ଲଣ୍ଡନ, ୨୫।୭ (ଏପି)-ଫୁଟ୍ବଲ ରାଇଟର୍ସ ଆସୋସିଏଶନ (ଏଫ୍ ଡବ୍ଲ୍ୟୁଏ) ତରଫରୁ ଜୋର୍ଡାନ ହେଣ୍ଡରସନଙ୍କୁ ବର୍ଷର ଶ୍ରେଷ୍ଠ ଖେଳାଳି ଭାବେ ମନୋନୀତ କରାଯାଇଛି। ହେଣ୍ଡରସନଙ୍କ ଅଧିନାୟକତ୍ୱରେ ଲିଭରପୁଲ ୩୦ ବର୍ଷ ବ୍ୟବଧାନରେ ପ୍ରଥମ ଇଂଲିଶ ଲିଗ୍ ଟାଇଟଲ ଜିତିପାରିଛି। କରୋନାଭାଇରସ୍ ମହାମାରୀ ସମୟରେ ବ୍ରିଟେନ ସ୍ବାସ୍ଥ୍ୟ ସେବା ପାଇଁ ପାଣ୍ଠି ସଂଗ୍ରହରେ ତାଙ୍କର ବିଶେଷ ଭୂମିକା ଥିଲା। ଫୁଟ୍ବଲ ରାଇଟର୍ସ ଆସୋସିଏଶନ ପୁରସ୍କାର ପାଇଁ ହୋଇଥିବା ମତଦାନରେ ସେ ମାଞ୍ଚେଷ୍ଟର ସିଟି ମିଡ୍ଫିଲ୍ଡର କେଭିନ୍ ଡି’ ବ୍ରୁଇନ୍ଙ୍କୁ ପଛରେ ପକାଇ ଦେଇଥିଲେ। ହେଣ୍ଡରସନଙ୍କ ସମୟରେ ଲିଭରପୁଲ ଆହୁରି ମଧ୍ୟ ଚାମ୍ପିୟନ୍ସ ଲିଗ୍ ଓ କ୍ଲବ ବିଶ୍ୱକପ୍ ଜିତିପାରିଛି। କରୋନା ମହାମାରୀ ସମୟରେ ଖେଳ ସସ୍ପେଣ୍ଡ ଥିବା ବେଳେ ସେ କେତେଜଣ ସାଥୀ ଖେଳାଳିଙ୍କୁ ନେଇ ଜନସେବାରେ ଲାଗିପଡ଼ିଥିଲେ। ନ୍ୟାଶନାଲ ହେଲଥ୍ ସର୍ଭିସ ପାଇଁ ପାଣ୍ଠି ସଂଗ୍ରହ ମଧ୍ୟ କରିଥିଲେ। ଏଫ୍ଡବ୍ଲ୍ୟୁଏର ଚେୟାରମ୍ୟାନ କେରୀ ବ୍ରାଉନ୍ କହିଛନ୍ତି ହେଣ୍ଡରସନ ବର୍ତ୍ତମାନ ଲିଭରପୁଲ୍ର ଜଣେ କିମ୍ବଦନ୍ତୀ ଖେଳାଳି ପାଲଟିଯାଇଛନ୍ତି।
