିଭାଗକୁ ସୂଚନା ମିଳିଥିଲା। ଉକ୍ତ ସୂଚନା ଅନୁଯାଇ ବ୍ରାଉନସୁଗାର ଚୋରା ଚାଲାଣକାରୀ ଓହ୍ଲାଇବାକୁ ଥିବା ଷ୍ଟେଶନରେ ବହୁ ପୂର୍ବରୁ ପହଞ୍ଚି ଅବକାରୀ ବିଭାଗ ଅଧିକାରୀ ଓ କର୍ମଚାରୀମାନେ ସେଠାରେ ଛକି ରହିଥିଲେ। ଚାଲାଣକାରୀମାନେ ସମ୍ଭବତଃ ଏସମ୍ପର୍କରେ ଆଗତୁରା ଖବର ପାଇ ଅବକାରୀ ବିଭାଗ କର୍ମଚାରୀଙ୍କୁ ଚକମା ଦେବାକୁ ଉକ୍ତ ଷ୍ଟେଶନ ପୂର୍ବରୁ ଅନ୍ୟ ଏକ ଷ୍ଟେଶନରେ ଓହ୍ଲାଇ ଯାଇଥିଲେ। ସେମାନେ ସେଠାରୁ ଏକ ଆକ୍ଟିଭା ସ୍କୁଟର ଯୋଗେ ବ୍ରାଉନ ସୁଗାର ଧରି ସୁନାପାଲି ଅଞ୍ଚଳରେ ପହଞ୍ଚିଥିଲେ।
ମାତ୍ର ଅବକାରୀ ବିଭାଗର କର୍ମଚାରୀମାନେ ମଧ୍ୟ ଏସମ୍ପର୍କରେ ଖବର ପାଇ ଆଗରୁ ସେଠାରେ ପହଞ୍ଚିଯାଇ ବ୍ରାଉନସୁଗାର ଧରି ସେଠାରେ ପହଞ୍ଚିବା କ୍ଷଣି ଅଭିଯୁକ୍ତ ଦ୍ବୟଙ୍କୁ ମାଡ଼ି ବସିଥିଲେ। ସେମାନଙ୍କ ନିକଟରୁ ବ୍ରାଉନସୁଗାର ସହ ସ୍କୁଟର(ଓଡି-୧୫-ଏନ-୪୭୧୯)କୁ ମଧ୍ୟ ଜବତ କରାଯାଇଛି।
ସୂଚନାଯୋଗ୍ୟ, ଅତୀତରେ ଏହି ଅଞ୍ଚଳରୁ ବହୁବାର ବ୍ରାଉନସୁଗାର ଜବତ ହୋଇଛି। ମାତ୍ର ଆଜି ଅବକାରୀ ବିଭାଗ ପକ୍ଷରୁ ଜବତ ବ୍ରାଉନ ସୁଗାର ପରିମାଣ ଓ ମୂଲ୍ୟ ସର୍ବାଧିକ ବୋଲି ଜଣାପଡ଼ିଛି।
