ବେଙ୍ଗାଲୁରୁ,୧୨।୧: ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ ସାଇନ୍ସ (ଆଇଆଇଏସ୍ସି) ବୈଜ୍ଞାନିକମାନେ ଏକ ନୂଆ କରୋନା ଟିକା ବିକଶିତ କରିଛନ୍ତି। ଏହି ଭାକ୍ସିନ୍ ଏସ୍ଏଆର୍ଏସ୍-କୋଭ୍-୨ର ବର୍ତ୍ତମାନ ଏବଂ ଭବିଷ୍ୟତରେ ଦେଖାଦେବାକୁ ଥିବା ଭାରିଆଣ୍ଟଗୁଡ଼ିକଠାରୁ ସୁରକ୍ଷା ଦେବ ବୋଲି ବୈଜ୍ଞାନିକମାନେ ଦାବି କରିଛନ୍ତି।
କୋଭିଡ୍-୧୯ ମହାମାରୀ ଆରମ୍ଭ ପରଠାରୁ ଆଇଆଇଏସ୍ସିର ମୋଲେକ୍ୟୁଲାର ବାୟୋଫିଜିକ୍ସ ୟୁନିଟ (ଏମ୍ବିୟୁ) ପ୍ରଫେସର ରାଘବନ ବରଦାରଞ୍ଜନ ଏବଂ ଅନ୍ୟ ବୈଜ୍ଞାନିକମାାନେ ଏକ ଉତ୍ତାପ ସହିଷ୍ଣୁ ଭାକ୍ସିନ ବିକଶିତ କରିବାରେ ଲାଗିଥିଲେ, ଯାହାକି ସବୁ ପ୍ରକାର ଭାରିଆଣ୍ଟଠାରୁ ଲୋକଙ୍କୁ ସୁରକ୍ଷା ଦେଇପାରିବ। ଏହି କ୍ଷେତ୍ରରେ ଗବେଷକ ଦଳକୁ ଅଭୂତପୂର୍ବ ସଫଳତା ମିଳିଛି।
ଆର୍ଏସ୍୨ ହେଉଛି ଏକ କୃତ୍ରିମ ଆଣ୍ଟିଜେନ୍, ଯାହାକି ଏସ୍୨ ସବ୍ୟୁନିଟ୍ ଏବଂ ରିସିପ୍ଟର ବାଇଣ୍ଡିଂ ଡୋମେନ୍ (ଆର୍ବିଡି) ଭଳି କୋଭିଡ୍ ଭୂତାଣୁର ସ୍ପାଇକ୍ ପ୍ରୋଟିନକୁ ଯୋଡ଼ିଥାଏ। ବିଆର୍ଡି ସଂକ୍ରମିତଙ୍କୁ ଅଧିକ ସମୟ ଧରି ଭୂତାଣୁରୁ ସୁରକ୍ଷା ଦେଇଥାଏ। ଏହାକୁ ଘରର ସ୍ବାଭାବିକ ତାପମାତ୍ରାରେ ମଧ୍ୟ ରଖାଯାଇପାରେ।
