ବଞ୍ଚୋ,୨୭ା୮(ପ୍ରଦୋଷ ବିଶ୍ୱାଳ): କେନ୍ଦୁଝର ଜିଲା ଘଷିପୁରା ବ୍ଲକ୍ ଶାମୁକାନେଣ୍ଡି ପଞ୍ଚାୟତର ନିଟ୍ରେ କୃତକାର୍ଯ୍ୟ ହୋଇଥିବା ସୁଦାମ ହାଁସଦାଙ୍କୁ ଭାଜପା ନେତା ସହାୟତା କରିଛନ୍ତି। ସୁଦାମ ଶୁକ୍ରବାର ନାମ ଲେଖାଇବାକୁ ଥିବା ବେଳେ ନାମ ଲେଖାଇବା ପୂର୍ବରୁ ଯୁବ ଭାଜପା ନେତା ତଥା ଆଦର୍ଶ ସେବା ସଂଘର ସଭାପତି ଯଜ୍ଞ ପ୍ରସାଦ ସାହୁ ସହଯୋଗ କରିଛନ୍ତି। ସୁଦାମ ନିଟ୍ ପରୀକ୍ଷାରେ ଓଡ଼ିଶାରେ ଅଧିବାସୀ ବର୍ଗରେ ୧୨୬ ନମ୍ବର ସ୍ଥାନରେ ଥିଲେ। ବାପା ସୋମନାଥ ହଁାସଦାଙ୍କ କିଡ୍ନୀ ସମସ୍ୟା ରହିଥିବା ବେଳେ ମାଆ ମଜୁରୀ ଖଟନ୍ତି। ୫ ଝିଅ ଓ ଏକମାତ୍ର ପୁଅ ସୁଦାମକୁ ପାଠ ପଢ଼ାଇବା ଏକପ୍ରକାର ଅସମ୍ଭବ ଥିଲା।
ଏ ସମ୍ପର୍କରେ ଖବର ପାଇ ଯୁବ ଭାଜପା ନେତା ଯଜ୍ଞ ପ୍ରସାଦ ସୁଦାମଙ୍କ ପରିବାରବର୍ଗଙ୍କୁ ଗତ ୨୧ ତାରିଖରେ ଭେଟିଥିଲେ। ୭ ଦିନ ମଧ୍ୟରେ ଡାକ୍ତରୀ ନାମଲେଖା ସହ ସମ୍ପୂର୍ଣ୍ଣ ପଢ଼ା ଖର୍ଚ୍ଚ ସେ ଯୋଗାଡ଼ କରି ବ୍ୟବସ୍ଥା କରାଇବେ ବୋଲି କଥା ଦେଇଥିଲେ। ସୁଦାମଙ୍କୁ ଅଢ଼େଇ ଲକ୍ଷ ଟଙ୍କାର ସହାୟତା ପ୍ରଦାନ କରିଛନ୍ତି। ସେହିପରି ପ୍ରତିମାସ ହଷ୍ଟେଲ ଖର୍ଚ୍ଚ ବାବଦକୁ ୫ ହଜାର ଟଙ୍କା ପ୍ରଦାନ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି। ତେବେ ସୁଦାମଙ୍କୁ ବିଭିନ୍ନ ବର୍ଗର ଲୋକେ ମଧ୍ୟ ସହାୟତା କରିଛନ୍ତି। ସୁଦାମ ସୂଚନା ଦେଇ କହିଛନ୍ତି, ଯଜ୍ଞ ପ୍ରସାଦଙ୍କ ସହଯୋଗରେ ସେ ୪ ଦିନ ତଳେ ଭୁବନେଶ୍ୱର ଯାଇଥିଲେ। ସେଠାରେ ବିଭିନ୍ନ ବ୍ୟକ୍ତି ବିଶେଷ ଆସି ସୁଦାମଙ୍କ ଭେଟି ସହଯୋଗର କଥା ଦେଇଥିଲେ। ସାହୁଙ୍କ ପରାମର୍ଶକ୍ରମେ ସୁଦାମଙ୍କ ସମସ୍ତେ ସହଯୋଗ କରିଛନ୍ତି। ସୁଦାମଙ୍କ ଆକାଉଣ୍ଟକୁ ୬୨ ହଜାର ଟଙ୍କା ପ୍ରଦାନ କରାଯାଇଥିବା ଯଜ୍ଞ ପ୍ରସାଦ ସୂଚନା ଦେଇଛନ୍ତି। ଏହି ଅବସରରେ ଯୁବ ସାମାଜିକକର୍ମୀ ଦୈତାରୀ ମହାକୁଡ଼, ଛାତ୍ର ନେତା ପ୍ରସନ୍ନଜିତ ସାହୁ, ରୂପ ରଞ୍ଜନ ମହାରଣା ପ୍ରମୁଖ ଉପସ୍ଥିତ ଥିଲେ।