ଥୁଆମୂଳ ରାମପୁର, ୨୬ା୧ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲାର ପ୍ରସିଦ୍ଧ ପର୍ଯ୍ୟଟନସ୍ଥଳୀ କୋଷାବରା ‘ହେଲୋ ପଏଣ୍ଟ’ ଏବେ ଏକ ଭିନ୍ନ ସ୍ଥିତିରେ। ଆଦିବାସୀ ସଂସ୍କୃତିର ସୁରକ୍ଷା ଓ ପ୍ରଚାର ପାଇଁ ସରକାର ଲକ୍ଷ ଲକ୍ଷ ଟଙ୍କା ପାଣି ପରି ଖର୍ଚ୍ଚ କରୁଥିବା ବେଳେ ବାସ୍ତବ ଚିତ୍ର କିନ୍ତୁ ସମ୍ପୂର୍ଣ୍ଣ ଅଲଗା । ୨୦୨୩-୨୪ ଆର୍ଥିକ ବର୍ଷରେ ମୁଖ୍ୟମନ୍ତ୍ରୀ ସ୍ବତନ୍ତ୍ର ସହାୟତା ଯୋଜନାରୁ ୨୦ ଲକ୍ଷ ଟଙ୍କା ବ୍ୟୟରେ ଆରମ୍ଭ ହୋଇଥିବା ସଂଗ୍ରହାଳୟ ପ୍ରକଳ୍ପ ଏବେ ବିଭାଗୀୟ ଅବହେଳା ଓ ଦୁର୍ନୀତିର ମୂକସାକ୍ଷୀ ପାଲଟିଛି। ସଂଗ୍ରହାଳୟର ଅର୍ଥ ହେଉଛି ପାରମ୍ପରିକ ଜ୍ଞାନ, ଅସ୍ତ୍ରଶସ୍ତ୍ର ଓ ବେଶଭୂଷାର ସଂରକ୍ଷଣ।
ମାତ୍ର କୋଷାବରାରେ ନିର୍ମାଣାଧୀନ ଏହି ଗୃହରେ ନା ଅଛି ପ୍ରାଚୀନ ସାମଗ୍ରୀ, ନା ଅଛି ସଂଗ୍ରହ ପାଇଁ କୌଣସି ଆନ୍ତରିକତା। ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ, କେବଳ କୋଠା ନିର୍ମାଣ କରି ଟଙ୍କା ହଡ଼ପ କରିବା ପାଇଁ ଏହା ଏକ ପ୍ରୟାସ। “ସାମଗ୍ରୀ ନାହିଁ ତ ସଂଗ୍ରହାଳୟ କାହିଁକି?” ଏହି ପ୍ରଶ୍ନ ଏବେ ଅଞ୍ଚଳବାସୀଙ୍କ ମନରେ ଆନ୍ଦୋଳନ ସୃଷ୍ଟି କଲାଣି। ପଞ୍ଚାୟତ ସମିତି ଓ ଜିଲା ପରିଷଦର ତତ୍ତ୍ୱାବଧାନରେ ଚାଲିଥିବା ଏହି କାର୍ଯ୍ୟର ମାନ ଅତ୍ୟନ୍ତ ନିମ୍ନମାନର ବୋଲି ବୁଦ୍ଧିଜୀବୀମାନେ ଅଭିଯୋଗ କରିଛନ୍ତି। ରଙ୍ଗହୀନ କୋଠା ଓ ଅଧାପନ୍ତରିଆ କାନ୍ଥ ଦର୍ଶାଉଛି ଯେ, ସରକାରୀ ଅର୍ଥର ବ୍ୟାପକ ବାଟମାରଣା ହୋଇଛି। ବିଭାଗୀୟ ଅଧିକାରୀ ଓ ଠିକାଦାରଙ୍କ ମଧ୍ୟରେ ଥିବା ସଲାସୁତୁରା ଯୋଗୁ ପ୍ରକଳ୍ପଟି ଆଜି ଅସମାପ୍ତ ଅବସ୍ଥାରେ ପଡ଼ିରହିଛି। ପ୍ରାକୃତିକ ସୌନ୍ଦର୍ଯ୍ୟକୁ ଉପଭୋଗ କରିବାକୁ ଆସୁଥିବା ପର୍ଯ୍ୟଟକମାନେ ଏହି ବିପର୍ଯ୍ୟସ୍ତ ସଂଗ୍ରହାଳୟକୁ ଦେଖି ରାଜ୍ୟ ପର୍ଯ୍ୟଟନ ବିଭାଗର ଦକ୍ଷତା ଉପରେ ପ୍ରଶ୍ନ ଉଠାଉଛନ୍ତି। ପୂର୍ବ ସରକାରଙ୍କ ଯୋଜନାକୁ ବର୍ତ୍ତମାନର ପ୍ରଶାସନ ଗୁରୁତ୍ୱ ନ ଦେବା ଫଳରେ ଏହା ଏକ ‘ଶୋ-ପିସ’ରେ ପରିଣତ ହେବାକୁ ଯାଉଛି। ଜିଲା ପ୍ରଶାସନ ଏହି ପ୍ରକଳ୍ପର ସ୍ଥିତି ସ୍ପଷ୍ଟ କରିବା ସହ ତୁରନ୍ତ ସାମଗ୍ରୀ ସଂଗ୍ରହ ପ୍ରକ୍ରିୟା ଆରମ୍ଭ କରିବାକୁ ସାଧାରଣରେ ଦାବି ହେଉଛି। ଯଦି କାର୍ଯ୍ୟ ତ୍ୱରାନୱିତ ନହୁଏ, ତେବେ ଆଗାମୀ ଦିନରେ ଜନତାଙ୍କ ଅଦାଲତରେ ପ୍ରଶାସନକୁ ଜବାବ ଦେବାକୁ ପଡ଼ିବ ବୋଲି ଚେତାବନୀ ଦିଆଯାଇଛି।
