ପିପିଲି/ଡେଲାଙ୍ଗ,୨୮।୯(ଡି.ଏନ୍.ଏ./ସ୍ବ.ପ୍ର.): ପିପିଲି ଉପନିର୍ବାଚନ ପାଇଁ ୩୦ ତାରିଖରେ ମତଦାନ ହେବାକୁ ଥିବାବେଳେ ସୋମବାର ସନ୍ଧ୍ୟାରେ ପ୍ରଚାର ଶେଷ ହୋଇଛି। ଏହି ପରିପ୍ରେକ୍ଷୀରେ ଶାସକ ବିଜେଡି, ଭାଜପା ଓ କଂଗ୍ରେସର ଷ୍ଟାର ପ୍ରଚାରକମାନେ ବିଭିନ୍ନ ପଞ୍ଚାୟତ ବୁଲି ସଭା ଓ ପ୍ରଚାର କରି ଦଳୀୟ ପ୍ରାର୍ଥୀଙ୍କ ପାଇଁ ଭୋଟ୍ ମାଗିଥିଲେ। ପିପିଲି ବ୍ଲକର ତେଇଶିପୁର ମନ୍ଦିରଠାରୁ ମନ୍ତ୍ରୀ ସମୀର ରଞ୍ଜନ ଦାଶ, ଚାନ୍ଦବାଲି ବିଧାୟକ ବ୍ୟୋମକେଶ ରାୟ, ରାଜ୍ୟ କ୍ଷୁଦ୍ର ନିଗମ ଅଧ୍ୟକ୍ଷ ଚିନ୍ମୟ ସାହୁ, କେନ୍ଦ୍ରାପଡା ଜିଲା ଯୁବ ବିଜେଡି ସଭାପତି ରାଜେଶ ଦାଶ, ଧରଣୀଧର ସାହୁ, ଗଦାଧର ଦାସ, ଈଶ୍ୱର ପ୍ରସାଦ ଦାଶ, ଶାନ୍ତିିଲତା ପ୍ରଧାନ, ଉମାମଣି ରଥ, ଶାନ୍ତିଲତା ପରିଡାଙ୍କ ନେତୃତ୍ୱରେ ଶତାଧିକ ବିଜେଡି କର୍ମୀ ବିଭିନ୍ନ ଗ୍ରାମକୁ ଯାଇ ଦଳୀୟ ପ୍ରାର୍ଥୀ ରୁଦ୍ର ମହାରଥୀଙ୍କ ପ୍ରଚାର କରିଥିଲେ। ଏହି ଅବସରରେ ତେଇଶିିପୁରଠାରେ ଜଗଦୀପ ପରିଡା, ମାନସ ନାୟକଙ୍କ ସମେତ ବହୁ କର୍ମୀ ଭାଜପା ଛାଡି ବିଜେଡିରେ ଯୋଗଦେଇଥିଲେ। ଯଶୁଆପୁର ପଞ୍ଚାୟତରେ ପୂର୍ବତନ ମନ୍ତ୍ରୀ ଅତୁନ ସବ୍ୟସାଚୀ ନାୟକ, ଆଶିଷ ବରାଳ, ପ୍ରଦ୍ୟୁମ୍ନ ସାମନ୍ତରାୟ, ବୁଦ୍ଧନାଥ ପ୍ରଧାନ, ରାଧୁଚରଣ ଜେନା, ଅନନ୍ତ ନାୟକ, ଶିବପ୍ରସାଦ ଜେନାଙ୍କ ସମେତ ଶତାଧିକ କର୍ମୀ ଦଳୀୟ ପ୍ରାର୍ଥୀ ରୁଦ୍ରଙ୍କ ପାଇଁ ପ୍ରଚାର କରିଥିଲେ। ଅନ୍ୟପଟେ ଅପରାହ୍ନରେ ଭୁବନେଶ୍ୱର ଏମ୍ପି ଅପରାଜିତା ଷଡ଼ଙ୍ଗୀ ବିରାଟ ପଦଯାତ୍ରାରେ ବାହାରି ପିପିଲି ବଜାରର ବିଭିନ୍ନ ଦୋକାନକୁ ଯାଇ ଭାଜପା ପ୍ରାର୍ଥୀ ଆଶ୍ରିତ ପଟ୍ଟନାୟକଙ୍କ ପାଇଁ ଭୋଟ୍ ମାଗିଥିଲେ। ଏହି ପଦଯାତ୍ରାରେ ରାଜ୍ୟ ଭାଜପା ଉପସଭାପତି ପ୍ରଭାତୀ ପରିଡା, ଅନିତା ଶୁଭଦର୍ଶନୀ, ରାଜ୍ୟ ମହିଳା ମୋର୍ଚ୍ଚା ସଭାନେତ୍ରୀ ସ୍ମୃତି ପଟ୍ଟନାୟକ, କସ୍ତୁରୀ ମିଶ୍ରଙ୍କ ସମେତ ସ୍ଥାନୀୟ ନେତୃବୃନ୍ଦମାନେ ସାମିଲ ହୋଇଥିଲେ। ପିପିଲି ବ୍ଲକ ଛକ ଠାରେ ପୋଲିସ ସମୟ ସୀମା ଅନୁଯାୟୀ ଏହି ପଦଯାତ୍ରାକୁ ଅଟକାଇ ବନ୍ଦ କରିଥିଲା। ପିପିଲିରେ ନିଶ୍ଚିତ ପରିବର୍ତ୍ତନ ହେବ। ଭାଜପା ପ୍ରାର୍ଥୀ ବିଜୟ ଲାଭ କରିବେ ବୋଲି ଏମ୍ପି ଷଡ଼ଙ୍ଗୀ କହିଛନ୍ତି। ସେହିପରି କଂଗ୍ରେସ ପକ୍ଷରୁ ଦଳୀୟ ପ୍ରାର୍ଥୀ ବିଶ୍ୱକେସନ ହରିଚନ୍ଦନ ମହାପାତ୍ରଙ୍କ ପାଇଁ ମୁନିନ୍ଦ, କଲ୍ୟାଣପୁର, ସାଉରିଆ, ସୁଜନପୁର, କୋଠବାଡ, ଚାଇଁପୁର, ରେଙ୍ଗଳ, ହରିରାଜପୁର, ଗୋଡିପୁଟ, ମାଟିଆପଡା ଆଦି ପଞ୍ଚାୟତରେ ଜୋରଦାର ପ୍ରଚାର କରାଯାଇଛି।ଜଟଣୀ ବିଧାୟକ ସୁରେଶ କୁମାର ରାଉତରାୟ, କୋରାପୁଟ ଏମ୍ପି ସପ୍ତଗିରି ଶଙ୍କର ଉଲାକା, ମହିଳା କଂଗ୍ରେସ ସଭାପତି ବନ୍ଦିତା ପରିଡା, ପର୍ଯ୍ୟବେକ୍ଷକ ଉମାବଲଭ ରଥ, ପିସିସି ସାଧାରଣ ସମ୍ପାଦକ ନଳିନୀ ସ୍ବାଇଁ, ରବି ରାୟ, ପ୍ରଦୀପ ବେହେରା, ସୌମ୍ୟରଞ୍ଜନ ପଟ୍ଟନାୟକ, ନିରୁପମା ପାତ୍ର, ବିନୋଦ ସ୍ବାଇଁ, ବିଶ୍ୱରଞ୍ଜନ ବଳବନ୍ତରାୟ, ପ୍ରହ୍ଲାଦ ପ୍ରଧାନ, ନିର୍ମଳ ପରିଡ଼ା, ଲକ୍ଷ୍ମୀଧର ପ୍ରଧାନ, ସୁବାସ ନାୟକ, ସୁରେଶ ମହାପାତ୍ର, ବାଙ୍କନିଧି ବେହେରା, ଟିକନ ବିଶ୍ୱାଳ ପ୍ରମୁଖ ଡେଲାଙ୍ଗ ହାଟ ବଜାର, ଷ୍ଟେଶନ ବଜାର, ଘୋରଡିଆ ବଜାର, ବେରବୋଇ ବଜାରରେ ପ୍ରଥପ୍ରାନ୍ତ ସଭା କରିବା ସହ ଦଳୀୟ ପ୍ରାର୍ଥୀ ବିଶ୍ୱକେସନଙ୍କ ପାଇଁ ଭୋଟ୍ ମାଗିଥିଲେ। ଏଥିସହ ପୂର୍ବତନ ପିସିସି ସଭାପତି ଶରତ ପଟ୍ଟନାୟକ, ସୁରେଶ ମହାପାତ୍ର, ପୂର୍ବତନ ବିଧାୟକ ନିମେଇ ସରକାର, ଲଲାଟେନ୍ଦୁ ଦାଶ, ବିସ୍ମୟ ମହାପାତ୍ର, ରବିନ୍ଦ୍ର ଦାସ, ବିପିନ ବିହାରୀ ବଳବନ୍ତରାୟ, ଜ୍ଞାନରଞ୍ଜନ ପଟ୍ଟନାୟକ, ଚନ୍ଦ୍ରଶେଖର ପରିଡା, ବିଜୟ ପ୍ରଧାନ, ପ୍ରହ୍ଲାଦ ପ୍ରଧାନ, ମାନସ ସ୍ବାଇଁ ପ୍ରମୁଖ ଘର ଘର ବୁଲି ପ୍ରଚାର କରିବା ସହ ବିଶ୍ୱକେସନଙ୍କୁ ଭୋଟ୍ ଦେବାକୁ କହିଥିଲେ।
