ଭୁବନେଶ୍ୱର, ୨୭ା୧୨(ବନ୍ଦନା ସେଠୀ):ବନ୍ୟା, ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟ ସମୟରେ ଉପକୂଳ ଜିଲା ପାଇଁ ବରଦାନ ସାଜୁଛି ହେନ୍ତାଳବଣ। ତେଣୁ ହେନ୍ତାଳ ବଣର ଗୁରୁତ୍ୱକୁ ଉପଲବ୍ଧି କରି ଆଗାମୀ ଦିନରେ ପ୍ରାକୃତିକ ବିପର୍ଯ୍ୟୟର ମୁକାବିଲା ପାଇଁ ରାଜ୍ୟ ସରକାର ୫ଟି ଉପକୂଳ ଜିଲାରେ ୬୩୨ହେକ୍ଟର ଜମିରେ ହେନ୍ତାଳ ବଣ ସୃଷ୍ଟି କରିବାର ଲକ୍ଷ୍ୟ ରଖିଛନ୍ତି। ୨୦୨୪-୨୫ ବର୍ଷରେ ୩୭୫ ହେକ୍ଟର ଜାଗାରେ ହେନ୍ତାଳବଣ ସୃଷ୍ଟି କରାଯାଇଛି। ୨୦୨୫-୨୬ରେ ୨୫୭ ହେକ୍ଟରୁ ଊର୍ଦ୍ଧ୍ୱ ଜମି;ା ହେନ୍ତାଳବଣ ସୃ୍ଷ୍ଟି କରାଯିବ ବୋଲି ଜଙ୍ଗଲ ଓ ପରିବେଶ, ଜଳବାୟୁ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ କହିଛନ୍ତି। ପୁରୀ, କେନ୍ଦ୍ରାପଡ଼ା ଭଳି ଅତ୍ୟଧିକ ବିପର୍ଯ୍ୟୟପ୍ରବଣ ଜିଲାଗୁଡିକରେ ହେନ୍ତାଳବଣ ସୃଷ୍ଟି କରାଯିବ। ସେହିପରି ଯେଉଁ ଅଞ୍ଚଳଗୁଡିକରେ ହେନ୍ତାଳବଣ ସୃଷ୍ଟି କରାଯିବ, ତାହାର ପ୍ରି-ମେଜରମେଣ୍ଟ ଏବଂ ସରିବା ପରେ ପୋଷ୍ଟ ମେଜରମେଣ୍ଟ କରାଯିବ। ଏହାବାଦ୍ ହେନ୍ତାଳବଣର ସୁରକ୍ଷା ପାଇଁ ଡ୍ରୋନ୍ କ୍ୟାମେରା ମାଧ୍ୟମରେ ତାହାକୁ ମ୍ୟାପିଂ କରାଯିବ। ପ୍ରୋଜେକ୍ଟ ମନିଟରିଂ ୟୁନିଟ୍ ନିୟୋଜିତ ହେବ। ଏଥିପାଇଁ ପରିବେଶବିତ୍, ବୈଜ୍ଞାନିକ ଏବଂ ଅର୍ନ୍ତଜାତୀୟସ୍ତରରେ ହେନ୍ତାଳବଣ ଉପରେ କାମ କରୁଥିବା ବ୍ୟକ୍ତିଙ୍କ ସହିତ ଆଲୋଚନା ପାଇଁ ଆସନ୍ତା ୩ମାସ ମଧ୍ୟରେ କାର୍ଯ୍ୟପନ୍ଥା ଗ୍ରହଣ କରାଯିବ। ବନବିଭାଗର ନିଜସ୍ବ ୨ହଜାର ୫ଶହ କୋଟି ଟଙ୍କା ରହିଛି। ଏହାବାଦ୍ ଏସ୍ଆର୍ସି ଫଣ୍ଡ୍ ଏବଂ ଆବଶ୍ୟକ ହେଲେ ରାଜସ୍ବ ମନ୍ତ୍ରୀ ମଧ୍ୟ ଅର୍ଥ ଯୋଗାଇଦେବାକୁ ପ୍ରତିଶ୍ରୁତି ଦେଇଥିବା ମନ୍ତ୍ରୀ କହିଛନ୍ତି। ପୂର୍ବ ସରକାର ସମୟରେ ଧାମରା, ଚାନ୍ଦିପୁର, ଇଞ୍ଚୁଡି ଭଳି ବିଭିନ୍ନ ସ୍ଥାନରେ ହେନ୍ତାଳବଣ ସୃଷ୍ଟି କରାଯାଇଥିବା କୁହାଯାଉଛି। ଏଥିପାଇଁ ବହୁକୋଟି ଟଙ୍କା ମଧ୍ୟ ଆସିଥିଲା। ମାତ୍ର ବାସ୍ତବରେ ସେତିକି ଜଙ୍ଗଲ ନାହିଁ। ତେଣୁ ଏହି ଟଙ୍କା କୁଆଡେ ଗଲା, ତାହା ଏବେ ରାଜ୍ୟ ସରକାରଙ୍କ ତଦନ୍ତ ସାପେକ୍ଷ। ବାତ୍ୟା ‘ଦାନା’ ସମୟରେ ହେନ୍ତାଳବଣ ଓ ଝାଉଁଗଛ ଥିବା ଅଞ୍ଚଳରେ ବିପର୍ଯ୍ୟୟ ସମୟରେ ଯେଉଁଭଳି କ୍ଷୟକ୍ଷତି ହେବା କଥା ତାହା ହୋଇ ନ ଥିଲା। ତେଣୁ ହେନ୍ତାଳ ବଣ ସୃଷ୍ଟି କରିବା ସହ ଯେଉଁ ଅଞ୍ଚଳଗୁଡିକରେ ଝାଉଁଗଛ ନଷ୍ଟ ହୋଇଯାଇଛି, ତାହାର ପୁନଃରୁଦ୍ଧାର କରିବା ଦିଗରେ ସରକାର ଚେଷ୍ଟା କରୁଥିବା ମନ୍ତ୍ରୀ କହିଛନ୍ତି।
